.png)
ஐபிஎல் 2026 தொடரில் தொடர்ந்து நான்கு தோல்விகளைச் சந்தித்த மும்பை இந்தியன்ஸ் அணி, ஒருவழியாக குஜராத் டைட்டன்ஸ் அணிக்கு எதிரான போட்டியில் 99 ரன்கள் வித்தியாசத்தில் அபார வெற்றி பெற்று மீண்டும் வெற்றிப் பாதைக்குத் திரும்பியுள்ளது. இந்த வெற்றியில் நட்சத்திர வீரர் திலக் வர்மாவின் ஆட்டம் ஒரு மிகப்பெரிய திருப்புமுனையாக அமைந்தது. வெறும் 45 பந்துகளில் சதம் விளாசி ஆட்டமிழக்காமல் இருந்த திலக் வர்மாவின் அதிரடிக்கு பின்னால் கேப்டன் ஹர்திக் பாண்டியாவின் ஒரு அதிரடி 'மெசேஜ்' ஒளிந்திருப்பதாகத் தெரியவந்துள்ளது. போட்டிக்குப் பிறகு பேசிய ஹர்திக் பாண்டியா, திலக் வர்மாவின் திறமை மீது தமக்கு எப்போதும் நம்பிக்கை இருந்ததாகக் கூறினார்.
இந்த போட்டியில் திலக் வர்மா ஆரம்பத்தில் சற்று தடுமாறினார். அவர் 22 பந்துகளில் வெறும் 19 ரன்கள் மட்டுமே எடுத்திருந்தபோது, இரண்டாவது ஸ்டிரேட்டஜிக் டைம்-அவுட் இடைவேளையில் ஹர்திக் பாண்டியா அவரிடம் ஏதோ ஒரு விஷயத்தை மிகவும் தீவிரமாகப் பேசினார். அந்த இடைவேளைக்கு பிறகு தான் திலக் வர்மாவின் ஆட்டம் தலைகீழாக மாறியது. இது குறித்துப் பேசிய பாண்டியா, திலக் வர்மாவுக்கு என்ன திறமை இருக்கிறது என்பது எனக்குத் தெரியும், அவர் எதற்கும் கவலைப்படத் தேவையில்லை என்பதை உணர வைத்தேன். "பந்தை மட்டும் கவனி, நேராக அடி" என்று மட்டும் அவரிடம் சொன்னதாகக் கூறினார். அந்த ஒரு வார்த்தை திலக் வர்மாவுக்கும் மும்பை இந்தியன்ஸ் அணிக்கும் அந்த நேரத்தில் மிகவும் தேவைப்பட்டது என்று அவர் தெரிவித்தார்.
அகமதாபாத் மைதானத்தில் மும்பை இந்தியன்ஸ் அணி இதுவரை ஒரு வெற்றியைக்கூடப் பதிவு செய்யாமல் இருந்தது. இந்த முறை அந்த மோசமான சாதனைக்கு முற்றுப்புள்ளி வைக்கப்பட்டுள்ளது. மும்பை அணிக்கு இது ஒரு மிக முக்கியமான போட்டியாக அமையும் என்று ஹர்திக் நம்புகிறார். வெளியூர் மைதானங்களில் சென்று வெற்றி பெறுவது எப்போதுமே சவாலான விஷயம், அதிலும் அகமதாபாத் மும்பை அணிக்கு ராசியில்லாத இடமாகவே இருந்துள்ளது. ஆனால் இந்த முறை நாங்கள் சிறப்பான கிரிக்கெட்டை விளையாடியுள்ளோம் என்றும், இந்த வெற்றி அணிக்கு மிகவும் விசேஷமானது என்றும் ஹர்திக் மகிழ்ச்சியுடன் தெரிவித்தார்.
மறுபுறம், குஜராத் டைட்டன்ஸ் அணியின் கேப்டன் சுப்மன் கில் இந்த படுதோல்வியால் மிகுந்த மனவருத்தத்தில் இருந்தார். கடைசி ஆறு ஓவர்களில் தங்கள் அணி 95 ரன்களை வாரி வழங்கியதுதான் தோல்விக்கு முக்கிய காரணம் என்று அவர் வெளிப்படையாகவே ஒப்புக்கொண்டார். மிடில் ஓவர்களில் அதிக ரன்களைக் கொடுத்தது மற்றும் சரியான இடங்களில் பந்துவீசாதது தங்களுக்குப் பின்னடைவை ஏற்படுத்தியதாக அவர் கூறினார். இந்த பிட்ச்சில் 160 முதல் 170 ரன்கள் வரை எடுத்திருந்தால் அது ஒரு நல்ல ஸ்கோராக இருந்திருக்கும், ஆனால் மும்பை அணி 199 ரன்கள் எடுத்தது தங்களுக்குப் பெரும் சுமையாகிவிட்டது என்றார்.
குறிப்பாக பிரசித் கிருஷ்ணா வீசிய இரண்டு ஓவர்கள் மற்றும் அசோக் சர்மா வீசிய ஒரு ஓவர் என மொத்தம் மூன்று ஓவர்களில் மட்டும் 67 ரன்கள் கசிந்தது சுப்மன் கில்லை கோபப்பட வைத்துள்ளது. ஆடுகளம் மெதுவாக இருந்த போதிலும் பந்துவீச்சாளர்கள் அதைச் சரியாகப் பயன்படுத்திக் கொள்ளவில்லை என்று அவர் குறை கூறினார். பேட்டிங்கிலும் தங்களால் சிறப்பாகச் செயல்பட முடியவில்லை என்றும், பனிப்பொழிவு இருந்தும் பேட்ஸ்மேன்கள் அதைச் சாதகமாக்கிக் கொள்ளவில்லை என்றும் அவர் விமர்சித்தார்.
தற்போது மும்பை இந்தியன்ஸ் அணி வெற்றிப் பாதைக்குத் திரும்பியுள்ளதால் அந்த அணியின் ரசிகர்கள் உற்சாகமடைந்துள்ளனர். திலக் வர்மாவின் இந்த அதிரடி சதம் ஐபிஎல் வரலாற்றில் மிகச் சிறந்த இன்னிங்ஸ்களில் ஒன்றாகப் பார்க்கப்படுகிறது. அடுத்தடுத்த போட்டிகளிலும் இதே வேகத்தைத் தொடர மும்பை அணி திட்டமிட்டுள்ளது. குஜராத் அணியைப் பொறுத்தவரை இனி வரும் வெளியூர் போட்டிகளில் வெற்றி பெற வேண்டிய கட்டாயத்தில் உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
