"அவரை தூக்குங்க.. இல்லேன்னா விளையாட முடியாது".. இந்திய அணியின் 'கைக்குலுக்கல்' சர்ச்சை - பாக்., மிரட்டல்!

இந்தியா மற்றும் பாகிஸ்தான் அணிகளுக்கு இடையே கடந்த செப்.14 அன்று நடந்த ஆசியக் கோப்பை கிரிக்கெட் போட்டியில், இந்திய வீரர்கள் பாகிஸ்தான் வீரர்களுடன் கைகுலுக்க மறுத்தது ஒரு பெரிய சர்ச்சையாக உருவெடுத்துள்ளது. இந்தச் சம்பவம் தொடர்பாக போட்டி நடுவர் ஆண்டி பைக்கிராப்ட்-டை பதவியிலிருந்து நீக்க வேண்டும் என்று பாகிஸ்தான் கிரிக்கெட் வாரியம் (PCB) கோரிக்கை விடுத்துள்ளது.

போட்டி தொடங்குவதற்கு முன், போட்டி நடுவர் பைக்கிராப்ட், பாகிஸ்தான் கேப்டன் சல்மான் அலி ஆகாவிடம், இந்திய வீரர் சூர்யகுமார் யாதவ்விடம் கைகுலுக்க வேண்டாம் என்று அறிவுறுத்தியுள்ளார். இது பாகிஸ்தான் கிரிக்கெட் வாரியத்தை ஆத்திரமடையச் செய்தது. இந்தச் செயல் "விளையாட்டுக்கு எதிரான ஒரு செயல்" என்று தெரிவித்த பாகிஸ்தான், இதன் காரணமாக, ஐக்கிய அரபு எமிரேட்ஸ் அணிக்கு எதிரான தங்களது அடுத்த போட்டியை புறக்கணிப்பதாக சர்வதேச கிரிக்கெட் கவுன்சிலிடம் (ICC) மிரட்டல் விடுத்தது. மேலும், போட்டி நடுவர் ஆண்டி பைக்கிராப்ட்-டை உடனடியாக நீக்க வேண்டும் என்றும் கோரிக்கை வைத்தது.

ஆனால், டைம்ஸ் ஆப் இந்தியா நாளிதழின் ஒரு அறிக்கை இதற்கு முற்றிலும் மாறுபட்ட ஒரு தகவலை வெளியிட்டுள்ளது. போட்டி நடுவர் பைக்கிராப்ட், ஆட்டத்திற்கு முன்பே ஆசிய கிரிக்கெட் கவுன்சிலின் (ACC) அறிவுறுத்தல்களின்படி செயல்பட்டதாக அந்த அறிக்கை கூறுகிறது. மேலும், ஆசிய கிரிக்கெட் கவுன்சிலின் தலைவராக இருப்பவர் மொஹ்சின் நக்வி (இவர் பாகிஸ்தான் கிரிக்கெட் வாரியத்தின் தலைவராகவும் உள்ளார்) என்றும் அந்த அறிக்கை சுட்டிக்காட்டுகிறது.

"இதில் ஐசிசி-க்கு என்ன சம்பந்தம்? அதிகாரிகள் நியமிக்கப்பட்ட பிறகு அவர்களின் பணி முடிந்துவிடும். போட்டி தொடங்குவதற்கு முன், ஆசிய கிரிக்கெட் கவுன்சிலைச் சேர்ந்த யாரோ ஒருவர் பைக்கிராப்ட்டிடம் பேசினார். டாஸ் நேரத்தில் நடந்தது அதன் விளைவுதான். ஐசிசி மீது குற்றம் சாட்டி புகைச்சலை மேலும் தூண்டிவிடுவதை விட, பாகிஸ்தான் கிரிக்கெட் வாரியத்தின் தலைவர், அந்த உரையாடல் என்ன?, யார் அதைப் பேசினார்கள்?, ஏன் பேசினார்கள்? என்பதை கண்டறிவதே சரியான நேரம்," என்று தெரிவிக்கப்பட்டுள்ளது

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.