.png)
அனைவரும் ஆவலுடன் எதிர்பார்த்த 2026-ஆம் ஆண்டுக்கான ஐபிஎல் ஏலம் ஒரு வழியாக நிறைவடைந்தது. இந்த மினி ஏலத்தில் யாரும் எதிர்பார்க்காத வகையில் பல இளம் இந்திய வீரர்கள் கோடீஸ்வரர்களாக மாறியுள்ளனர். சுமார் 10 அணிகள் இணைந்து 77 வீரர்களுக்காக மொத்தம் 215.45 கோடி ரூபாயை வாரி இறைத்துள்ளன. கிரிக்கெட் ரசிகர்களுக்கு விருந்து படைக்கும் இந்தத் திருவிழா மார்ச் 26 முதல் மே 31 வரை நடைபெறவுள்ளது.
இந்த ஏலத்தில் ஆஸ்திரேலிய வீரர் கேமரூன் கிரீன் புதிய வரலாறு படைத்துள்ளார். கொல்கத்தா நைட் ரைடர்ஸ் அணி இவரை 25.20 கோடி ரூபாய்க்கு வாங்கியுள்ளது. இதன் மூலம் ஐபிஎல் வரலாற்றில் மட்டுமல்லாமல், உலக அளவில் நடைபெறும் எந்த ஒரு லீக் போட்டியிலும் அதிக விலைக்கு வாங்கப்பட்ட வெளிநாட்டு வீரர் என்ற சாதனையை அவர் படைத்துள்ளார். இது ஒரு பக்கம் இருக்க, சென்னை சூப்பர் கிங்ஸ் அணி இளம் வீரர்களைத் தூக்குவதில் காட்டிய வேகம் ரசிகர்களை வியப்பில் ஆழ்த்தியுள்ளது.
சென்னை சூப்பர் கிங்ஸ் அணி இந்த முறை இளம் திறமைகளை அடையாளம் காண்பதில் கில்லாடியாகச் செயல்பட்டுள்ளது. இதுவரை அதிகம் அறியப்படாத பிரசாந்த் வீர் மற்றும் கார்த்திக் சர்மா ஆகிய இருவரையும் தலா 14.20 கோடி ரூபாய்க்கு சென்னை அணி தட்டிச் சென்றுள்ளது. வெறும் 30 லட்ச ரூபாய் அடிப்படை விலையுடன் ஏலத்தில் நுழைந்த இவர்கள், இன்று கோடிக்கணக்கில் சம்பளம் வாங்கும் நிலைக்கு உயர்ந்துள்ளனர். சென்னை ரசிகர்களுக்கு இது மிகப்பெரிய இன்ப அதிர்ச்சியாக அமைந்துள்ளது.
மேலும், இலங்கையின் 'குட்டி மலிங்கா' என்று அழைக்கப்படும் மதீஷா பத்திரணாவை கொல்கத்தா நைட் ரைடர்ஸ் அணி 18 கோடி ரூபாய்க்கு வாங்கியுள்ளது. ராஜஸ்தான் ராயல்ஸ் அணி சுழற்பந்து வீச்சாளர் ரவி பிஷ்னோயை 7.20 கோடிக்கும், லக்னோ சூப்பர் ஜெயண்ட்ஸ் அணி அன்றிச் நோர்கியாவை 2 கோடிக்கும் எடுத்துள்ளன. பெங்களூரு ராயல் சேலஞ்சர்ஸ் அணி வெங்கடேஷ் ஐயரை 7 கோடி ரூபாய்க்குத் தனது கூடாரத்திற்கு இழுத்துள்ளது.
அதே சமயம், சில நட்சத்திர வீரர்களுக்கு இந்த ஏலம் ஏமாற்றத்தையே தந்தது. ஜேக் பிரேசர்-மெக்கர்க் மற்றும் ஜேமி ஸ்மித் போன்ற வீரர்கள் பலமுறை ஏலத்திற்கு வந்தும் ஒரு அணியும் அவர்களை எடுக்க முன்வரவில்லை. பிருத்வி ஷா முதல் இரண்டு சுற்றுகளில் விலை போகவில்லை என்றாலும், கடைசி சுற்றில் டெல்லி கேபிடல்ஸ் அணி அவரை 75 லட்ச ரூபாய்க்கு மீண்டும் வாங்கியது. சர்பராஸ் கானை சென்னை சூப்பர் கிங்ஸ் அணி 75 லட்ச ரூபாய்க்கு எடுத்துள்ளது.
இந்த ஏலம் மூலம் ஐபிஎல் தொடரில் பணத்தின் மதிப்பு எவ்வளவு என்பது மீண்டும் ஒருமுறை நிரூபிக்கப்பட்டுள்ளது. அடிமட்ட விலையில் இருந்த வீரர்கள் கூட தங்களின் திறமையால் இன்று கோடீஸ்வரர்களாக மாறியுள்ளனர். இது போன்ற சுவாரசியமான மாற்றங்களுடன் ஐபிஎல் 2026 களம் சூடுபிடிக்கத் தொடங்கிவிட்டது. எந்த அணி வலுவாக இருக்கிறது என்பதை இனி மைதானத்தில் தான் பார்க்க வேண்டும்.
முக்கிய வீரர்களின் ஏலப் பட்டியல்:
கேமரூன் கிரீன் - கொல்கத்தா - 25.20 கோடி
மதீஷா பத்திரணா - கொல்கத்தா - 18 கோடி
பிரசாந்த் வீர் - சென்னை - 14.20 கோடி
கார்த்திக் சர்மா - சென்னை - 14.20 கோடி
லியாம் லிவிங்ஸ்டோன் - ஹைதராபாத் - 13 கோடி
முஸ்தபிசுர் ரஹ்மான் - கொல்கத்தா - 9.2 கோடி
ஆகிப் தார் - டெல்லி - 8.40 கோடி
இந்த ஏலம் இந்திய கிரிக்கெட் வரலாற்றில் பல புதிய மைல்கற்களை எட்டியுள்ளது என்பதில் சந்தேகமில்லை.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
