ருதுராஜை ஏன் நீக்க வேண்டும்? CSK அணியில் அவருக்கு ஆதரவாகக் எழுந்த குரல்...

ஐபிஎல் தொடரில் சென்னை சூப்பர் கிங்ஸ் அணியின் அடுத்தகட்ட நகர்வுகள் குறித்து ரசிகர்கள் மத்தியில் விவாதம் தொடங்கியுள்ளது. குறிப்பாக, அணியின் கேப்டன் ருதுராஜ் கெய்க்வாட்டின் சமீபத்திய ஆட்டங்கள் எதிர்பார்த்த அளவுக்கு இல்லாததால், அவரை அணியில் தொடர்ந்து வைத்திருக்க வேண்டுமா அல்லது வேறு வீரருக்கு வாய்ப்பு கொடுக்க வேண்டுமா என்ற கேள்வி எழுந்துள்ளது. அதிலும் ராஜஸ்தான் ராயல்ஸ் அணியில் இருந்து சஞ்சு சாம்சன் சென்னை அணிக்கு வந்துள்ளதால், கேப்டன் பொறுப்பிலும் மாற்றம் வருமா என்ற எதிர்பார்ப்பு ரசிகர்களிடம் அதிகரித்துள்ளது. இந்நிலையில், ருதுராஜை அணியில் இருந்து நீக்க வேண்டிய அவசியமே இல்லை என்று முன்னாள் இந்திய கேப்டன் கிருஷ்ணமாச்சாரி ஸ்ரீகாந்த் ஆதரவு தெரிவித்துள்ளார்.

ஐபிஎல் 2027 தொடருக்கான வீரர்கள் தக்கவைப்பு மற்றும் ஏலத் திட்டங்கள் குறித்து பல்வேறு அணிகளும் ஆலோசித்து வருகின்றன. சென்னை சூப்பர் கிங்ஸ் அணியும் தனது வீரர்களைத் தேர்வு செய்வதில் முக்கிய முடிவுகளை எடுக்க வேண்டிய சூழலில் உள்ளது. கடந்த சில சீசன்களாக சிஎஸ்கே அணியின் ஆட்டம் ரசிகர்கள் எதிர்பார்த்த அளவுக்கு அமையவில்லை. குறிப்பாக, கடந்த இரண்டு சீசன்களிலும் அணியின் செயல்பாடு குறித்து விமர்சனங்கள் எழுந்துள்ளன. இதனால் அணியில் பெரிய மாற்றங்கள் செய்யப்படலாம் என்றும் பேசப்பட்டு வருகிறது.

இந்தச் சூழலில் ருதுராஜ் கெய்க்வாட்டின் எதிர்காலம் குறித்துப் பேசியுள்ள முன்னாள் இந்திய கிரிக்கெட் அணியின் கேப்டன் ஸ்ரீகாந்த், அவரை இப்போதே அணியில் இருந்து வெளியேற்ற வேண்டிய அவசியம் இல்லை என்று தெரிவித்துள்ளார். தனது யூடியூப் சேனலில் இதுகுறித்துப் பேசிய அவர், ருதுராஜை ஏன் அணியில் இருந்து நீக்க வேண்டும்? அவரை நிச்சயமாகத் தக்கவைத்துக் கொள்ள வேண்டும் என்ற கருத்தை முன்வைத்துள்ளார்.

சஞ்சு சாம்சன் அணிக்கு வந்த பிறகு ருதுராஜின் முக்கியத்துவம் ஓரளவு குறைந்திருக்கலாம். ஆனால், கடந்த காலங்களில் சென்னை அணிக்காக அவர் சிறப்பாக விளையாடியுள்ளார். கடந்த இரண்டு ஆண்டுகளில் அவரது ஆட்டம் பெரிய அளவில் சிறப்பாக அமையவில்லை என்பது உண்மைதான். அதற்காக அவரை இப்போதே வெளியேற்றிவிடக் கூடாது. தற்போது அணியில் நிலைத்தன்மை இருப்பது முக்கியம். எனவே, ருதுராஜைத் தக்கவைத்துக் கொண்டு அடுத்த சீசனிலும் அவருக்கு வாய்ப்பு வழங்க வேண்டும் என்று ஸ்ரீகாந்த் தெரிவித்துள்ளார்.

கேப்டன் பொறுப்பிலும் ருதுராஜ் தொடர வேண்டும் என்பதே ஸ்ரீகாந்தின் நிலைப்பாடாக உள்ளது. சஞ்சு சாம்சனை உடனடியாக கேப்டனாக நியமிக்க வேண்டிய அவசியம் இல்லை என்றும் அவர் கூறியுள்ளார். சஞ்சு சாம்சன் சென்னை அணியில் இணைந்து ஒரு சீசன் மட்டுமே விளையாடியுள்ளார். ராஜஸ்தான் ராயல்ஸ் அணியின் கேப்டனாக இருந்தபோதும் அவர் பெரிய அளவில் நிலையான முடிவுகளைப் பெற்றுத் தரவில்லை என்பது ஸ்ரீகாந்தின் கருத்தாகும். எனவே, இப்போதே கேப்டன் பொறுப்பை மாற்றுவது சரியான முடிவாக இருக்காது என்று அவர் கருதுகிறார்.

ருதுராஜின் சமீபத்திய புள்ளிவிவரங்களைப் பார்த்தால், அவரது ஆட்டத்தில் சரிவு ஏற்பட்டிருப்பது தெரிகிறது. கடந்த இரண்டு ஐபிஎல் சீசன்களில் 19 போட்டிகளில் விளையாடிய அவர் மொத்தம் 459 ரன்கள் எடுத்துள்ளார். 2026 சீசனில் மட்டும் 14 போட்டிகளில் 337 ரன்கள் எடுத்தார். அதேசமயம் சிஎஸ்கே அணியில் இணைந்த சஞ்சு சாம்சன் 2026 சீசனில் 477 ரன்கள் குவித்திருந்தார். இதனால் இருவரையும் ஒப்பிட்டு ரசிகர்கள் தங்களது கருத்துகளைப் பகிர்ந்து வருகின்றனர். ருதுராஜின் முந்தைய சாதனைகளையும் மறந்துவிடக் கூடாது என்று ஸ்ரீகாந்த் சுட்டிக்காட்டியுள்ளார். 2021 முதல் 2024 வரையிலான காலகட்டத்தில் அவர் சென்னை அணிக்காக பல சிறப்பான ஆட்டங்களை வெளிப்படுத்தியுள்ளார். அந்தக் காலகட்டத்தில் சென்னை அணி இரண்டு முறை ஐபிஎல் கோப்பையை வென்றதிலும் அவரது பங்களிப்பு இருந்தது.

ஒரு சில சீசன்களின் ஆட்டத்தை மட்டும் வைத்து ருதுராஜின் திறமையை முடிவு செய்யக்கூடாது என்பதே ஸ்ரீகாந்தின் கருத்து. சஞ்சு சாம்சன் அணிக்கு வந்திருப்பது கூடுதல் பலமாக இருந்தாலும், அதற்காக ஏற்கெனவே அணிக்காகச் சிறப்பாகச் செயல்பட்ட வீரரை உடனடியாக நீக்க வேண்டியதில்லை என்றும் அவர் தெரிவித்துள்ளார். தற்போது சென்னை சூப்பர் கிங்ஸ் நிர்வாகத்தின் முன் இருக்கும் முக்கியமான கேள்வி, அணியின் பழைய வீரர்களைத் தக்கவைத்துக் கொண்டு புதிய வீரர்களுடன் அணியை எப்படிக் கட்டமைப்பது என்பதுதான். ருதுராஜ் கேப்டனாகத் தொடர்வாரா, சஞ்சு சாம்சனுக்கு வேறு முக்கியப் பொறுப்பு வழங்கப்படுமா என்ற எதிர்பார்ப்பு ரசிகர்களிடையே அதிகரித்துள்ளது. இதற்கான இறுதி முடிவு சிஎஸ்கே நிர்வாகத்தின் கையில்தான் உள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.