Match நடக்கவில்லை... ஆனாலும் பாகிஸ்தானுக்கு கோப்பையா? நடுவரின் கொண்டாட்டத்தால் வெடித்த புதிய சர்ச்சை!

பாகிஸ்தான் வீரர்களுடன் இணைந்து அந்த நடுவர் கொண்டாட்டத்தில் ஈடுபட்டதாகக் கூறப்படும் வீடியோ வெளியாகியுள்ளதால், அவரது நடுநிலைத் தன்மை குறித்து இந்திய பார்வையற்றோர் கிரிக்கெட் சங்கம் கேள்வி எழுப்பியுள்ளது.
Blind Cricket Asia Cup 2026
Blind Cricket Asia Cup 2026
Published on: 
Updated on: 
2 min read

பார்வையற்றோருக்கான ஆசியக் கோப்பை கிரிக்கெட் தொடரில் இந்தியா - பாகிஸ்தான் அணிகளுக்கு இடையிலான இறுதிப்போட்டி நடைபெறாமலேயே பாகிஸ்தான் அணி சாம்பியனாக அறிவிக்கப்பட்டது. இதற்கு எதிர்ப்பு தெரிவித்து இந்திய வீரர்கள் பரிசளிப்பு விழாவைப் புறக்கணித்த நிலையில், தற்போது பாகிஸ்தான் நடுவரின் செயல்பாடும் புதிய சர்ச்சையை ஏற்படுத்தியுள்ளது. பாகிஸ்தான் வீரர்களுடன் இணைந்து அந்த நடுவர் கொண்டாட்டத்தில் ஈடுபட்டதாகக் கூறப்படும் வீடியோ வெளியாகியுள்ளதால், அவரது நடுநிலைத் தன்மை குறித்து இந்திய பார்வையற்றோர் கிரிக்கெட் சங்கம் கேள்வி எழுப்பியுள்ளது.

வங்கதேச தலைநகர் டாக்காவில் 2026-ம் ஆண்டுக்கான பார்வையற்றோருக்கான ஆண்கள் ஆசியக் கோப்பை கிரிக்கெட் தொடர் நடைபெற்றது. இதில் இந்தியா, பாகிஸ்தான் உள்ளிட்ட அணிகள் பங்கேற்றன. நடப்பு சாம்பியனான இந்திய அணி இந்தத் தொடரிலும் சிறப்பாக விளையாடி இறுதிப்போட்டிக்கு முன்னேறியது. மறுபுறம் பாகிஸ்தான் அணியும் இறுதிப்போட்டிக்குத் தகுதி பெற்றது. இதனால் இந்தியா - பாகிஸ்தான் இடையே விறுவிறுப்பான இறுதிப்போட்டி நடைபெறும் என ரசிகர்கள் எதிர்பார்த்திருந்தனர்.

இறுதிப்போட்டி நடைபெறவிருந்த நாளில் தொடர்ந்து மழை பெய்ததால் ஆட்டத்தை நடத்த முடியாத நிலை ஏற்பட்டது. ஒரு பந்து கூட வீசப்படாமல் போட்டி கைவிடப்பட்டது. இதையடுத்து யாருக்கு சாம்பியன் பட்டம் வழங்குவது என்ற கேள்வி எழுந்தது. இந்தத் தொடரில் இரு அணிகளின் செயல்பாடுகள் மற்றும் நெட் ரன் ரேட் அடிப்படையில் பாகிஸ்தான் அணிக்கு கோப்பை வழங்கப்பட்டது. இதற்கு இந்திய அணி கடும் எதிர்ப்பு தெரிவித்தது. இறுதிப்போட்டியே நடைபெறாத நிலையில், நெட் ரன் ரேட் அடிப்படையில் ஒரு அணியை மட்டும் வெற்றியாளராக அறிவிப்பது சரியான முடிவு அல்ல என்பது இந்திய அணியின் வாதமாக இருந்தது. மேலும், இறுதிப்போட்டிக்கு மாற்று நாளும் அறிவிக்கப்படாததால் இரு அணிகளையும் கூட்டுச் சாம்பியன்களாக அறிவித்திருக்க வேண்டும் என்று இந்திய தரப்பில் வலியுறுத்தப்பட்டது.

இந்த விவகாரத்தில் உலக பார்வையற்றோர் கிரிக்கெட் கவுன்சிலின் (WBCC) தொழில்நுட்பக் குழு, இந்தியா மற்றும் பாகிஸ்தான் இரு அணிகளையும் கூட்டுச் சாம்பியன்களாக அறிவிக்கப் பரிந்துரைத்ததாகக் கூறப்படுகிறது. ஆனால், அந்த அமைப்பின் தலைவரும் பாகிஸ்தான் பார்வையற்றோர் கிரிக்கெட் கவுன்சிலின் தலைவருமான சுல்தான் ஷா, அந்தப் பரிந்துரையை ஏற்காமல் பாகிஸ்தானை வெற்றியாளராக அறிவிக்க நடவடிக்கை எடுத்ததாக இந்திய தரப்பில் குற்றம்சாட்டப்பட்டுள்ளது. இதையடுத்து போட்டி நடுவர் பாகிஸ்தான் அணியைச் சாம்பியனாக அறிவித்தார். இந்த முடிவுக்கு எதிர்ப்பு தெரிவிக்கும் வகையில் இந்திய வீரர்கள் கோப்பை வழங்கும் நிகழ்ச்சியில் பங்கேற்கவில்லை. இறுதிப்போட்டியில் விளையாடாமலேயே ஒரு அணி சாம்பியனாக அறிவிக்கப்பட்டது ஏமாற்றமளிப்பதாக இந்திய பார்வையற்றோர் கிரிக்கெட் சங்கத்தின் பொதுச் செயலாளர் ஷைலேந்திர யாதவ் தெரிவித்துள்ளார். தொழில்நுட்பக் குழுவின் பரிந்துரையைப் புறக்கணித்து பாகிஸ்தான் தன்னிச்சையாக வெற்றியாளராக அறிவிக்கப்பட்டதாகவும் அவர் குற்றம்சாட்டியுள்ளார்.

இந்தச் சர்ச்சை முடிவுக்கு வருவதற்குள் தற்போது நடுவரின் செயல்பாடு குறித்த புதிய புகார் எழுந்துள்ளது. போட்டிகள் முழுவதும் நடுவராகப் பணியாற்றிய பாகிஸ்தானைச் சேர்ந்த ஒருவர், பாகிஸ்தான் வீரர்களுடன் இணைந்து கொண்டாட்டத்தில் ஈடுபட்டதாகக் கூறப்படுகிறது. சமூக வலைதளங்களில் பரவி வரும் வீடியோவில், அவர் வீரர்களுடன் சேர்ந்து கைகளால் விமானம் விழுந்து நொறுங்குவது போன்ற சைகைகளைச் செய்வதாகத் தெரிகிறது. இந்தக் காட்சிதான் இந்திய தரப்பினரின் எதிர்ப்புக்குக் காரணமாகியுள்ளது. இதுதொடர்பாக இந்திய பார்வையற்றோர் கிரிக்கெட் சங்கம் வெளியிட்டுள்ள அறிக்கையில், சம்பந்தப்பட்ட பாகிஸ்தான் நடுவர் ஆசியக் கோப்பை முழுவதும் நடுவராகப் பணியாற்றியவர் என்றும், தற்போது பாகிஸ்தான் அணியுடன் இணைந்து கொண்டாடுவது ஏற்றுக்கொள்ள முடியாதது என்றும் தெரிவித்துள்ளது. ஒரு நடுவரின் முக்கியமான கடமை நடுநிலையுடன் செயல்படுவதுதான். எந்தவொரு அணிக்கும் ஆதரவாக இருப்பது போன்ற தோற்றத்தைக்கூட அவர் ஏற்படுத்தக் கூடாது என்றும் சங்கம் வலியுறுத்தியுள்ளது.

இந்த விவகாரம் குறித்து இந்திய பார்வையற்றோர் கிரிக்கெட் சங்கத்தின் பொதுச் செயலாளர் ஷைலேந்திர யாதவும் கடும் அதிருப்தி தெரிவித்துள்ளார். இறுதிப்போட்டியில் ஒரு பந்து கூட வீசப்படாத நிலையில் பாகிஸ்தான் வெற்றியாளராக அறிவிக்கப்பட்ட விதம் ஏமாற்றமளிப்பதாக அவர் கூறியுள்ளார். மேலும், இந்த விவகாரத்துக்குத் தீர்வு காணப்படாவிட்டால் எதிர்காலத்தில் பாகிஸ்தானுக்கு எதிரான போட்டிகளில் இந்திய அணி பங்கேற்பது குறித்து மறுபரிசீலனை செய்ய வேண்டியிருக்கும் என்றும் எச்சரித்துள்ளார்.

இந்தியாவுக்கும் பாகிஸ்தானுக்கும் இடையிலான கிரிக்கெட் போட்டிகள் எப்போதுமே ரசிகர்களின் கவனத்தை ஈர்ப்பவை. ஆனால், விளையாட்டுப் போட்டிகளில் வெற்றி, தோல்வியைத் தாண்டி நடுவர்களின் நடுநிலைத் தன்மையும் விளையாட்டு ஒழுக்கமும் மிகவும் முக்கியமானவை. குறிப்பாக, பார்வையற்ற வீரர்கள் பங்கேற்கும் சர்வதேசப் போட்டியில் போட்டி நடத்தும் அமைப்புகளின் முடிவுகளும் அதிகாரிகளின் செயல்பாடுகளும் நம்பகத்தன்மையுடன் இருக்க வேண்டும் என்பதே இந்திய தரப்பின் முக்கியக் கோரிக்கையாக உள்ளது. தற்போது கோப்பை வழங்கப்பட்ட விவகாரத்துடன் நடுவரின் கொண்டாட்டமும் இணைந்து புதிய சர்ச்சையாக மாறியுள்ளது. இந்தப் புகார் குறித்து சம்பந்தப்பட்ட சர்வதேச அமைப்புகள் என்ன நடவடிக்கை எடுக்கப் போகின்றன என்பதுதான் அடுத்தகட்ட எதிர்பார்ப்பாக உள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.