இந்தியாவை வீழ்த்திய பாகிஸ்தான்! பிரதமர் ஷெபாஸ் ஷெரீப்பின் பதிவால் வெடித்த சர்ச்சை...

இந்தியா - பாகிஸ்தான் கிரிக்கெட் போட்டி என்றாலே ரசிகர்களிடையே எப்போதும் தனி எதிர்பார்ப்பு இருக்கும். இரு அணிகளும் மோதும் ஒவ்வொரு போட்டியையும் ரசிகர்கள் ஆர்வத்துடன் கவனிப்பார்கள். அந்த வகையில், ஹாங்காங் சிக்சஸ் 2026 தொடரில் இந்திய அணியைப் பாகிஸ்தான் வீழ்த்தியது கிரிக்கெட் உலகில் பேசுபொருளாகியுள்ளது. ஆனால், இந்த வெற்றியை விட பாகிஸ்தான் பிரதமர் ஷெபாஸ் ஷெரீப் வெளியிட்ட சமூக வலைதளப் பதிவுதான் தற்போது அதிக விவாதத்தை ஏற்படுத்தியுள்ளது.

ஹாங்காங்கில் நடைபெற்ற இந்தத் தொடரின் குரூப் சி பிரிவு ஆட்டத்தில் இந்தியா – பாகிஸ்தான் அணிகள் மோதின. மிஷன் ரோடு மைதானத்தில் நடைபெற்ற இந்தப் போட்டி வழக்கமான ஒருநாள் அல்லது டி20 போட்டி கிடையாது. ஹாங்காங் சிக்சஸ் என்பது ஆறு வீரர்கள் கொண்ட அணிகள் பங்கேற்கும் போட்டியாகும். இதில் ஒவ்வொரு அணிக்கும் தலா ஆறு ஓவர்கள் மட்டுமே வழங்கப்படும். குறைந்த நேரத்தில் அதிக ரன்கள் குவிக்கும் வகையில் இந்தப் போட்டி நடத்தப்படுகிறது.

முதலில் பேட்டிங் செய்த இந்திய அணி, நிர்ணயிக்கப்பட்ட ஆறு ஓவர்களில் 5 விக்கெட் இழப்புக்கு 88 ரன்கள் எடுத்தது. இந்திய அணியில் ஷஷாங்க் சிங் அதிரடியாக விளையாடி வெறும் 11 பந்துகளில் 40 ரன்கள் குவித்தார். இதில் ஐந்து சிக்ஸர்களும் அடங்கும். நிதிஷ் ராணா 19 ரன்கள் எடுத்தார். டி. நடராஜன் ஆட்டமிழக்காமல் 12 ரன்கள் சேர்த்தார். இந்திய அணி ஓரளவுக்கு நல்ல ஸ்கோரைப் பதிவு செய்திருந்தாலும், பாகிஸ்தான் வீரர்களின் அதிரடி ஆட்டத்துக்கு முன்னால் அந்த இலக்கு போதுமானதாக அமையவில்லை.

89 ரன்கள் எடுத்தால் வெற்றி என்ற இலக்குடன் களமிறங்கிய பாகிஸ்தான் அணி, தொடக்கத்திலிருந்தே அதிரடியாக விளையாடியது. குறிப்பாக, கேப்டன் அப்பாஸ் அப்ரிடி இந்தியப் பந்துவீச்சைச் சிதறடித்தார். க்ருணால் பாண்டியா வீசிய ஓவரில் தொடர்ந்து ஐந்து சிக்ஸர்களை விளாசி ஆட்டத்தின் போக்கையே மாற்றினார். அவர் வெறும் 8 பந்துகளில் 35 ரன்கள் எடுத்தார். மறுபுறம், குவாஜா நஃபே 12 பந்துகளில் ஆட்டமிழக்காமல் 41 ரன்கள் குவித்தார். இருவரும் இணைந்து வெறும் 13 பந்துகளில் 59 ரன்கள் சேர்த்தனர்.

இதன் விளைவாக, பாகிஸ்தான் அணி 3.5 ஓவர்களிலேயே 91 ரன்கள் எடுத்து இலக்கை எட்டியது. நான்கு விக்கெட் வித்தியாசத்தில் வெற்றியும் பெற்றது. இந்திய அணியின் பந்துவீச்சாளர்களால் பாகிஸ்தானின் அதிரடியைக் கட்டுப்படுத்த முடியவில்லை. குறிப்பாக, மிகக் குறைந்த ஓவர்களில் இலக்கை எட்டியது ரசிகர்களின் கவனத்தை ஈர்த்தது. இந்த வெற்றியைத் தொடர்ந்து பாகிஸ்தான் பிரதமர் ஷெபாஸ் ஷெரீப் தனது எக்ஸ் சமூக வலைதளப் பக்கத்தில் அணிக்கு வாழ்த்து தெரிவித்தார். அதில், ஹாங்காங் சிக்சஸ் 2026 தொடரின் தொடக்கப் போட்டியில் இந்தியாவுக்கு எதிராக நான்கு விக்கெட் வித்தியாசத்தில் சிறப்பான வெற்றியைப் பெற்ற வீரர்களுக்கு வாழ்த்து தெரிவித்திருந்தார். மேலும், பாகிஸ்தான் கிரிக்கெட் வாரியத் தலைவர் மொஹ்சின் நக்வி மற்றும் அவரது குழுவினரின் முயற்சிகளையும் பாராட்டியிருந்தார்.

பிரதமரின் இந்தப் பதிவுக்குப் பிறகுதான் சமூக வலைதளங்களில் விவாதம் சூடுபிடித்தது. ஆறு ஓவர்கள் கொண்ட ஒரு போட்டியின் வெற்றிக்காக நாட்டின் பிரதமர் இவ்வளவு உற்சாகமாகப் பதிவிட வேண்டுமா என்று சிலர் கேள்வி எழுப்பினர். இன்னும் சிலர், உலகக் கோப்பையை வென்றதைப் போல இந்த வெற்றிக்குக் கொண்டாட்டம் தேவையா எனக் கிண்டல் செய்தனர். ஒரு பயனர், “இது உலகக் கோப்பை வெற்றியை விடப் பெரிய சாதனை போல இருக்கிறது” என்ற பொருளில் நையாண்டியாகப் பதிவிட்டார்.

மற்றொருவர் வெற்றியைக் கொண்டாடும் வகையில் தேசிய விடுமுறையே அறிவிக்கலாம் என்று கேலி செய்தார். ஷெபாஸ் ஷெரீப்பின் பதிவில் இடம்பெற்றிருந்த ஒரு தகவல் பிழையும் சுட்டிக்காட்டப்பட்டது. இந்தியாவுக்கு எதிரான போட்டியைப் பாகிஸ்தானின் தொடக்க ஆட்டம் என்று அவர் குறிப்பிட்டிருந்தார். ஆனால், அதற்கு முன்பே பாகிஸ்தான் அணி ஐக்கிய அரபு அமீரகத்துக்கு எதிராக விளையாடி ஒரு விக்கெட் வித்தியாசத்தில் தோல்வியடைந்திருந்தது. இதையும் சமூக வலைதளப் பயனர்கள் சுட்டிக்காட்டி விமர்சித்தனர்.

ஹாங்காங் சிக்சஸ் தொடர் என்பது வழக்கமான சர்வதேச கிரிக்கெட் போட்டிகளிலிருந்து மாறுபட்ட, வேகமான மற்றும் பொழுதுபோக்கு அம்சம் நிறைந்த ஒரு போட்டித் தொடராகும். இதில் கிடைக்கும் வெற்றியை உலகக் கோப்பை அல்லது ஆசியக் கோப்பை வெற்றியுடன் ஒப்பிட முடியாது. இருப்பினும், இந்தியா - பாகிஸ்தான் அணிகள் மோதும் போட்டி என்பதால் இந்த ஆட்டத்துக்கும் ரசிகர்கள் மத்தியில் எதிர்பார்ப்பு இருந்தது. ஒருபுறம் பாகிஸ்தான் அணியின் அதிரடி வெற்றி பேசப்பட்டாலும், மறுபுறம் பிரதமரின் வாழ்த்துப் பதிவு விமர்சனத்துக்கு உள்ளாகியுள்ளது. கிரிக்கெட் போட்டியின் முடிவைத் தாண்டி, ஒரு சிறிய தொடரின் வெற்றியை அரசியல் தலைவர்கள் கொண்டாடும் விதம் குறித்த விவாதத்தையும் இந்தச் சம்பவம் உருவாக்கியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்