.png)
ஐபிஎல் 2026 சீசனில் தொடர்ந்து இரண்டாவது தோல்வியைத் தழுவிய ராயல் சேலஞ்சர்ஸ் பெங்களூரு அணி, புள்ளிப் பட்டியலில் தற்போது மூன்றாவது இடத்திலேயே நீடிக்கிறது. ரஜத் படிதார் தலைமையிலான இந்த அணி, ஆரம்பத்தில் ஆடிய ஐந்து போட்டிகளில் நான்கில் வெற்றி பெற்று டாப் 2 இடத்தைப் பிடிக்கும் என்று எதிர்பார்க்கப்பட்டது. ஆனால், தற்போது சன்ரைசர்ஸ் ஹைதராபாத் மற்றும் பஞ்சாப் கிங்ஸ் அணிகள் முதல் இரண்டு இடங்களை ஆக்கிரமித்துள்ளதால், ஆர்சிபி-யின் நிலைமை சற்று சிக்கலாகியுள்ளது. இன்னும் நான்கு போட்டிகள் மீதமுள்ள நிலையில், பஞ்சாப் மற்றும் ஹைதராபாத் அணிகளுடன் பெங்களூரு மோத வேண்டியுள்ளது. இந்த முக்கிய போட்டிகளில் ஜெயித்தால் குவாலிஃபையர் 1-க்கு செல்லும் வாய்ப்பு ஆர்சிபி கையில் இருக்கும், இல்லையென்றால் டாப் 4 இடத்தைப் பிடிப்பதே பெரும் போராட்டமாக மாறிவிடும்.
ஆர்சிபி தனது மீதமுள்ள நான்கு போட்டிகளிலும் (மும்பை, கொல்கத்தா, பஞ்சாப் மற்றும் ஹைதராபாத் அணிகளுக்கு எதிராக) வெற்றி பெற்றால் மொத்தம் 20 புள்ளிகளைப் பெறும். இது அவர்களை நிச்சயம் முதல் இரண்டு இடங்களுக்குள் கொண்டு செல்லும். ஒருவேளை நான்கு போட்டிகளில் மூன்றில் மட்டும் வெற்றி பெற்றால் 18 புள்ளிகளுடன் லீக் சுற்றை முடிப்பார்கள். ஆர்சிபி-யின் நெட் ரன் ரேட் (NRR) தற்போது +1.234 என மிக வலுவாக இருப்பதால், மற்ற அணிகளும் 18 புள்ளிகளில் இருந்தால் பெங்களூருவுக்கு அது மிகப்பெரிய பிளஸ் பாயிண்டாக அமையும். குறிப்பாக ஹைதராபாத் அல்லது பஞ்சாப் அணிகளுக்கு எதிரான போட்டிகளில் வெற்றி பெறுவது அவர்களின் முன்னேற்றத்தைத் தடுக்கும் ஒரு முக்கிய வழியாக இருக்கும்.
ஒருவேளை ஆர்சிபி மீதமுள்ள நான்கு போட்டிகளில் இரண்டில் மட்டுமே வெற்றி பெற்று 16 புள்ளிகளுடன் இருந்தால், மற்ற அணிகளின் வெற்றி தோல்விகளைச் சார்ந்து இருக்க வேண்டிய கட்டாயம் ஏற்படும். அந்தச் சூழலில், ஹைதராபாத் அல்லது பஞ்சாப் அணிகள் தங்களின் மீதமுள்ள போட்டிகளில் பெரும்பாலானவற்றைத் தோற்க வேண்டும். அதேபோல் ராஜஸ்தான் மற்றும் குஜராத் அணிகள் 16 புள்ளிகளுக்கு மேல் செல்லாமல் இருக்க வேண்டும். ரன் ரேட் கைகொடுத்தாலும், அடுத்த இரண்டு போட்டிகளை வாழ்வா சாவா போராட்டமாக நினைத்து விளையாடினால் மட்டுமே ஆர்சிபி சிக்கலில்லாமல் பிளே-ஆப் சுற்றுக்குத் தகுதி பெற முடியும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
