தொடர் தோல்வியால் துவண்ட ரிஷப் பண்ட்! கோபக்கார உரிமையாளர் சஞ்சீவ் கோயங்கா செய்த 'அந்த' சம்பவம்!

ஐபிஎல் 2026 தொடரில் லக்னோ சூப்பர் ஜெயண்ட்ஸ் (LSG) அணி மிகப்பெரிய பின்னடைவைச் சந்தித்து வருகிறது. நேற்று லக்னோவில் நடைபெற்ற ராஜஸ்தான் ராயல்ஸ் அணிக்கு எதிரான போட்டியில் 40 ரன்கள் வித்தியாசத்தில் லக்னோ அணி படுதோல்வி அடைந்தது. இது இந்த சீசனில் அந்த அணி சந்திக்கும் தொடர்ச்சியான நான்காவது தோல்வியாகும். புள்ளிப் பட்டியலில் 9-வது இடத்திற்குத் தள்ளப்பட்டுள்ள லக்னோ அணி, பிளே-ஆஃப் சுற்றுக்கு முன்னேறுமா என்பதே இப்போது கேள்விக்குறியாகியுள்ளது. இந்த இக்கட்டான சூழலில், அணியின் உரிமையாளர் சஞ்சீவ் கோயங்கா கேப்டன் ரிஷப் பண்ட்டிடம் காட்டிய அன்பு மற்றும் ஆதரவு இப்போது சமூக வலைதளங்களில் வைரலாகி ரசிகர்களின் இதயங்களை வென்று வருகிறது.

போட்டி முடிந்த பிறகு மைதானத்தில் ரிஷப் பண்ட்டை சந்தித்த சஞ்சீவ் கோயங்கா, அவரிடம் நீண்ட நேரம் உரையாடினார். பொதுவாகத் தொடர் தோல்விகளின் போது உரிமையாளர்கள் அதிருப்தியில் இருப்பார்கள். ஆனால் கோயங்கா, பண்ட்டை கட்டிப்பிடித்து (Hug) தனது ஆதரவைத் தெரிவித்தார். அணியின் இந்தச் சோதனையான காலத்திலும் கேப்டனுக்குத் துணையாக அவர் நின்ற விதம், லக்னோ ரசிகர்கள் மத்தியில் நெகிழ்ச்சியை ஏற்படுத்தியுள்ளது. அணியின் உரிமையாளரே நம்பிக்கையூட்டும் வகையில் செயல்பட்டது, ரிஷப் பண்ட் மற்றும் ஒட்டுமொத்த லக்னோ வீரர்களுக்கும் ஒரு மிகப்பெரிய ஊக்க மருந்தாகப் பார்க்கப்படுகிறது.

இந்தத் தோல்வி குறித்துப் பேசிய கேப்டன் ரிஷப் பண்ட், அணியின் பேட்டிங் வரிசை சொதப்புவதே தோல்விகளுக்கு முக்கியக் காரணம் என்று வெளிப்படையாக ஒப்புக் கொண்டார். 160 ரன்கள் என்ற இலக்கைத் துரத்திய லக்னோ அணி, முகமது ஷமி, மொஹ்சின் கான் மற்றும் பிரின்ஸ் யாதவ் ஆகியோரின் சிறப்பான பந்துவீச்சால் ராஜஸ்தான் அணியைக் கட்டுப்படுத்திய போதும், பேட்டிங்கில் கோட்டை விட்டது. ரிஷப் பண்ட் ரன் ஏதும் எடுக்காமல் ஆட்டமிழந்தது அந்த அணிக்கு மிகப்பெரிய அடியாக அமைந்தது. மிட்செல் மார்ஷ் அதிரடியாக 55 ரன்கள் சேர்த்த போதிலும், மற்ற வீரர்கள் சோபிக்கத் தவறியதால் 18 ஓவர்களில் 119 ரன்களுக்கு லக்னோ அணி சுருண்டது.

தோல்விக்குப் பிறகு பேசிய பண்ட், "எங்கள் பேட்டிங் எங்களை ஏமாற்றிவிட்டது என்பதை மறைக்க முடியாது. ஒரு குழுவாக நாங்கள் மிகவும் ஏமாற்றமடைந்துள்ளோம். இதற்கான தீர்வை நாங்கள் வெளியே தேடாமல், அணிக்குள் தான் தேட வேண்டும். ஒரு பேட்டராக நானும் இன்னும் சிறப்பாகச் செயல்பட்டிருக்க வேண்டும். பந்துவீச்சாளர்கள் தங்களது வேலையைச் சரியாகச் செய்தனர், ஆனால் அவர்களுக்குப் பக்கபலமாக இருக்க வேண்டிய பேட்டிங் யூனிட் தோல்வியடைந்துவிட்டது. இதற்கு எந்தச் சாக்கும் சொல்ல முடியாது, நாங்கள் பொறுப்பேற்றுக் கொண்டு அடுத்த போட்டிகளில் மீண்டு வர வேண்டும்" என்று வருத்தத்துடன் தெரிவித்தார்.

தொடர் தோல்விகள் ஒரு பக்கம் இருந்தாலும், ரிஷப் பண்ட் இன்னும் நம்பிக்கையை இழக்கவில்லை. அணியிடம் திறமையான வீரர்கள் இருப்பதாகவும், நிச்சயம் ஒரு வலுவான கம்பேக் கொடுப்போம் என்றும் அவர் உறுதியாகக் கூறினார். "நிறைய நேர்மறையான விஷயங்களும் எங்களிடம் உள்ளன. இப்போதும் எங்களால் இந்தத் தொடரின் போக்கை மாற்ற முடியும் என்று நான் நம்புகிறேன். தோல்விகளில் இருந்து பாடம் கற்றுக் கொண்டு, மீண்டும் வெற்றிப் பாதைக்குத் திரும்புவதே எங்கள் இலக்கு" என்று பண்ட் நம்பிக்கையுடன் பேசினார்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்