ஒருநாள் தொடரில் புதிய சாதனை படைத்த ரோகித் சர்மா.. இங்கிலாந்திடம் வெற்றியை இழந்த இந்திய அணி!

இங்கிலாந்து சுற்றுப்பயணம் மேற்கொண்டுள்ள இந்திய அணி, மூன்று போட்டிகள் கொண்ட ஒருநாள் தொடரில் விளையாடி வந்தது. முதல் இரண்டு போட்டிகள் தலா ஒரு வெற்றியுடன் சமநிலையில் இருந்த நிலையில், லண்டனில் நடைபெற்ற கடைசி போட்டியில் இந்தியா 27 ரன்கள் வித்தியாசத்தில் தோல்வியடைந்தது. இதன் மூலம் 2-1 என்ற கணக்கில் இங்கிலாந்து தொடரையும் கோப்பையை கைப்பற்றி உள்ளது. லண்டன் லார்ட்ஸ் மைதானத்தில் நடைபெற்ற போட்டியில் டாஸ் வென்ற இங்கிலாந்து முதலில் பேட்டிங் தேர்வு செய்து விளையாடியது . தொடக்க வீரர்களான பென் டக்கெட் மற்றும் ஜேக்கப் பெத்தல் இந்திய பந்துவீச்சை ஆதிக்கம் செலுத்தி முதல் விக்கெட்டுக்கு 192 ரன்கள் சேர்த்தனர். 91 ரன்களில் பெத்தல் ஆட்டமிழந்தாலும், தொடர்ந்து அதிரடியாக விளையாடிய டக்கெட் 141 ரன்கள் குவித்து அணிக்கு வலுவான அடித்தளம் அமைத்தார்.

அவருடன் ஜோ ரூட் 74 ரன்களும், இறுதிக்கட்டத்தில் ஜோஸ் பட்லர் 13 பந்துகளில் 41 ரன்கள் விளாசியும் அசத்தினர். இதனால் 50 ஓவர்கள் முடிவில் இங்கிலாந்து 3 விக்கெட் இழப்புக்கு 387 ரன்கள் என்ற மலைப்போன்ற இலக்கை இந்தியாவுக்கு நிர்ணயித்தது. 388 ரன்கள் என்ற கடினமான இலக்கை துரத்திய இந்திய அணிக்கு ரோகித் சர்மா மற்றும் கேப்டன் சுப்மன் கில் அபாரமான தொடக்கத்தை கொடுத்தனர். முதல் விக்கெட்டுக்கு 147 ரன்கள் சேர்த்த நிலையில், 77 ரன்களில் சுப்மன் கில் வெளியேறினார். பின்னர் விராட் கோலியுடன் இணைந்த ரோகித் சர்மா அதிரடியாக விளையாடி, ஒருநாள் கிரிக்கெட்டில் தனது 34-வது சதத்தை பதிவு செய்தார்.

ரோகித் 138 ரன்களும், விராட் கோலி 74 ரன்களும் குவித்ததால் இந்தியா ஒரு கட்டத்தில் 38 ஓவர்களில் ஒரு விக்கெட் இழப்புக்கு 260 ரன்களுடன் வெற்றிப் பாதையில் இருந்த நிலையில், ரோகித் ஆட்டமிழந்தது இந்தியாவுக்கு பின்னடைவாக அமைந்தது. அடுத்தடுத்து இஷான் கிஷன் (14), ஷ்ரேயஸ் ஐயர் (0), கே.எல்.ராகுல் (12), அக்சர் படேல் (2) என மிடில் ஆர்டர் பேட்ஸ்மேன்கள் சொற்ப ரன்களில் வெளியேறியதால் இந்திய அணி நெருக்கடிக்குள் சிக்கியது. இறுதியில் 50 ஓவர்களில் 7 விக்கெட் இழப்புக்கு 360 ரன்கள் மட்டுமே எடுத்த இந்தியா, 27 ரன்கள் வித்தியாசத்தில் தோல்வியை சந்தித்தது. இங்கிலாந்து தரப்பில் சாம் கர்ரான் 4 விக்கெட்டுகளை கைப்பற்றி வெற்றிக்கு முக்கிய காரணமாக அமைந்தார். ஏற்கனவே டி20 தொடரை இழந்திருந்த இந்திய அணி, தற்போது ஒருநாள் தொடரையும் 2-1 என்ற கணக்கில் இழந்துள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.