சர்வதேச கிரிக்கெட் போட்டியிலிருந்து அஸ்வின் ஓய்வு

இந்திய கிரிக்கெட் அணியில் சிறந்த பேட்ஸ்மேன் என்ற வரிசையில் கபில்தேவ், சச்சின் டெண்டுல்கர், மகேந்திரசிங் தோனி என இமாலயங்கள் இருந்த நிலையில், பந்து வீச்சைப் பொறுத்தவரை அனில்கும்ளே, கபில்தேவ், ரவிந்திர ஜடேஜா, ஹர்பஜன் சிங் இவர்களின் பட்டியலில் ரவி அஷ்வினின் பெயரும் நிச்சயம் உண்டு.

2009-ம் ஆண்டு நடந்த ஐபிஎல் போட்டியே அஷ்வினின் கிரிக்கெட் வரலாற்றில் மறக்க முடியாத திருப்புமுனையை ஏற்படுத்தியது. பெரிதளவில் அப்போது வாய்ப்பு வழங்கப்படவில்லை என்றாலும் கூட, அந்த போட்டியில் 13 விக்கெட்டுகளை வீழ்த்தி இந்திய கிரிக்கெட் வாரியத்தின் பாராட்டுக்களை பெற்றார் அஸ்வின்.

2010-ல் இந்தியா - இலங்கை இடையே நடந்த சர்வதேச போட்டியில் அஷ்வின் இந்திய அணியில் முதல் முறையாக இடம்பிடித்து வெற்றிச் சரித்தரத்திரத்தை எழுதத் தொடங்கினார். அன்றைய சூழலில் அணியில் இருந்த பந்துவீச்சாளர்களில் அனில் கும்ளே ஓய்வு பெற்றது மற்றும் ஹர்பஜன் சிங்கின் சில சரிவுகள் போன்ற காரணங்கள் அஸ்வினுக்கு அதிக வாய்ப்பை ஏற்படுத்தி கொடுத்தது.

இதைத் தொடர்ந்து ஆசிய கோப்பை உள்ளிட்ட தொடர்களில் பங்கேற்ற அஷ்வின், கிரிக்கெட்டில் நுழைந்த குறுகிய காலத்திலேயே உலகக்கோப்பை போட்டியிலும் பங்கேற்று உலக அரங்கில் இந்திய அணியின் பெருமைக்கு காரணமானார்.

உலகக்கோப்பை போட்டிக்கு பிறகு டெஸ்ட் போட்டியிலேயே கவனத்தை செலுத்தியவர், ஒவ்வொரு வாய்ப்பையும் தவற விடாமல் அதிரடி ஆட்டக்காரராக தன்னை நிரூபித்தார். முதல் டெஸ்ட் தொடரில் 9 விக்கெட்டுகளை வீழ்த்திய அஸ்வினுக்கு ஆட்டநாயகன் விருது கிடைத்தது.

ஐபிஎல் போட்டியில் சென்னை சூப்பர் கிங்ஸ் அணியில் மகேந்திரசிங் தோனிக்கு பக்கபலமாக, கேப்டனின் எண்ணவோட்டத்தை சரியே புரிந்து கொண்டு விளையாடுபவராக அஸ்வின் திகழ்ந்தார். அதே நேரம் பந்துவீச்சில் சிறந்தவராக திகழ்வதற்கு தோனிதான் காரணம் என புகழாரமும் சூட்டினார்.

கிடைத்த ஒவ்வொரு வாய்ப்பையைம் பயன்படுத்தி உச்சத்தை நோக்கி பயணித்த அஷ்வினுக்கு 2014-ம் ஆண்டு சறுக்கல்களை கொடுத்த ஆண்டாக அமைந்தது. 10 போட்டிகளில் பெஞ்ச் செய்யப்பட்டு பின்னடைவை சந்தித்தவர், கடுமையான பயிற்சியின் மூலம் மீண்டும் முதலில் இருந்து தொடங்கினார்.