“உங்களுடைய அம்மா இறந்துவிட்டார்... உங்களுக்கு வேறு ஒரு அம்மாவைத் தேடித் தருகிறேன்” என்று தனது இரண்டு மகள்களிடம் கூறிய தந்தை, அவர்களின் தாயைக் கொலை செய்துவிட்டு காவல் நிலையத்தில் சரணடைந்த சம்பவம் அதிர்ச்சியை ஏற்படுத்தியுள்ளது. 55 வயதான ஓய்வுபெற்ற ரயில்வே ஊழியர், தன்னைவிட 27 வயது குறைவான தனது மனைவியைக் கொலை செய்ததாகக் குற்றம்சாட்டப்பட்டுள்ளது. குடும்பப் பிரச்சினை, சந்தேகம் மற்றும் நீண்டகால குடும்ப வன்முறை குறித்த புகார்கள் இந்தச் சம்பவத்தில் பல கேள்விகளை எழுப்பியுள்ளன.
இந்தச் சம்பவம் பீகார் மாநிலத்தின் முங்கர் மாவட்டத்தில் உள்ள ஜமால்பூர் நகரில் நடைபெற்றுள்ளது. அங்குள்ள சதர் பஜார் பகுதிக்கு அருகே வாடகை வீட்டில் வசித்து வந்தவர் 55 வயதான ஓய்வுபெற்ற ரயில்வே லோகோ பைலட். இவருடைய மனைவி பூஜா தேவி, வயது 28. இந்தத் தம்பதிக்கு 8 வயது மற்றும் 5 வயதில் இரண்டு பெண் குழந்தைகள் உள்ளனர். கடந்த புதன்கிழமை இரவு வீட்டில் இருந்தபோது கணவன், மனைவிக்கு இடையே பிரச்சினை ஏற்பட்டதாகக் கூறப்படுகிறது. இதையடுத்து, தனது இரண்டு மகள்களையும் தனி அறையில் அடைத்து வைத்துவிட்டு, மனைவி பூஜா தேவியை அவர் தாக்கியதாக முதற்கட்ட விசாரணையில் தெரியவந்துள்ளது. இந்தச் சம்பவத்தில் பூஜா தேவி உயிரிழந்தார். பின்னர், அவர் இருந்த அறையைப் பூட்டியதுடன், உடலை ஒரு துணியால் மூடியதாகவும் காவல்துறையினர் தெரிவித்துள்ளனர்.
மனைவி உயிரிழந்ததைத் தொடர்ந்து, தனது இரண்டு மகள்களையும் அழைத்துக்கொண்டு அந்த நபர் நேரடியாகக் காவல் நிலையத்திற்குச் சென்றுள்ளார். அங்கு தனது மகள்களுடன் சரணடைந்த அவர், அவர்களிடம் தங்களுடைய தாய் இறந்துவிட்டதாகவும், வேறு ஒரு தாயைத் தேடித் தருவதாகவும் கூறியுள்ளார். இந்த வார்த்தைகள் சம்பவத்தின் கொடூரத்தை மேலும் உணர்த்தும் வகையில் அமைந்துள்ளன. காவல்துறையினர் சம்பவ இடத்திற்குச் சென்று ஆய்வு செய்தனர். வீட்டில் இருந்து கொலைக்குப் பயன்படுத்தப்பட்டதாகச் சந்தேகிக்கப்படும் ஆயுதத்தையும் மீட்டுள்ளனர். பூஜா தேவியின் உடலைக் கைப்பற்றி பிரேதப் பரிசோதனைக்காக அனுப்பி வைத்தனர். இந்தச் சம்பவம் தொடர்பாக அந்த நபரைக் கைது செய்து விசாரணை மேற்கொண்டு வருகின்றனர்.
கொலைக்கான காரணம் குறித்து காவல்துறையினர் பல்வேறு கோணங்களில் விசாரணை நடத்தி வருகின்றனர். மனைவிக்கு வேறொருவருடன் தொடர்பு இருப்பதாகக் கணவர் சந்தேகப்பட்டதே கொலைக்குக் காரணமாக இருக்கலாம் என்று முதற்கட்ட விசாரணையில் சந்தேகிக்கப்படுகிறது. இருப்பினும், இதுவரை அந்தக் காரணம் உறுதிப்படுத்தப்படவில்லை என்றும், அனைத்து கோணங்களிலும் விசாரணை நடைபெற்று வருவதாகவும் காவல்துறையினர் தெரிவித்துள்ளனர்.
உயிரிழந்த பூஜா தேவியின் குடும்பத்தினர் வேறுவிதமான குற்றச்சாட்டுகளை முன்வைத்துள்ளனர். பூஜா பல ஆண்டுகளாகக் கணவர் மற்றும் அவரது உறவினர்களால் குடும்ப வன்முறைக்கு ஆளாகி வந்ததாக அவரது சகோதரர் சுபம் தெரிவித்துள்ளார். சுமார் ஐந்து ஆண்டுகளாக அவரைத் துன்புறுத்தியதுடன், தாக்குதலும் நடத்தியதாகக் குற்றம்சாட்டியுள்ளார். கணவன், மனைவிக்கு இடையே 27 வயது வித்தியாசம் இருந்ததால், கணவர் அடிக்கடி பூஜாவின் நடத்தையைச் சந்தேகித்து கேள்வி எழுப்பி வந்ததாகவும் அவர் கூறியுள்ளார்.
சம்பவம் நடப்பதற்கு இரண்டு நாட்களுக்கு முன்புதான் பூஜாவிடம் பேசியதாகவும், அப்போது குடும்பத்தில் பெரிய பிரச்சினை இருப்பதாக அவர் எதுவும் தெரிவிக்கவில்லை என்றும் அவரது சகோதரர் கூறியுள்ளார். புதன்கிழமை இரவு காவல்துறையினர் தொடர்புகொண்ட பிறகுதான் பூஜா கொலை செய்யப்பட்ட தகவல் குடும்பத்தினருக்குத் தெரியவந்துள்ளது. பூஜா தேவி பாகல்பூரில் உள்ள இஷாக்சக் பகுதியைச் சேர்ந்தவர். கடந்த 2015-ம் ஆண்டு இந்த நபரைத் திருமணம் செய்துகொண்டார். திருமணத்திற்குப் பிறகு இரண்டு பெண் குழந்தைகள் பிறந்த நிலையில், குடும்பத்துடன் ஜமால்பூரில் வாடகை வீட்டில் வசித்து வந்துள்ளார்.
இந்த வழக்கில் கணவரின் சந்தேகம் மட்டுமே கொலைக்கான காரணமா அல்லது குடும்பத்தில் நீண்டகாலமாக வேறு பிரச்சினைகள் இருந்தனவா என்பது குறித்து விசாரணை தொடர்ந்து நடைபெற்று வருகிறது. இதுகுறித்து ஜமால்பூர் காவல் நிலையப் பொறுப்பாளர் பங்கஜ் குமார் கூறுகையில், கொலைக்கான காரணம் மற்றும் சம்பவத்தின் பின்னணி குறித்து விசாரணை நடத்தப்பட்டு வருவதாகத் தெரிவித்தார். உயிரிழந்த பெண்ணின் குடும்பத்தினர் அளிக்கும் புகாரின் அடிப்படையில் வழக்குப் பதிவு செய்து அடுத்தகட்ட சட்ட நடவடிக்கைகள் மேற்கொள்ளப்படும் என்றும் கூறியுள்ளார். தாயை இழந்த இரண்டு சிறுமிகளின் எதிர்காலம் தற்போது கேள்விக்குறியாகியுள்ளது. குடும்பத்திற்குள் ஏற்பட்ட பிரச்சினை ஒரு பெண்ணின் உயிரைப் பறித்ததுடன், தாயையும் தந்தையையும் ஒரே நேரத்தில் இழக்கும் சூழலுக்கு அந்தக் குழந்தைகளைத் தள்ளியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.