சினிமாவில் மட்டுமே பார்க்க முடியும் என்று நினைத்த சில திருட்டுத் திட்டங்கள், சில நேரங்களில் நிஜ வாழ்க்கையிலும் அரங்கேறுகின்றன. மிகுந்த திட்டமிடல், போலி பொருட்கள், கவனத்தைத் திசைதிருப்பும் யுக்திகள் மற்றும் தப்பிச் செல்லும் முயற்சி என அனைத்தும் இணைந்த ஒரு வைரத் திருட்டு சம்பவம் தற்போது உலகம் முழுவதும் பரபரப்பை ஏற்படுத்தியுள்ளது. சிங்கப்பூரின் புகழ்பெற்ற சைனாடவுன் பகுதியில் உள்ள நகைக்கடையில், சுமார் 1.54 லட்சம் அமெரிக்க டாலர் (சுமார் ரூ.1.3 கோடி) மதிப்புள்ள உண்மையான வைரத்தை, அதேபோல் தோற்றமளிக்கும் போலி வைரத்துடன் மாற்றி திருட முயன்ற இரண்டு இந்தியர்களில் ஒருவருக்கு அந்நாட்டு நீதிமன்றம் 2 ஆண்டுகள், 2 மாதங்கள் மற்றும் 2 வாரங்கள் சிறைத் தண்டனை விதித்துள்ளது. இந்த வழக்கின் விவரங்கள் தற்போது சர்வதேச அளவில் பெரும் கவனத்தைப் பெற்றுள்ளன.
இந்த வழக்கில் தண்டனை பெற்றவர் மங்க்ரோலியா மனோஜ்குமார் குர்ஜிபாய் (41). அவருடன் தொடர்புடையதாகக் கூறப்படும் மற்றொரு இந்தியரான செராசியா மிலன் ராம்னிக்பாய் (30) மீதான வழக்கு தனியாக நடைபெற்று வருகிறது. இருவரும் சிங்கப்பூருக்கு சுற்றுலா அனுமதிச் சீட்டில் (Social Visit Pass) வந்திருந்ததாக விசாரணையில் தெரியவந்துள்ளது. இந்தச் சம்பவத்தில் மிகவும் அதிர்ச்சியூட்டிய விஷயம், திருட்டைச் செயல்படுத்த பயன்படுத்தப்பட்ட யுக்திதான். இது திடீரென எடுக்கப்பட்ட முடிவு அல்ல. பல வாரங்களுக்கு முன்பே திட்டமிடப்பட்ட நடவடிக்கையாக இருந்ததாக நீதிமன்றத்தில் தெரிவிக்கப்பட்டுள்ளது. விசாரணை ஆவணங்களின்படி, சிங்கப்பூருக்கு வருவதற்கு முன்பே அவர்கள் இந்தியாவின் சூரத் நகரில், திருடத் திட்டமிட்டிருந்த உண்மையான வைரத்தைப் போலவே தோற்றமளிக்கும் ஒரு போலி வைரத்தை தயாரிக்க ஏற்பாடு செய்திருந்தனர். அதில், அந்த வைரத்தின் அளவு, வடிவம் மட்டுமல்லாமல், அடையாள விவரங்களும் பொருந்துமாறு தயாரிக்கப்பட்டதாகக் கூறப்படுகிறது. அந்த குறிப்பிட்ட வைரத்தின் விவரங்கள் எவ்வாறு அவர்களுக்கு கிடைத்தன என்பது குறித்து நீதிமன்ற ஆவணங்களில் தெளிவாக குறிப்பிடப்படவில்லை.
ஜூன் 19ஆம் தேதி இருவரும் சிங்கப்பூருக்கு வந்தனர். அதே நாளில் சைனாடவுனில் உள்ள Dianoche என்ற நகைக்கடைக்குச் சென்று, அங்கிருந்த சுமார் 4.95 காரட் எடையுடைய உயர்தர வைரத்தைப் பார்க்க வேண்டும் என்று கேட்டனர். அதன்பிறகு அவர்களின் திட்டம் துல்லியமாக செயல்படத் தொடங்கியது. ஒருவர் கடை விற்பனை மேலாளரிடம் தொடர்ந்து பல்வேறு நகைகளை காட்டுமாறு கேட்டு, அவரின் கவனத்தை வேறு பக்கம் திருப்பினார். அந்த நேரத்தில் மற்றொருவர், முன்கூட்டியே தனது வாய்க்குள் மறைத்து வைத்திருந்த போலி வைரத்தை வெளியே எடுத்து, உண்மையான வைரத்துடன் மாற்றினார். பின்னர் உண்மையான வைரத்தை தனது வாயில் மறைத்துக்கொண்டு, இருவரும் எந்த சந்தேகமும் ஏற்படாத வகையில் அமைதியாக கடையை விட்டு வெளியேறினர்.
ஆனால், இந்தத் திட்டம் முழுமையாக வெற்றி பெறவில்லை. வாடிக்கையாளர்கள் வெளியேறிய பிறகு, கடை மேலாளருக்கு சந்தேகம் ஏற்பட்டது. உடனடியாக அவர் வைரத்தை நவீன Optical Gemstone Identification Machine மூலம் பரிசோதித்தபோது, அது உண்மையான வைரம் அல்ல என்பது தெரியவந்தது. இதையடுத்து உடனடியாக போலீசாருக்கு தகவல் தெரிவிக்கப்பட்டது. கடையில் பொருத்தப்பட்டிருந்த CCTV காட்சிகள் முழு சம்பவத்தையும் பதிவு செய்திருந்ததால், சந்தேகநபர்களை அடையாளம் காண போலீசாருக்கு சிரமம் ஏற்படவில்லை. இதற்கிடையில், இருவரும் தாங்கள் தங்கியிருந்த ஹோட்டலுக்குத் திரும்பி, முன்கூட்டியே திட்டமிட்டபடி அறையை காலி செய்து, அதே மாலை இந்தியா திரும்பும் விமானத்திற்கு முன்பதிவு செய்திருந்தனர்.
ஆனால் சிங்கப்பூர் போலீசார் மிக வேகமாக நடவடிக்கை எடுத்தனர். இரவு சுமார் 8.50 மணியளவில், இருவரும் சாங்கி சர்வதேச விமான நிலையத்தின் டெர்மினல்-3 பகுதியில் குடியுரிமை சோதனையை (Immigration) கடக்க முயன்றபோது கைது செய்யப்பட்டனர். போலீசார் மேற்கொண்ட சோதனையில், திருடப்பட்ட உண்மையான வைரம் மீட்கப்பட்டது. இதன் மூலம் பல கோடி ரூபாய் மதிப்புள்ள திருட்டு முயற்சி சில மணி நேரங்களிலேயே முறியடிக்கப்பட்டது. இந்த வழக்கை விசாரித்த நீதிமன்றம், இது சாதாரண திருட்டு அல்ல என்றும், மிகவும் திட்டமிட்டு மேற்கொள்ளப்பட்ட சர்வதேச குற்ற முயற்சி என்றும் குறிப்பிட்டது. குறிப்பாக, குற்றத்தைச் செய்வதற்காகவே வேறு நாட்டுக்கு பயணம் செய்திருப்பது, போலி வைரத்தை முன்கூட்டியே தயாரித்திருப்பது, கவனத்தைத் திசைதிருப்பும் திட்டத்தைப் பயன்படுத்தியிருப்பது போன்ற அம்சங்கள் கடுமையான சூழ்நிலைகளாக கருதப்பட்டன. அதன் அடிப்படையில்தான் மனோஜ்குமாருக்கு இரண்டு ஆண்டுகளுக்கும் அதிகமான சிறைத் தண்டனை விதிக்கப்பட்டது.
இந்தச் சம்பவம் உலகம் முழுவதும் உள்ள உயர்தர நகைக்கடைகளுக்கும் ஒரு எச்சரிக்கையாக மாறியுள்ளது. வாடிக்கையாளர்களுக்கு மதிப்புமிக்க வைரங்கள் மற்றும் ரத்தினங்களை காட்டும் போது, ஒரே ஊழியர் மட்டுமே கவனிப்பது போதுமான பாதுகாப்பாக இருக்காது என்பதையும், பல அடுக்குகள் கொண்ட பாதுகாப்பு நடைமுறைகள் அவசியம் என்பதையும் இந்த வழக்கு நினைவூட்டியுள்ளது. பாதுகாப்புத் துறையினர் கூறுவதாவது, தற்போது தொழில்நுட்ப வசதிகள் அதிகரித்துள்ளதால், போலி வைரங்கள் கூட உண்மையானவற்றைப் போலவே தோற்றமளிக்கின்றன. எனவே, கண்ணால் பார்ப்பதற்குப் பதிலாக, ஒவ்வொரு பரிவர்த்தனைக்கும் முன்பும் பின்னரும் நவீன பரிசோதனை கருவிகளை பயன்படுத்துவது மிகவும் முக்கியம்.
இந்த வழக்கு இன்னொரு முக்கியமான உண்மையையும் வெளிப்படுத்தியுள்ளது. உலகின் பாதுகாப்பான நாடுகளில் ஒன்றாகக் கருதப்படும் சிங்கப்பூரில், மிகத் திட்டமிட்டு செய்யப்பட்ட குற்றம் கூட சில மணி நேரங்களுக்குள் கண்டுபிடிக்கப்பட்டு, குற்றவாளிகள் நாட்டை விட்டு வெளியேறும் முன்பே கைது செய்யப்பட்டுள்ளனர். இது அந்நாட்டு கண்காணிப்பு அமைப்பு, CCTV வலையமைப்பு மற்றும் காவல்துறையின் விரைவான செயல்பாட்டை வெளிப்படுத்துவதாக பலர் கருத்து தெரிவிக்கின்றனர். ஒரு போலி வைரத்தை வைத்து கோடிக்கணக்கான மதிப்புள்ள உண்மையான வைரத்தை திருடலாம் என்று நினைத்த திட்டம், இறுதியில் சட்டத்தின் முன் தோல்வியடைந்தது. குற்றத்தை எவ்வளவு புத்திசாலித்தனமாக திட்டமிட்டாலும், தொழில்நுட்பமும் விழிப்புணர்வும் இணைந்தால் உண்மையை மறைக்க முடியாது என்பதற்கு இந்த சிங்கப்பூர் சம்பவம் மிகப்பெரிய எடுத்துக்காட்டாக அமைந்துள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.