ஆப்பு வைத்த ஆஸ்கர் குழு! பாயல் கபாடியா போன்ற இயக்குநர்களுக்கு இனி கொண்டாட்டம்தான்!

ஆஸ்கர் விருதுகளை வழங்கும் அகாடமி ஆஃப் மோஷன் பிக்சர் ஆர்ட்ஸ் அண்ட் சயின்ஸ் அமைப்பு, 2027 ஆம் ஆண்டுக்கான விருதுகளில் பல அதிரடி மாற்றங்களை அறிவித்துள்ளது. இதில் மிக முக்கியமாக, 'சிறந்த சர்வதேசத் திரைப்படம்' (Best International Feature Film) பிரிவில் பல ஆண்டுகளாகப் பின்பற்றி வந்த ஒரு விதியை ஆஸ்கர் குழு மாற்றி அமைத்துள்ளது. இதுவரை ஒவ்வொரு நாடும் ஒரு படத்தை மட்டுமே அதிகாரப்பூர்வமாகத் தேர்வு செய்து ஆஸ்கருக்கு அனுப்ப முடியும் என்ற நிலை இருந்தது. ஆனால் இனிமேல், கேன்ஸ், வெனிஸ், பெர்லின், டொராண்டோ, பூசன் மற்றும் சண்டான்ஸ் போன்ற சர்வதேசத் திரைப்பட விழாக்களில் முக்கிய விருதுகளை வெல்லும் படங்கள், அந்தந்த நாடுகளின் பரிந்துரை இல்லாமலேயே நேரடியாக ஆஸ்கர் விருதுக்குப் போட்டியிடத் தகுதி பெறும் என்று அறிவிக்கப்பட்டுள்ளது.

இந்த அதிரடி மாற்றம் இந்தியா போன்ற நாடுகளுக்கு ஒரு மிகப்பெரிய வரப்பிரசாதமாகப் பார்க்கப்படுகிறது. இந்தியாவில் ஒவ்வொரு ஆண்டும் ஆஸ்கருக்குப் படங்களைத் தேர்வு செய்யும் போது பலத்த சர்ச்சைகள் எழுவது வழக்கம். இந்தியத் திரைப்பட சம்மேளனம் (FFI) எடுக்கும் முடிவுகள் பல நேரங்களில் விமர்சனத்துக்கு உள்ளாகி இருக்கின்றன. உதாரணமாக, 2024 ஆம் ஆண்டு கேன்ஸ் திரைப்பட விழாவில் 'கிராண்ட் பிரிக்ஸ்' விருதை வென்ற பாயல் கபாடியாவின் 'ஆல் வி இமேஜின் அஸ் லைட்' (All We Imagine As Light) திரைப்படம் ஆஸ்கருக்குப் போகும் என்று அனைவரும் எதிர்பார்த்தனர். ஆனால் இந்தியக் குழு கிரண் ராவின் 'லாபதா லேடீஸ்' (Laapataa Ladies) படத்தை அனுப்பியது. அந்தப் படம் ஆஸ்கர் பட்டியலிலிருந்து வெளியேறிய நிலையில், ஆஸ்கரின் புதிய விதிமுறை மட்டும் இருந்திருந்தால் பாயல் கபாடியாவின் படம் நேரடியாகவே போட்டிக்குச் சென்றிருக்கும்.

இதே போன்ற ஒரு சர்ச்சை கடந்த 2013 ஆம் ஆண்டும் வெடித்தது. உலகம் முழுவதும் பாராட்டுகளைப் பெற்ற ரித்தேஷ் பத்ராவின் 'தி லஞ்ச்பாக்ஸ்' (The Lunchbox) திரைப்படத்தை ஓரம் தள்ளிவிட்டு, 'தி குட் ரோடு' (The Good Road) என்ற படத்தை இந்தியா பரிந்துரை செய்தது. அப்போது இயக்குநர் அனுராக் காஷ்யப் போன்றவர்கள் இந்தியத் தேர்வுக் குழுவின் புரிதல் குறித்துப் பகிரங்கமாகப் புகார்களைத் தெரிவித்தனர். கடந்த காலங்களில் கல்லி பாய், ஏக்லவ்யா, பர்பி போன்ற படங்கள் அனுப்பப்பட்ட போதும் இதே போன்ற விவாதங்கள் கிளம்பின. இனிமேல் இதுபோன்ற உள்நாட்டு அரசியல் மற்றும் தேர்வுக் குழுவின் பிடிவாதங்களால் தரமான படங்கள் ஆஸ்கர் வாய்ப்பைத் தவறவிடாது என்பது நிம்மதியான விஷயம்.

இந்தியாவைப் பொறுத்தவரை ஆஸ்கர் மேடையில் 'நாட்டு நாட்டு' பாடல் மற்றும் 'தி எலிபெண்ட் விஸ்பரர்ஸ்' ஆவணப்படம் மூலம் சமீபத்தில் பெரிய சாதனைகளைப் படைத்துள்ளது. வரலாற்று ரீதியாகப் பார்த்தால் சத்யஜித் ரேயின் கௌரவ விருது, பானு அதையாவின் ஆடை வடிவமைப்பு விருது எனச் சில மைல்கற்களை நாம் எட்டியுள்ளோம். இருப்பினும், சிறந்த சர்வதேசத் திரைப்படப் பிரிவில் இதுவரை 'மதர் இந்தியா', 'லகான்' மற்றும் 'சலாம் பாம்பே' ஆகிய மூன்று படங்கள் மட்டுமே இறுதிப் பட்டியல் வரை சென்றுள்ளன. கடந்த ஆண்டு நீரஜ் கெய்வானின் 'ஹோம் பவுண்ட்' (Homebound) படம் குறுகிய பட்டியல் வரை வந்தாலும் இறுதி இடத்தைப் பிடிக்கவில்லை.

ஆஸ்கர் குழுவின் இந்த புதிய முடிவு, திறமையான இளம் இயக்குநர்களுக்கும் சர்வதேச அளவில் கவனம் ஈர்க்கும் இந்தியப் படங்களுக்கும் ஒரு பெரிய கதவைத் திறந்துவிட்டுள்ளது. இனி இந்தியத் தேர்வுக் குழுவின் தயவு இல்லாமலேயே, சர்வதேசத் திரைப்பட விழாக்களில் வெற்றி பெறும் படங்கள் நேராக ஆஸ்கர் மேடையில் மின்ன முடியும். இது இந்திய சினிமாவில் ஒரு ஆரோக்கியமான போட்டியை உருவாக்கும் என்று எதிர்பார்க்கப்படுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்