ஜெயிலர் 2 படத்தின் மூலம் கிட்டத்தட்ட 3 தசாப்தங்களுக்குப் பிறகு ரஜினிகாந்த் மற்றும் மிதுன் சக்கரவர்த்தி இணைந்து நடித்துள்ளனர்.
ரஜினிக்கு வில்லனாக மிதுன் சக்கரவர்த்தி நடிக்க உள்ளார். இந்தப் பாத்திரத்தில் நடிக்க அவர் சில நிபந்தனைகள் விதித்ததாக ரஜினிகாந்த் பேசியுள்ளார்.
அந்த நிகழ்ச்சியில் ஆற்றிய தனது உரையில், மிதுன் எப்படி இப்படத்தில் இணைந்தார் என்பது குறித்து ரஜினிகாந்த் பேசுகையில், “வில்லனாக நடிக்க தயாரிப்புக் குழு மிதுனை அணுகியபோது, அவர் திட்டவட்டமாக மறுத்துவிட்டார். ‘நான் ரஜினியின் வில்லனாகவா?’ எனக் கேட்டுள்ளார்.
அவர் என்னுடைய மிக நல்ல நண்பர். அவர், ‘ரஜினி ஹீரோ, நான் வில்லனா? நான் ரஜினிகாந்திடம் அடி வாங்க வேண்டுமா? அதற்கெல்லாம் வாய்ப்பே இல்லை, நான் அதைச் செய்ய மாட்டேன்’ என்று கூறினார்” என்றார்.
ஆரம்பத்தில் மிதுன் நிராகரித்தாலும், பின்னர் ஒரு நிபந்தனையின் பேரில் படத்தில் நடிக்க ஒப்புக்கொண்டார். ரஜினிகாந்த் கூறியதாவது, "பின்னர், பிரதமர் கலந்துகொண்ட WAVES மாநாட்டின் ஒரு நிகழ்வின்போது நான் அவரைச் சந்தித்தேன். அங்கு அவர் என்னிடம், 'இந்தப் படத்திற்காக அவர்கள் என்னை அணுகியுள்ளனர், நீங்கள் சொன்னால் நான் செய்வேன்' என்று கூறினார்.
நான் அவரிடம், 'நிச்சயமாக, நீங்கள் நடிப்பது சிறப்பாக இருக்கும்' என்று சொன்னேன்.
அதற்கு அவர், 'சரி, ஆனால் ஒரு நிபந்தனை, 'நீங்கள் என்னை அடிக்கவோ அல்லது சுடவோ கூடாது' என்றார்.
நான், 'இயக்குநரிடம் கேட்டுவிட்டு வருகிறேன்' என்று சொன்னேன். ஆனால் எனக்குத் தெரியும் அவர் பேச்சுக்காகத்தான் சொல்கிறார் என்று." என்றார்.
மிதுனும் ரஜினிகாந்தும் முதன்முதலில் 1989-ல் ரமேஷ் சிப்பி இயக்கிய 'பிரஷ்டாச்சார்' என்ற அரசியல்-குற்ற வகைமை படத்தில் இணைந்து பணியாற்றினர். இதில் அனுபம்கேர் மற்றும் ரேகா ஆகியோரும் முக்கிய கதாபாத்திரங்களில் நடித்திருந்தனர்.
1992ம் ஆண்டு தியாகி என்ற படத்தில் இருவரும் இணைந்து நடித்திருந்தனர். பின்னர், 1995-ல் வெளியான 'பாக்யா தேபதா' என்ற வங்காள மொழி திரைப்படத்தில் ரஜினிகாந்த் ஒரு சிறப்புத் தோற்றத்தில் நடித்திருந்தார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்