ஜாலிக்காக சென்றவர்களுக்கு எதிர்பாராத அதிர்ச்சி... “ரோலர் கோஸ்டர்” மூளையில் இவ்வளவு பெரிய பாதிப்பை ஏற்படுத்துமா?

பொழுதுபோக்குக்காக குடும்பத்துடன் செல்லும் இடங்களில் ரோலர் கோஸ்டர் போன்ற அதிரடி விளையாட்டுகளுக்கு எப்போதுமே தனி வரவேற்பு இருக்கும். வேகமாக மேலே சென்று திடீரென கீழே விழுவது, கூர்மையான திருப்பங்கள், உடலைச் சுற்றி சுழலும் இருக்கைகள் என சில நிமிடங்களில் பரபரப்பான அனுபவத்தை கொடுக்கும். ஆனால், அத்தகைய சவாரிகள் சில அரிதான சூழல்களில் கடுமையான உடல்நலப் பாதிப்புகளையும் ஏற்படுத்தலாம் என்ற விவாதம் தற்போது எழுந்துள்ளது.

அமெரிக்காவின் கலிபோர்னியா மாநிலத்தில் உள்ள Six Flags Magic Mountain பொழுதுபோக்கு பூங்காவின் X2 ரோலர் கோஸ்டர் தொடர்பாக பலர் மூளை காயம் ஏற்பட்டதாக புகார் தெரிவித்துள்ளனர். இதைத் தொடர்ந்து பூங்கா நிர்வாகத்துக்கு எதிராக பல வழக்குகள் தொடரப்பட்டுள்ளன.

வழக்குத் தொடர்ந்தவர்களின் வழக்கறிஞர்கள், கடந்த இரண்டு ஆண்டுகளில் மட்டும் 100-க்கும் மேற்பட்டோர் இதே சவாரிக்குப் பிறகு மூளை காயம் ஏற்பட்டதாக தெரிவித்துள்ளதாக கூறுகின்றனர். ஆனால், இவை அனைத்தும் தற்போது குற்றச்சாட்டுகளாகவும் சட்ட விசாரணைக்கு உட்பட்டதாகவும் உள்ளன.

X2 சாதாரண ரோலர் கோஸ்டர் அல்ல. அதில் பயணிக்கும் இருக்கைகள் 360 டிகிரி வரை சுழலும் வகையில் வடிவமைக்கப்பட்டுள்ளன. சுமார் 215 அடி உயரத்திலிருந்து கீழே இறங்கும் இந்த சவாரி, மணிக்கு சுமார் 76 மைல் வேகம் வரை செல்லக்கூடியது. வேகமான இறக்கம், திடீர் திருப்பங்கள் மற்றும் இருக்கையின் சுழற்சி ஆகியவை இணைந்து பயணிகளுக்கு மிகவும் தீவிரமான அனுபவத்தை ஏற்படுத்துகின்றன. சமீபத்தில் புகார் அளித்தவர்களில் Pamela Guillen என்பவரும் ஒருவர்.

தனது மகளின் பிறந்தநாளை கொண்டாடுவதற்காக குடும்பத்துடன் பூங்காவுக்கு சென்ற அவர் X2 சவாரியில் பங்கேற்றதாக கூறப்படுகிறது. சவாரி முடிந்ததும் அவர் குழப்பமான நிலையில் இருந்ததாகவும், பின்னர் மயங்கி விழுந்ததாகவும் வழக்கில் தெரிவிக்கப்பட்டுள்ளது. மருத்துவமனையில் பரிசோதித்தபோது மூளையில் ரத்தக்கசிவு ஏற்பட்டிருந்ததாகவும், அவசர அறுவை சிகிச்சை தேவைப்பட்டதாகவும் அவரது தரப்பு கூறியுள்ளது.

மற்றொரு இளம் பெண்ணான Naomi Greer-Wilkinson தொடர்பான வழக்கும் கவனத்தை ஈர்த்துள்ளது. X2 சவாரிக்குப் பிறகு அவருக்கு கடுமையான மூளை காயம் ஏற்பட்டதாக குடும்பத்தினர் தெரிவித்துள்ளனர். தற்போது அவர் மருத்துவமனையில் தீவிர சிகிச்சையில் இருப்பதாகவும், சுயமாக சுவாசிப்பதில் சிக்கல் இருப்பதாகவும் அவரது குடும்பத்தினர் வழக்கு மூலம் தெரிவித்துள்ளனர்.

இதுபோன்ற சம்பவங்கள் ரோலர் கோஸ்டர் போன்ற விளையாட்டுகள் பொதுவாகவே ஆபத்தானவை என்று அர்த்தமல்ல. ஆனால், மிக வேகமான acceleration மற்றும் deceleration, அதாவது உடல் திடீரென வேகமடைவதும் வேகம் குறைவதும், தலை மற்றும் கழுத்தில் அதிக அழுத்தத்தை ஏற்படுத்தக்கூடும். உடல் பாதுகாப்பு பட்டைகளால் கட்டுப்படுத்தப்பட்டிருந்தாலும், தலை அதே வேகத்தில் நகராமல் திடீரென முன், பின் அல்லது பக்கமாக அசையலாம்.

குறிப்பாக சுழற்சி இயக்கம் முக்கியமானதாக இருக்கலாம். தலையின் சுழற்சி வேகமாக மாறும்போது மூளையின் உள்ளேயுள்ள திசுக்கள் மீது அழுத்தம் ஏற்படும் வாய்ப்பு உள்ளது. மருத்துவ ஆய்வுகளில் ரோலர் கோஸ்டர் பயணத்துடன் தொடர்புடைய சில அரிதான நரம்பியல் பாதிப்புகள் பதிவாகியுள்ளன.

அவற்றில் மூளையதிர்ச்சி, மூளையைச் சுற்றியுள்ள ரத்தக்கசிவு மற்றும் மூளைக்கு ரத்தம் கொண்டு செல்லும் ரத்த நாளங்களில் ஏற்படும் காயங்கள் போன்றவை அடங்குகின்றன. மூளையில் ரத்தக்கசிவு ஏற்பட்டால் அது சாதாரண தலைவலியாக மட்டும் இருக்காது. கடுமையான தலைவலி, வாந்தி, தலைசுற்றல், குழப்பம், அதிக தூக்கம், பேசுவதில் சிரமம், உடலின் ஒரு பகுதியில் பலவீனம், மயக்கம் அல்லது வலிப்பு போன்ற அறிகுறிகள் ஏற்படலாம். சவாரிக்குப் பிறகு இதுபோன்ற அறிகுறிகள் நீடித்தால் அதை சாதாரணமாக எடுத்துக்கொள்ளாமல் உடனடியாக மருத்துவ உதவியை நாடுவது அவசியம்.

கழுத்து மற்றும் முதுகெலும்பிலும் இதுபோன்ற சவாரிகள் தாக்கத்தை ஏற்படுத்தக்கூடும். திடீர் திருப்பங்கள் மற்றும் வேகமான இயக்கங்களால் கழுத்துப் பகுதியில் அழுத்தம் ஏற்படலாம். குறிப்பிட்ட உடல்நலப் பிரச்சினைகள் உள்ளவர்கள் அல்லது ஏற்கனவே கழுத்து, முதுகு, இதயம் அல்லது நரம்பியல் தொடர்பான பிரச்சினைகளை எதிர்கொள்பவர்கள் பொழுதுபோக்கு பூங்கா சவாரிகளில் கூடுதல் கவனம் செலுத்துவது அவசியம்.

X2 தொடர்பான வழக்குகளில் பூங்கா மீது பாதுகாப்பு மற்றும் பயணிகளுக்கு போதுமான எச்சரிக்கை வழங்கப்பட்டதா என்பது போன்ற கேள்விகள் எழுப்பப்பட்டுள்ளன. மறுபுறம், Six Flags நிறுவனம் நிலுவையில் உள்ள நீதிமன்ற வழக்குகள் குறித்து கருத்து தெரிவிப்பது தங்களது கொள்கை அல்ல என்று தெரிவித்துள்ளது. X2 சவாரி ஜூலை 12 முதல் மூடப்பட்டுள்ளதாகவும் தகவல்கள் தெரிவிக்கின்றன.

ரோலர் கோஸ்டர் போன்ற சவாரிகளில் ஏற்படும் கடுமையான மூளை காயங்கள் பொதுவானவை என்று கூற முடியாது. இருப்பினும், வேகம் மற்றும் சுழற்சி அதிகமாக இருக்கும் சவாரிகளில் உடல் மீது ஏற்படும் தாக்கத்தை குறைத்து மதிப்பிட முடியாது. வயது வரம்பு, உயரம், எடை மற்றும் உடல்நிலை தொடர்பான பூங்கா விதிமுறைகளைப் பின்பற்றுவது முக்கியம்.

சில நிமிட பொழுதுபோக்குக்காக செல்லும் இடத்தில் உடல்நலப் பிரச்சினை ஏற்படக்கூடாது என்பதே அனைவரின் எதிர்பார்ப்பு. அதனால் சவாரி தொடங்குவதற்கு முன் பாதுகாப்பு அறிவுறுத்தல்களை கவனமாக படிப்பதும், உடல்நிலை சரியில்லாதபோது அதிரடி சவாரிகளை தவிர்ப்பதும், பயணத்துக்குப் பிறகு அசாதாரண அறிகுறிகள் தோன்றினால் உடனடியாக மருத்துவ உதவியை பெறுவதும் பாதுகாப்பான அணுகுமுறையாக இருக்கும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்