காலையில் அலுவலகத்திற்குச் செல்வது, நாள் முழுவதும் கணினி முன்பு அமர்ந்து வேலை பார்ப்பது, மேலதிகாரிகளின் உத்தரவுகளைப் பின்பற்றுவது, இலக்குகளை முடிப்பதற்காக ஓடுவது, இரவு வீட்டுக்குத் திரும்பிய பிறகும் அலுவலக மின்னஞ்சல்களுக்குப் பதிலளிப்பது எனப் பல கார்ப்பரேட் ஊழியர்களின் வாழ்க்கை ஒரு சுழற்சியாகவே மாறிவிட்டது. கைநிறைய சம்பளம், குளிர்சாதன வசதியுடன் கூடிய அலுவலகம், நல்ல பதவி என வெளியில் இருந்து பார்ப்பவர்களுக்கு இந்த வாழ்க்கை வசதியானதாகத் தெரியலாம். ஆனால், அந்த வேலைக்குப் பின்னால் இருக்கும் மன அழுத்தம், விரக்தி, தூக்கமின்மை, குடும்பத்துடன் நேரம் செலவிட முடியாத நிலை போன்ற பிரச்சினைகளைப் பலரும் கவனிப்பதில்லை.
கார்ப்பரேட் நிறுவனங்களில் பணிபுரியும் ஊழியர்களுக்கு அதிக வேலைப்பளு மட்டுமே மன அழுத்தத்திற்குக் காரணமாக இருப்பதில்லை. தொடர்ந்து அதிகரிக்கும் இலக்குகள், குறுகிய காலக்கெடு, மேலதிகாரிகளின் அழுத்தம், வேலைக்கான அங்கீகாரம் கிடைக்காதது, பதவி உயர்வில் ஏற்படும் ஏமாற்றம், வேலை இழந்துவிடுவோமோ என்ற பயம் எனப் பல காரணங்கள் அவர்களைப் பாதிக்கின்றன. சில நிறுவனங்களில் ஒரே ஊழியரிடம் பலருடைய வேலைகளையும் ஒப்படைப்பதால், வேலை நேரம் முடிந்த பிறகும் பணிகளைத் தொடர வேண்டிய கட்டாயம் ஏற்படுகிறது.
கேலப் நிறுவனம் வெளியிட்ட 2026-ம் ஆண்டுக்கான உலகளாவிய பணியிட ஆய்வில், இந்தியாவில் பணிபுரியும் ஊழியர்களில் 23 சதவீதம் பேர் மட்டுமே தங்களது வேலையில் முழுமையான ஈடுபாட்டுடன் இருப்பதாகத் தெரிவிக்கப்பட்டுள்ளது. 59 சதவீதம் பேர் வேலையில் ஈடுபாடு குறைந்த நிலையில் இருப்பதாகவும், 18 சதவீதம் பேர் நிறுவனத்தின் பணிச்சூழலில் தீவிர அதிருப்தியுடன் இருப்பதாகவும் ஆய்வு குறிப்பிடுகிறது. இது இந்திய நிறுவனங்களில் ஊழியர்களின் வேலை அனுபவம் மற்றும் மனநிலை குறித்து கவனிக்க வேண்டிய முக்கியமான தகவலாக உள்ளது.
வேலை தொடர்பான மன அழுத்தம் உலகளாவிய பிரச்சினையாகவும் உள்ளது. கேலப் ஆய்வின்படி, 2025-ம் ஆண்டில் இந்திய ஊழியர்களில் 28 சதவீதம் பேர் முந்தைய நாளில் அதிக மன அழுத்தத்தை அனுபவித்ததாகத் தெரிவித்துள்ளனர். உலகளாவிய அளவில் இந்த எண்ணிக்கை 40 சதவீதமாக உள்ளது. இதன் மூலம் வேலை தொடர்பான மன அழுத்தம் என்பது ஒரு சில நிறுவனங்களில் மட்டுமே காணப்படும் பிரச்சினை அல்ல என்பது புரிகிறது.
ஊழியர்களின் விரக்திக்கு முக்கியமான காரணங்களில் ஒன்று மேலதிகாரிகளின் அணுகுமுறை. சில இடங்களில் ஊழியர்கள் செய்த தவறுகள் உடனடியாகச் சுட்டிக்காட்டப்படுகின்றன. ஆனால், அவர்கள் சிறப்பாகச் செய்த பணிகளுக்கு உரிய பாராட்டு கிடைப்பதில்லை. கடினமாக உழைத்தாலும் பதவி உயர்வு கிடைக்காமல் போவது, ஒரே மாதிரியான வேலையைத் தொடர்ந்து செய்ய வேண்டிய நிலை, தங்களது கருத்துகளுக்கு மதிப்பளிக்கப்படாதது போன்றவை நாளடைவில் வேலை மீதான ஆர்வத்தைக் குறைக்கின்றன. இதனால் சிலர் அலுவலகத்திற்குச் செல்வதையே மனதளவில் விரும்பாத நிலைக்குத் தள்ளப்படுகின்றனர்.
இதற்கு அடுத்ததாகப் பாதிக்கப்படுவது குடும்ப வாழ்க்கை. அலுவலகத்தில் நீண்ட நேரம் வேலை பார்ப்பதால் குழந்தைகளுடன் நேரம் செலவிட முடியாமல் போகிறது. குடும்ப நிகழ்ச்சிகளில் பங்கேற்க முடியாத நிலையும் ஏற்படுகிறது. விடுமுறை நாட்களிலும் அலுவலக அழைப்புகள், அவசரப் பணிகள், ஆன்லைன் மீட்டிங்குகள் என ஓய்வு நேரம் பாதிக்கப்படுகிறது. வீட்டில் இருந்தாலும் மனம் முழுவதும் அலுவலக வேலையைப் பற்றிய கவலையிலேயே இருப்பதால் குடும்ப உறவுகளிலும் விரிசல் ஏற்பட வாய்ப்புள்ளது.
உலக சுகாதார அமைப்பு (WHO), நீண்ட காலமாகக் கட்டுப்படுத்தப்படாத பணியிட மன அழுத்தம் 'பர்ன்அவுட்' (Burnout) எனப்படும் மன மற்றும் உடல் சோர்வு நிலைக்கு வழிவகுக்கும் என்று விளக்குகிறது. தொடர்ந்து உடல் சக்தி குறைந்த உணர்வு, வேலையின் மீது வெறுப்பு அல்லது எதிர்மறையான மனநிலை, தன்னால் சரியாக வேலை செய்ய முடியவில்லை என்ற எண்ணம் ஆகியவை இதன் முக்கிய அறிகுறிகளாகும். இது மருத்துவ நோயாக வகைப்படுத்தப்படவில்லை என்றாலும், பணியிடத்தில் நீடிக்கும் மன அழுத்தத்துடன் தொடர்புடைய ஒரு முக்கியமான நிலையாக WHO அங்கீகரித்துள்ளது.
சர்வதேச தொழிலாளர் அமைப்பும் (ILO), அதிக வேலை நேரம், வேலை மீதான கட்டுப்பாடு இல்லாமை, தெளிவற்ற பொறுப்புகள், மேலதிகாரிகளின் ஆதரவு இல்லாமை, பணியிடத்தில் துன்புறுத்தல் மற்றும் வேலை பாதுகாப்பின்மை போன்றவை ஊழியர்களுக்கு மன அழுத்தத்தை ஏற்படுத்தும் காரணிகள் எனக் குறிப்பிடுகிறது. எனவே, ஊழியர்கள் மட்டுமே தங்களது மன அழுத்தத்தைக் கட்டுப்படுத்த முயற்சி செய்வது போதாது. நிறுவனங்களும் பணிச்சூழலில் மாற்றங்களை ஏற்படுத்த வேண்டும்.
இதற்காக நிறுவனங்கள் ஊழியர்களின் வேலைப்பளுவைச் சரியாகப் பகிர்ந்தளிக்க வேண்டும். வேலை நேரம் முடிந்த பிறகு தேவையற்ற அழைப்புகள் மற்றும் மின்னஞ்சல்களைத் தவிர்க்க வேண்டும். ஊழியர்களின் கருத்துகளைக் கேட்பது, அவர்களின் உழைப்புக்கு உரிய அங்கீகாரம் வழங்குவது, விடுமுறை எடுப்பதை ஊக்குவிப்பது, மனநல ஆலோசனை வசதிகளை ஏற்படுத்துவது போன்ற நடவடிக்கைகள் அவசியம். அதேபோல், ஊழியர்களும் தங்களது உடல்நலம் மற்றும் மனநலத்தைப் புறக்கணிக்காமல் கவனித்துக்கொள்ள வேண்டும்.
சம்பளம், பதவி, நிறுவனத்தின் பெயர் ஆகியவை மட்டுமே ஒருவரின் வாழ்க்கைத் தரத்தைத் தீர்மானிப்பதில்லை. வேலை முடிந்து வீட்டுக்குத் திரும்பும்போது மனதில் நிம்மதி இருக்கிறதா, குடும்பத்துடன் நேரம் செலவிட முடிகிறதா, உடலுக்கும் மனதுக்கும் ஓய்வு கிடைக்கிறதா என்பதும் முக்கியம். ஊழியர்களின் உழைப்பைப் பயன்படுத்திக்கொள்வதுடன், அவர்களின் நலனையும் பாதுகாக்கும் பணிச்சூழலை உருவாக்குவதுதான் ஒரு நல்ல நிறுவனத்தின் அடையாளமாக இருக்க வேண்டும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.