ஏர் இந்தியா தனது விமானப் பணியாளர்களுக்கான கடுமையான உடல்நலம் மற்றும் உடற்தகுதி கொள்கையை அறிவித்துள்ளது, மேலும், இந்த விதிமுறைகளானது மே 1 முதல் அமலுக்கு வரும் எனவும் அறிவிக்கப்பட்டுள்ளது.
ஏர் இந்தியா தனது விமானப் பணிக்குழுவினருக்காக, கடுமையான உடல்நலம் மற்றும் உடற்தகுதிக்கான கட்டமைப்பை அறிமுகப்படுத்துவது குறித்து பரிசீலித்து வருவதாகக் கூறப்படுகிறது. இதன் கீழ், குறைந்த எடை, அதிக எடை அல்லது உடல் பருமன் கொண்ட ஊழியர்கள், பணிப் பட்டியலிலிருந்து நீக்கப்படுதல் மற்றும் ஊதிய இழப்பு உள்ளிட்ட நடவடிக்கைகளை எதிர்கொள்ள நேரிடும் எனவும் கூறப்பட்டுள்ளது. இதில் 18 முதல் 24.9 வரையிலான வரம்பு இயல்பானதாக வகைப்படுத்தப்பட்டு, விமான நிறுவனத்தால் விரும்பப்படும் பிரிவாகவும் அடையாளம் காணப்பட்டுள்ளது. இதில், 18-க்குக் குறைவான பிஎம்ஐ (BMI) அளவு, குறைந்த எடை என வகைப்படுத்தப்படும். இருப்பினும், ஒரு நபர் மருத்துவ மதிப்பீடு மற்றும் செயல்பாட்டு மதிப்பீட்டில் தேர்ச்சி பெற்றால், இது ஏற்றுக்கொள்ளத்தக்கதாகக் கருதப்படலாம் என அறிக்கையில் கூறப்பட்டுள்ளது. மேலும், 25 முதல் 29.9 வரையிலான உடல் நிறை குறியீட்டெண் (BMI) அதிக எடை என வகிப்படுத்தப்பட்டுள்ளது. இயல்பான தகுதி வரம்பில் உள்ளவர்கள் மட்டுமே கட்டுப்பாடுகள் இன்றி தொடர்ந்து பறக்க அனுமதிக்கப்படுவார்கள். மற்றவர்கள் பணிக்குத் தகுதி பெறுவதற்கு முன்பு கூடுதல் சோதனைகளுக்கு உட்படுத்தப்பட வேண்டும் என்று அறிக்கையில் கூறப்பட்டுள்ளது. இந்தக் கொள்கையின் கீழ், 30 அல்லது அதற்கு மேற்பட்ட பிஎம்ஐ (BMI) பருமனானவர் என வகைப்படுத்தப்பட்டு ஏற்றுக்கொள்ள முடியாததாகக் கருதப்படுவர் என்றும் குறிப்பிடப்பட்டுள்ளது.
எடை குறைவாகவோ அல்லது அதிகமாகவோ இருப்பதாகக் கண்டறியப்பட்ட விமானப் பணிக்குழு உறுப்பினர்கள், பணிப் பட்டியலிலிருந்து நீக்கப்பட்டு, செயல்பாட்டு மதிப்பீட்டிற்கு உட்படுத்தப்படுவார்கள் என்றும், அவர்கள் அந்த மதிப்பீட்டில் தேர்ச்சி பெறத் தவறினால், தேவையான தரநிலைகளை அடையும் வரை அவர்களுக்கு ஊதியம் மறுக்கப்படும் எனவும் கூறப்பட்டுள்ளது. உடல் பருமன் கொண்டவர்கள் என வகைப்படுத்தப்பட்டவர்களுக்கு, இந்தக் கொள்கையானது அவர்களை உடனடியாகப் பணியிலிருந்து நீக்குவதோடு ஊதிய இழப்பையும் ஏற்படுத்தும் என்றும், ஒரு குறிப்பிட்ட காலக்கெடுவுக்குள் அவர்கள் தங்கள் உடல் நிறை குறியீட்டெண்ணை (BMI) சரியான வரம்பிற்குள் கொண்டுவர வேண்டும் என்ற நிபந்தனையும் விதிக்கப்பட்டுள்ளது. இந்த அறிக்கையானது, பணியில் உள்ள விமானப் பணிக்குழுவினர் மற்றும் பயிற்சி பெறுபவர்கள் ஆகிய இருவருக்கும் இந்தக் கொள்கை பொருந்தும் என்று அறிக்கையில் குறிப்பிடப்பட்டுள்ளது.
ஆரோக்கியமான வாழ்க்கை முறையைப் பேணுவது குறித்த விழிப்புணர்வை ஊக்குவிப்பதையும், பொருத்தமான உடற்தகுதி நிலைகளை அடைவது மற்றும் பராமரிப்பது தொடர்பான செயல்முறைகளை விமானப் பணியாளர்களுக்கு அறிமுகப்படுத்துவதையும் நோக்கமாகக் கொண்டே இந்தக் கொள்கை முதற்கட்டமாக அறிமுகப்படுத்தப்படுவதாக ஏர் இந்தியா தெரிவித்துள்ளது. மேலும், எதிர்காலத்தில் இன்னும் கடுமையான உடற்தகுதித் தரநிலைகளைச் செயல்படுத்துவதற்கு முன்னதாக, தற்போதைய கட்டமைப்பு ஒரு ஆயத்த நடவடிக்கையாகச் செயல்படும் என்றும் அது கூறியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.