கடந்த சில ஆண்டுகளாக இந்தியாவில் கோடை வெப்பத்தின் தாக்கம் ஆண்டுதோறும் அதிகரித்து வருகிறது. ஒருகாலத்தில் சில மாநிலங்களில் மட்டுமே பதிவான வெப்ப அலைகள், இன்று நாட்டின் பெரும்பாலான பகுதிகளில் மக்களின் அன்றாட வாழ்க்கையையே பாதிக்கும் அளவுக்கு தீவிரமடைந்துள்ளன. குறிப்பாக வெளிப்புறங்களில் வேலை செய்யும் கட்டுமானத் தொழிலாளர்கள், விவசாயத் தொழிலாளர்கள், தெருவோர விற்பனையாளர்கள், சுத்தப்படுத்தும் பணியாளர்கள், டெலிவரி ஊழியர்கள் போன்ற லட்சக்கணக்கான மக்களுக்கு, வெப்ப அலை என்பது வெறும் இயற்கை நிகழ்வு அல்ல; அது நேரடியாக வருமானத்தை பாதிக்கும் மிகப்பெரிய பொருளாதார சவாலாக மாறியுள்ளது.
இந்த சூழ்நிலையில், இந்தியாவில் புதிய வகையான "வெப்ப அலை காப்பீட்டு திட்டம்" (Heat Insurance) கவனத்தை ஈர்த்துள்ளது. அதிக வெப்பநிலை பதிவானால், எந்த கோரிக்கையும் அளிக்காமல் தானாகவே பாதிக்கப்பட்ட தொழிலாளர்களின் வங்கிக் கணக்கில் இழப்பீட்டு தொகை செலுத்தப்படும் இந்த திட்டம், காலநிலை மாற்றத்தால் பாதிக்கப்படும் மக்களுக்கு புதிய நம்பிக்கையாக பார்க்கப்படுகிறது.
இந்த திட்டத்தின் சிறப்பம்சம் என்னவென்றால், வழக்கமான காப்பீட்டுத் திட்டங்களைப் போல மருத்துவச் சான்றிதழ், வருமான இழப்பு ஆவணம் அல்லது நீண்டகால சரிபார்ப்பு நடைமுறைகள் இதில் கிடையாது. இந்திய வானிலை ஆய்வு மையம் அல்லது அங்கீகரிக்கப்பட்ட வானிலை நிலையங்களில் பதிவு செய்யப்படும் வெப்பநிலை குறிப்பிட்ட அளவைத் தாண்டினாலே, முன்கூட்டியே நிர்ணயிக்கப்பட்ட தொகை தகுதியுள்ள பயனாளிகளின் வங்கிக் கணக்கில் நேரடியாக வரவு வைக்கப்படும். இதை Parametric Insurance என்று அழைக்கப்படுகிறது. அதாவது சேதத்தை நிரூபிப்பதற்குப் பதிலாக, முன்கூட்டியே நிர்ணயிக்கப்பட்ட இயற்கை அளவீட்டின் அடிப்படையில் இழப்பீடு வழங்கப்படும்.
இந்தத் திட்டத்தின் மூலம் பயனடைந்தவர்களில் ஒருவரான அகமதாபாத்தைச் சேர்ந்த நிர்மலா பர்மர், தினசரி கூலி வேலை செய்து குடும்பத்தை நடத்தி வருகிறார். கடுமையான வெப்ப அலை காரணமாக சில நாட்கள் வேலை செய்ய முடியாமல் போன நிலையில், காப்பீட்டுத் தொகை அவரது வங்கிக் கணக்கில் நேரடியாக வந்ததாக அவர் தெரிவித்துள்ளார். அந்தப் பணத்தில் குடும்பத்திற்குத் தேவையான உணவுப் பொருட்களையும், எலுமிச்சை உள்ளிட்ட பொருட்களையும் வாங்கி கோடை வெப்பத்தை சமாளிக்க முடிந்ததாக அவர் கூறியுள்ளார். தினசரி வருமானத்தை மட்டுமே நம்பி வாழும் குடும்பங்களுக்கு இதுபோன்ற சிறிய தொகையும் பெரிய உதவியாக மாறுவதாக அவர் தெரிவித்துள்ளார்.
காலநிலை மாற்றம் குறித்து ஆராய்ச்சியாளர்கள் பல ஆண்டுகளாக ஒரு முக்கிய எச்சரிக்கையை வெளியிட்டு வருகின்றனர். உலக வெப்பமயமாதல் காரணமாக வெப்ப அலைகள் நீண்ட நாட்கள் நீடிப்பதுடன், இரவு நேர வெப்பநிலையும் குறையாமல் இருப்பது மனித உடலுக்கு கூடுதல் அழுத்தத்தை ஏற்படுத்துகிறது. குறிப்பாக வெளியில் வேலை செய்யும் தொழிலாளர்கள் பல மணி நேரம் நேரடி வெயிலில் பணியாற்ற வேண்டியிருப்பதால், உடல் நீர்ச்சத்து குறைபாடு, வெப்ப சோர்வு மற்றும் வெப்ப பக்கவாதம் போன்ற பாதிப்புகளுக்கு ஆளாகும் அபாயம் அதிகரித்து வருகிறது.
இந்தியாவில் பெரும்பாலான அமைப்புசாரா (Informal) தொழிலாளர்களுக்கு மருத்துவக் காப்பீடு அல்லது வருமான பாதுகாப்பு வசதிகள் கிடைப்பதில்லை. ஒரு நாள் வேலை செய்ய முடியாவிட்டாலும், அந்த நாளுக்கான வருமானம் முழுமையாக இழக்கப்படுகிறது. இதுபோன்ற சூழலில், வெப்ப அலை காப்பீடு போன்ற திட்டங்கள் குறைந்தபட்ச நிதி பாதுகாப்பை வழங்குகின்றன. இதன் மூலம் அவர்கள் அத்தியாவசிய தேவைகளை பூர்த்தி செய்து, வெப்பம் குறையும் வரை பாதுகாப்பாக இருக்க முடிகிறது.
இந்தத் திட்டத்தின் மற்றொரு முக்கிய நோக்கம், மக்கள் உயிரைப் பணயம் வைத்து வேலைக்குச் செல்ல வேண்டிய சூழலைக் குறைப்பதாகும். பல தொழிலாளர்கள் தினசரி வருமானத்தை இழக்கக் கூடாது என்பதற்காக கடுமையான வெயிலிலும் தொடர்ந்து வேலை செய்கிறார்கள். இதனால் உடல்நல பாதிப்புகள் ஏற்படும் அபாயம் அதிகரிக்கிறது. ஆனால் வெப்பநிலை அதிகரிக்கும் நாட்களில் குறைந்தபட்ச வருமானம் உறுதி செய்யப்பட்டால், உடல்நலத்திற்கு முன்னுரிமை கொடுத்து ஓய்வெடுக்கும் வாய்ப்பு கிடைக்கும் என்று நிபுணர்கள் கருதுகின்றனர்.
காலநிலை மாற்றத்தின் தாக்கம் வெறும் சுற்றுச்சூழல் பிரச்சினை மட்டுமல்ல, பொருளாதார சவாலாகவும் மாறிவிட்டது. அதிக வெப்பம் காரணமாக வேலை நேரம் குறைவது, தொழிலாளர்களின் உற்பத்தித்திறன் குறைவது, மருத்துவச் செலவுகள் அதிகரிப்பது போன்றவை நாட்டின் பொருளாதாரத்தையும் பாதிக்கின்றன. உலக வங்கி மற்றும் பல சர்வதேச ஆய்வுகளும், எதிர்காலத்தில் வெப்ப அலைகள் வளர்ந்து வரும் நாடுகளின் தொழிலாளர் சந்தையை அதிகமாக பாதிக்கும் என்று எச்சரித்து வருகின்றன.
இந்தியாவின் பல நகரங்களும் தற்போது Heat Action Plan என்ற வெப்ப மேலாண்மை திட்டங்களை செயல்படுத்தி வருகின்றன. பள்ளி நேர மாற்றம், குடிநீர் வசதிகள், பொதுமக்களுக்கு வெப்ப எச்சரிக்கைகள், அவசர மருத்துவ உதவி போன்ற நடவடிக்கைகள் ஏற்கனவே நடைமுறையில் உள்ளன. ஆனால் வெப்ப அலை காப்பீடு போன்ற நிதி பாதுகாப்பு திட்டங்கள், இந்த முயற்சிகளுக்கு புதிய பரிமாணத்தை வழங்குகின்றன. வெப்பத்தை வெறும் உடல்நல பிரச்சினையாக அல்லாமல், வாழ்வாதாரத்தை பாதிக்கும் பேரிடராக அணுகும் புதிய சிந்தனையாக இது பார்க்கப்படுகிறது.
சுற்றுச்சூழல் நிபுணர்கள் கூறுவதன்படி, எதிர்காலத்தில் வெள்ளம், வறட்சி, சூறாவளி போன்ற இயற்கை பேரிடர்களுக்குப் பயன்படுத்தப்படும் காப்பீட்டு மாதிரிகள், வெப்ப அலைகளுக்கும் விரிவுபடுத்தப்படலாம். காலநிலை மாற்றம் தீவிரமடையும் நிலையில், பாதிப்புக்கு உள்ளாகும் மக்களுக்கு விரைவாகவும் எளிதாகவும் நிதி உதவி கிடைப்பது மிகவும் அவசியம். அதற்கான ஆரம்ப முயற்சியாக இந்தத் திட்டம் பார்க்கப்படுகிறது.
வெயில் என்பது ஒவ்வொரு கோடையிலும் வரும் ஒரு பருவநிலை மாற்றம் மட்டுமே என்ற பார்வை இன்று மாறிவிட்டது. அது மக்களின் உடல்நலம், வருமானம், வேலைவாய்ப்பு மற்றும் வாழ்க்கைத் தரத்தை நேரடியாக பாதிக்கும் மிகப்பெரிய சமூக-பொருளாதார சவாலாக உருவெடுத்துள்ளது. இதுபோன்ற புதிய காப்பீட்டு திட்டங்கள், காலநிலை மாற்றத்துக்கு எதிராக மக்கள் தங்களை பாதுகாத்துக் கொள்ள உதவும் ஒரு முக்கிய கருவியாக அமையலாம். அதே நேரத்தில், வெப்ப அலைகளை குறைக்கும் நீண்டகால நடவடிக்கைகளான பசுமை பரப்பை அதிகரித்தல், நகர திட்டமிடலை மேம்படுத்துதல் மற்றும் சுற்றுச்சூழல் பாதுகாப்பை வலுப்படுத்துதல் ஆகியவற்றுக்கும் சம அளவில் முக்கியத்துவம் வழங்கப்பட வேண்டும் என்பதே நிபுணர்களின் வலியுறுத்தலாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.