இந்தியாவில் வாழும் இன்றைய தலைமுறை இளைஞர்களின் (Gen Z மற்றும் Millennials) வாழ்க்கைமுறை வேகமாக மாறிவரும் நிலையில், அதனுடன் சேர்ந்து அவர்களின் நிதி நெருக்கடியும் அபாயகரமான வேகத்தில் அதிகரித்து வருகிறது. கையில் சம்பளம் வந்த அடுத்த நொடியே, டிஜிட்டல் தளங்கள் மூலம் மிகச் சுலபமாகக் கிடைத்துவிடும் சிறு கடன்கள் மற்றும் கிரெடிட் கார்டு பற்றாக்குறைகள் இவர்களை ஒரு நிரந்தர 'இ.எம்.ஐ.' சுழற்சிக்குள் சிக்க வைக்கின்றன.
ஒரு காலத்தில் வீட்டுக் கடன், கார் கடன் என்பது மட்டுமே பெரிய சுமையாகப் பார்க்கப்பட்ட நிலை மாறி, இப்போது கைபேசி, லேப்டாப், சுற்றுலா, ஏன்... ஒரு இரவு உணவுக்காகக் கூட உடனடிச் சிறு கடன்களை (Small Digital Loans) நாடும் போக்கு அபாயமாய் மாறியுள்ளது. இந்தக் கடன் பெற்ற பிறகு, தவணையைத் திருப்பிச் செலுத்தத் தாமதிப்பது அல்லது தவறுவதுதான் இந்திய இளைஞர்களைக் கடுமையான நிதி நெருக்கடியில் சிக்குவதற்கு முக்கியக் காரணமாக அமைகிறது என்று சமீபத்திய ஆய்வுகள் அதிர்ச்சியை அளிக்கின்றன.
இந்தச் சூழலுக்கு முக்கியக் காரணம், 'உடனடித் திருப்தி' என்ற நுகர்வோர் கலாச்சாரத்தின் மீதுள்ள ஆசைதான். சமூக ஊடகங்களில் பிறரின் ஆடம்பரமான வாழ்க்கையைப் பார்த்து, "நாமும் இவர்களைப் போலவே வாழ வேண்டும்" என்ற எண்ணம் இளைஞர்கள் மத்தியில் ஆழமாக வேரூன்றிவிட்டது. அதற்கேற்ப, ஆன்லைன் கடன் செயலிகள் மற்றும் வங்கி சாரா நிதி நிறுவனங்கள், நிதி விழிப்புணர்வு இல்லாத இவர்களுக்கு மிகக் குறைந்த ஆவணங்களுடன் நொடியில் கடன்களை வழங்கத் தயாராக உள்ளன.
2019-இல் 14% ஆக இருந்த சிறு கடன்களைத் திருப்பிச் செலுத்தாதவர்களின் விகிதம், 2023-இல் 26% ஆக உயர்ந்துள்ளது. இது கடன் நிர்வாகத்தின் முக்கியத்துவத்தை இளைஞர்கள் புரிந்துகொள்ளத் தவறுவதைக் காட்டுகிறது. நிலையான வருமானம் இல்லாதவர்கள் கூட, இந்தச் சுலபமான கடன் சலுகைகளுக்கு அடிமையாவது நிலைமையை மேலும் மோசமாக்குகிறது.
சரி, இந்தக் கடன் வலையிலிருந்து தப்பிப்பது எப்படி?
இதற்குப் பொருளாதார வல்லுநர்கள் கூறும் முதல் வழி, அவசரகாலச் சேமிப்பை (Emergency Fund) உருவாக்குவதுதான். அவசரத் தேவை என்று வரும்போது உடனடியாகக் கடன் தேடாமல், கையில் இருக்கும் பணத்தைப் பயன்படுத்தும் பழக்கத்தை ஏற்படுத்திக்கொண்டால், தேவையில்லாத கடன் சுமையைத் தவிர்க்கலாம். இரண்டாவதாக, நிதி விஷயங்களில் தெளிவு வேண்டும். மாத வருமானம் எவ்வளவு, அத்தியாவசியச் செலவுகள் எவ்வளவு, கடன்களின் விவரங்கள் என்னென்ன என்பதைத் தெளிவாக எழுதி வைத்துக் கணக்கிட வேண்டும். மூன்றாவதாக, அனைத்துக் கடன்களையும் ஒருங்கிணைப்பது (Debt Consolidation) வட்டிச் சுமையைக் குறைக்கும்.
பல்வேறு நிறுவனங்களுக்குப் பல வட்டி விகிதங்களில் பணம் செலுத்துவதைத் தவிர்த்து, குறைந்த வட்டியில் கிடைக்கும் ஒரே கடனாக அதை மாற்றலாம். மேலும், அதிக வட்டி வசூலிக்கும் ஆன்லைன் செயலிகள் மற்றும் வங்கி சாரா நிதி நிறுவனங்களில் கடன் வாங்குவதைக் குறைத்துக் கொண்டு, அதற்குப் பதிலாகச் சேமிப்பு மற்றும் முதலீடு குறித்த விழிப்புணர்வைக் கட்டாயம் வளர்த்துக் கொள்ள வேண்டும். சேமிப்புக்கு முக்கியத்துவம் கொடுப்பது தான், வருங்காலத்தில் சிறு கடன்களைக் குறைப்பதற்கான ஒரே நிரந்தரமான வழி. கடன் நிர்வாகத்தில் கூடுதல் அக்கறை எடுத்துக்கொண்டால் மட்டுமே, காலாகாலத்திற்கும் EMI கட்டும் சுழற்சியிலிருந்து இளைய தலைமுறையால் மீள முடியும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.