இ-பாஸ்போர்ட் எப்படி வாங்குறது? நன்மைகள் என்னென்ன?

இந்தியாவின் பாஸ்போர்ட் சேவைகள் இப்போ புது உச்சத்தை தொட்டிருக்கு! பாஸ்போர்ட் சேவை 2.0 (Passport Seva Programme 2.0) மூலமா, இ-பாஸ்போர்ட் (e-Passport) இந்தியா முழுவதும் அறிமுகப்படுத்தப்பட்டிருக்கு. இந்த இ-பாஸ்போர்ட், ஒரு சின்ன மின்னணு சிப்பை (RFID Chip) உள்ளடக்கியது, இது பயணிகளின் தகவல்களை பாதுகாப்பாகவும், வேகமாகவும் பயன்படுத்த உதவுது.

இ-பாஸ்போர்ட் என்றால் என்ன?

இ-பாஸ்போர்ட் என்பது ஒரு நவீன பாஸ்போர்ட், இதுல ஒரு மின்னணு சிப் (Radio Frequency Identification - RFID) மற்றும் ஆன்டெனா பொருத்தப்பட்டிருக்கு. இந்த சிப், பாஸ்போர்ட் உரிமையாளரோட பெயர், பிறந்த தேதி, பாஸ்போர்ட் எண், புகைப்படம், கைரேகை, மற்றும் கண் ஸ்கேன் (Iris Scan) போன்ற முக்கிய தகவல்களை பாதுகாப்பாக சேமிக்குது.

வித்தியாசமான அடையாளம்: இ-பாஸ்போர்ட்டை சாதாரண பாஸ்போர்ட்டில் இருந்து வேறுபடுத்த, முன் பக்க அட்டையில் ஒரு சின்ன தங்க நிற சின்னம் (Gold-Coloured Symbol) இருக்கும்.

பாதுகாப்பு: இந்த சிப், தகவல்களை என்க்ரிப்ட் செய்து சேமிக்குது, இதனால மோசடி அல்லது பாஸ்போர்ட் போலியாக்கப்படுவது குறைகிறது.

குடியுரிமை அதிகாரிகள், பாஸ்போர்ட்டை திறக்காமலேயே இந்த சிப்பை ஸ்கேன் செய்து தகவல்களை படிக்க முடியும், இது எல்லை கடக்கும்போது வேகமா செயல்பட உதவுது. மேலும், இந்த இ-பாஸ்போர்ட், சர்வதேச சிவில் விமானப் போக்குவரத்து அமைப்பு (ICAO) விதிமுறைகளுக்கு ஏற்ப வடிவமைக்கப்பட்டிருக்கு, இதனால உலகளவில் எல்லா நாடுகளிலும் இது ஏற்றுக்கொள்ளப்படுது.

பாஸ்போர்ட் சேவை 2.0

பாஸ்போர்ட் சேவை 2.0, இந்தியாவின் பாஸ்போர்ட் விண்ணப்ப செயல்முறையை இன்னும் எளிமையாகவும், வெளிப்படையாகவும், வேகமாகவும் மாற்றியிருக்கு. இந்த திட்டத்தின் முக்கிய அம்சங்கள்:

வேகமான சரிபார்ப்பு: mPassport Police App மூலமா, 25 மாநிலங்கள் மற்றும் யூனியன் பிரதேசங்களில் போலீஸ் வெரிஃபிகேஷன் சரிபார்ப்பு நேரம் 5-7 நாட்களாக குறைக்கப்பட்டிருக்கு.

மொபைல் பாஸ்போர்ட் வேன்கள்: கிராமப்புற மற்றும் தொலைதூர பகுதிகளில் உள்ள மக்களுக்கு பாஸ்போர்ட் சேவைகளை எளிதாக கொண்டு சேர்க்க, மொபைல் பாஸ்போர்ட் வேன்கள் அறிமுகப்படுத்தப்பட்டிருக்கு.

புதிய சேவை மையங்கள்: 2025-ல், 10 புதிய தபால் அலுவலக பாஸ்போர்ட் சேவை மையங்கள் (POPSK) திறக்கப்பட்டு, மொத்தம் 450 மையங்களாக உயர்ந்திருக்கு. இது டயர் 2 மற்றும் டயர் 3 நகரங்களில் உள்ள மக்களுக்கு பயனளிக்குது.

டிஜிட்டல் ஒருங்கிணைப்பு: கிளவுட் கம்ப்யூட்டிங், டிஜிலாக்கர் ஒருங்கிணைப்பு, மற்றும் ‘எங்கிருந்து வேண்டுமானாலும் விண்ணப்பி’ (Apply from Anywhere) திட்டம் மூலமா, ஆவணங்களை டிஜிட்டலாக சமர்ப்பிக்க முடியுது.

இந்த முன்னேற்றங்கள், இந்தியாவின் ‘விக்ஸித் பாரத்’ (Developed India) இலக்கை அடைய, சேவை, நல்லாட்சி, மற்றும் மக்கள் நலனை மையமாக வைத்து செயல்படுது.

இ-பாஸ்போர்ட்டுக்கு எப்படி விண்ணப்பிக்கலாம்?

இ-பாஸ்போர்ட்டுக்கு விண்ணப்பிக்கறது, சாதாரண பாஸ்போர்ட்டுக்கு விண்ணப்பிக்கற மாதிரியே எளிமையானது. ஆனா, இ-பாஸ்போர்ட் வழங்கும் வசதி இப்போது தேர்ந்தெடுக்கப்பட்ட பாஸ்போர்ட் அலுவலகங்களில் மட்டுமே இருக்கு (எ.கா: சென்னை, ஹைதராபாத், நாக்பூர், சூரத், ஜெய்ப்பூர், அமிர்தசரஸ், ராஞ்சி, ராய்ப்பூர், புவனேஸ்வர், ஜம்மு, கோவா, சிம்லா). விரைவில் இது இந்தியா முழுவதும் விரிவாக்கப்படும்.

விண்ணப்பிக்கும் முறை:

பாஸ்போர்ட் சேவை இணையதளத்துக்கு செல்லுங்க: அதிகாரப்பூர்வ இணையதளமான https://services1.passportindia.gov.in/psp இல் சென்று, புதிய பயனர்கள் கணக்கு தொடங்கணும். ஏற்கனவே கணக்கு இருந்தா, உள்நுழையலாம்.

விண்ணப்பத்தை பூர்த்தி செய்யுங்க: இ-பாஸ்போர்ட்டுக்கு தேவையான தனிப்பட்ட மற்றும் பயண தகவல்களை சரியாக பூர்த்தி செய்யணும்.

இப்போ, அருகில் உள்ள பாஸ்போர்ட் சேவை மையம் (PSK) அல்லது தபால் அலுவலக பாஸ்போர்ட் சேவை மையத்தை (POPSK) தேர்ந்தெடுத்து, நியமனத்துக்கு தேதி மற்றும் நேரத்தை பதிவு செய்யணும்.

பிறகு, ஆன்லைனில் கட்டணத்தை செலுத்தலாம்.

இந்தியாவின் பாஸ்போர்ட் சேவைகளில் மாற்றம்

கடந்த 10 ஆண்டுகளில், இந்தியாவின் பாஸ்போர்ட் சேவைகள் பெரிய மாற்றத்தை கண்டிருக்கு. 2014-ல் 77 பாஸ்போர்ட் சேவை மையங்கள் மட்டுமே இருந்தது, இப்போ 523 மையங்களாக உயர்ந்திருக்கு, இதுல 450 தபால் அலுவலக பாஸ்போர்ட் சேவை மையங்களும் அடங்குது.

ஆவணங்களை டிஜிட்டலாக சமர்ப்பிக்க முடியுது, இதனால அசல் ஆவணங்களை எடுத்துச் செல்ல வேண்டிய அவசியம் இல்லை. இந்த திட்டம், எந்த இடத்திலிருந்தும் ஆன்லைனில் விண்ணப்பிக்க முடியுற வசதியை கொடுக்குது. குறிப்பாக, அவசர பயண தேவைகளுக்கு, தட்கல் முறையில் விரைவாக பாஸ்போர்ட் பெற முடியுது.

அடுத்த சில மாதங்களில், இந்தியாவில் உள்ள எல்லா பாஸ்போர்ட் அலுவலகங்களும் இ-பாஸ்போர்ட் வழங்கும் வசதியை பெறும். மேலும், வெளிநாட்டில் உள்ள இந்திய தூதரகங்கள் மற்றும் துணைத் தூதரகங்களிலும் இந்த சேவை படிப்படியாக அறிமுகப்படுத்தப்படுது. இந்தியாவைத் தவிர, அமெரிக்கா, கனடா, ஜெர்மனி, இங்கிலாந்து, பிரான்ஸ், பிரேசில், மற்றும் பல நாடுகளும் இ-பாஸ்போர்ட்டை பயன்படுத்துகின்றன. இது இந்திய பயணிகளுக்கு உலகளாவிய பயண அனுபவத்தை மேம்படுத்துது.

உங்கள் இ-பாஸ்போர்ட்டுக்கு விண்ணப்பிக்க, உடனே https://services1.passportindia.gov.in/psp இல் சென்று பதிவு செய்யுங்க, உங்க பயணத்தை இன்னும் எளிதாக்குங்க.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.