'ரகசிய' மசாலா சேர்த்து வீட்டிலேயே 'அனல் பறக்கும்' கோழிக்கறி செய்வது எப்படி?

வட இந்திய உணவுகளில் தந்தூரி கோழிக்கறிக்கு எப்போதுமே ஒரு தனி இடமுண்டு. வெளிப்பகுதியில் மொறுமொறுப்பாகவும், உள்ளே மென்மையாகவும், புகையின் நறுமணத்துடனும் இருக்கும் இந்த உணவைத் தயாரிக்க, ஒரு பெரிய தந்தூரி அடுப்பு அல்லது நவீன மின்சாதன அடுப்பு (oven) தேவை என்றுதான் பலர் நினைக்கிறார்கள். ஆனால், இந்த இரண்டு உபகரணங்களின் உதவியும் இல்லாமல், நாம் சாதாரணமாக வீட்டில் பயன்படுத்தும் ஒரு கடாயைப் பயன்படுத்தி, அதே சுவையான, புகையின் நறுமணத்துடன் கூடிய தந்தூரி கோழிக்கறியைத் தயாரிக்க முடியும். இந்த ரகசிய முறை, மிகக் குறைந்த நேரத்தில், அதிகமான சுவையுடன் கோழிக்கறியைத் தயாரிக்க உதவும்.

முதலில், தந்தூரி கோழிக்கறிக்குத் தேவையான மசாலா கலவையைப் பற்றிப் பார்க்கலாம். இதுவே இந்தக் கோழிக்கறியின் மொத்த சுவையையும் தீர்மானிக்கும். சுத்தப்படுத்தப்பட்ட கோழியின் மீது கத்தியால் ஆழமான கீறல்களைப் போட வேண்டும். கீறல்கள் ஆழமாக இருந்தால் தான் மசாலா உள்ளே சென்று கோழி மென்மையாக வேகும். மசாலா கலவையை இரண்டு படிநிலைகளில் பூசுவது அவசியம். முதல் படிநிலையில், இஞ்சி பூண்டு விழுது, எலுமிச்சையின் சாறு, உப்பு மற்றும் சிறிதளவு மிளகாய்த்தூள் சேர்த்து, கோழியை சுமார் அரை மணி நேரம் ஊற வைக்க வேண்டும். இது கோழியை மென்மையாக்கும்.

இரண்டாவது மற்றும் முக்கியப் படிநிலையில், அடர்த்தியான புளிப்புத் தயிரை பயன்படுத்த வேண்டும். தயிருடன், காஷ்மீரி மிளகாய்த்தூள் (இது நிறத்திற்காக), வறுத்த சீரகத் தூள், கரம் மசாலா, தனியாத் தூள், மிளகுத்தூள் மற்றும் சிறிதளவு மஞ்சள் தூள் ஆகியவற்றைச் சேர்க்க வேண்டும். இந்தக் கலவையுடன், கோழியின் மஞ்சள் நிறம் மாறாமல், பிரகாசமான சிவப்பு நிறம் கிடைப்பதற்காக, சிறிதளவு இயற்கையான சிவப்பு உணவுச் சாயம் அல்லது பீட்ரூட் சாறு சேர்க்கலாம். இந்தக் கலவையை முதல் படிநிலையில் ஊற வைத்த கோழியின் மீது நன்றாகப் பூசி, குறைந்தது நான்கு மணி நேரம் முதல், அதிகபட்சமாக இரவு முழுவதும் ஃப்ரிட்ஜ்ல் ஊற வைக்க வேண்டும். நீண்ட நேரம் ஊறுவதுதான் தந்தூரி கோழிக்கறியின் மென்மைத்தன்மைக்கு முக்கியக் காரணம்.

ஊற வைத்த கோழியைச் சமைக்கும் முறைதான் இங்குள்ள ரகசியம். ஒரு அடர்த்தியான கடாயை அடுப்பில் வைத்து, சிறிதளவு சமையல் எண்ணெயை மட்டும் சேர்க்க வேண்டும். எண்ணெய் சூடானதும், மசாலா பூசப்பட்ட கோழியின் துண்டுகளைத் தனித்தனியாக, கடாயின் அடிப்பகுதி வரை தொடுமாறு அடுக்கி வைக்க வேண்டும். கடாயை ஒரு மூடியால் இறுக்கமாக மூடி, மிதமான தீயில் விட வேண்டும். இந்த மூடிய கடாய்க்குள், கோழியின் தயிர் மசாலாவிடம் இருந்து வெளியேறும் ஆவியும், நீரும் சேர்ந்து, கோழியை மென்மையாக வேகவைக்கும். சுமார் பத்து முதல் பதினைந்து நிமிடங்கள் ஒரு பக்கத்தைச் சமைத்த பிறகு, கோழியைப் புரட்டிப் போட்டு, மீண்டும் மூடி வைத்துச் சமைக்க வேண்டும்.

கோழி நன்றாக வெந்த பிறகு, தந்தூரியின் உண்மையான சுவையான புகை நறுமணத்தைச் சேர்க்க வேண்டும். இதற்கு ஒரு சிறிய கரித் துண்டைப் பயன்படுத்தலாம். கரித் துண்டைச் சூடாக்கி, ஒரு சிறிய பாத்திரத்தில் கடாய்க்குள் கோழியின் நடுவே வைத்து, அதன் மேல் சிறிதளவு நெய் ஊற்றி உடனடியாக மூடி விட வேண்டும். நெய்யும் கரியும் சேர்ந்து வெளிவிடும் புகை, கோழியின் மீது படிந்து, தந்தூரி அடுப்பில் சுட்ட அதே அற்புதமான புகையின் சுவையைச் சேர்க்கும்

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.