வாழ்க்கையில் எதையும் சாதிக்க வயது ஒரு தடையில்லை என்பதற்கு அமெரிக்காவைச் சேர்ந்த 96 வயது மூதாட்டி ஒருவர் சிறந்த உதாரணமாக மாறியுள்ளார். 91 வயது வரை வெளிநாட்டுப் பயணமே மேற்கொள்ளாத இவர், தனது 96 வயதில் உலகின் ஏழு கண்டங்களுக்கும் சென்று சுற்றிப் பார்த்து சாதனை படைத்துள்ளார். அதுவும் தனியாக அல்ல; தனது பேரனுடன் இணைந்து இந்தப் பயணத்தை முடித்துள்ளார். இவரது வாழ்க்கைப் பயணம் தற்போது பலரது கவனத்தையும் ஈர்த்துள்ளது.
அமெரிக்காவின் ஓஹியோ மாகாணத்தைச் சேர்ந்தவர் ஜாய் ரியான். தற்போது 96 வயதாகும் இவர், 'பாட்டி ஜாய்' என்று அன்புடன் அழைக்கப்படுகிறார். இவரது உலகச் சுற்றுப்பயணக் கனவுக்கு துணையாக இருந்தவர் இவரது 45 வயது பேரன் பிராட் ரியான். பல ஆண்டுகளுக்கு முன்பு தொடங்கிய இவர்களது பயணம், தற்போது உலகின் ஏழு கண்டங்களையும் தொட்டுள்ளது. இந்தப் பயணம் திடீரென உருவானது அல்ல. கடந்த 2015-ம் ஆண்டு இலையுதிர் காலத்தில், தனது பாட்டி ஜாய் ரியானைத் தொடர்புகொண்ட பிராட், தன்னுடன் மலைப்பகுதியில் முகாமிட்டு சில நாட்கள் தங்க வருமாறு அழைத்துள்ளார். அதுவரை ஒரு மலையைக் கூட நேரில் பார்த்திராத தனது பாட்டிக்கு புதிய அனுபவங்களைக் கொடுக்க வேண்டும் என்பதே அவரது விருப்பமாக இருந்தது.
இந்த அழைப்பை ஏற்றுக்கொண்ட ஜாய், பேரனுடன் பயணத்தைத் தொடங்கினார். ஆரம்பத்தில் அமெரிக்காவின் பல்வேறு தேசியப் பூங்காக்களுக்குச் சென்றனர். அங்குள்ள இயற்கை அழகு, மலைகள், வனப்பகுதிகள் எனப் பல புதிய இடங்களை இருவரும் ரசித்தனர். இந்தப் பயணம் அவர்களுக்குள் இருந்த உறவையும் மேலும் நெருக்கமாக்கியது. சுமார் 10 ஆண்டுகளாகப் பிரிந்து இருந்த இருவரும், இந்தப் பயணத்தின் மூலம் மீண்டும் நெருக்கமான உறவை உருவாக்கிக் கொண்டனர். அமெரிக்காவில் உள்ள மொத்தம் 63 தேசியப் பூங்காக்களையும் பார்ப்பது இவர்களது அடுத்த இலக்காக மாறியது. அந்த இலக்கையும் கடந்த 2023-ம் ஆண்டு மே மாதத்தில் நிறைவேற்றினர். இதற்குப் பிறகுதான் இவர்களது பயணம் அமெரிக்காவைத் தாண்டி உலக நாடுகளின் பக்கம் திரும்பியது.
வெளிநாடுகளுக்குச் செல்ல ஜாய் ரியானிடம் பாஸ்போர்ட் இல்லை. இதனால் 91 வயதில் முதன்முறையாக அவர் பாஸ்போர்ட் பெற்றார். அதன் பிறகு பேரனுடன் இணைந்து பல்வேறு நாடுகளுக்குப் பயணம் செய்யத் தொடங்கினார். கென்யாவுக்குச் சென்றபோது யானைகளை நேரில் பார்த்து மகிழ்ந்தார். அயர்லாந்துக்குச் சென்றபோது அங்குள்ள பழமையான கோட்டைகளைச் சுற்றிப் பார்த்தார். சமீபத்தில் கடந்த செப்டம்பர் மாதம் இருவரும் தாய்லாந்து மற்றும் ஆஸ்திரேலியாவுக்குச் சென்றனர். இந்தப் பயணத்தின் மூலம் உலகின் ஏழு கண்டங்களையும் பார்வையிட்ட இலக்கை ஜாய் நிறைவு செய்தார். குறிப்பாக ஆஸ்திரேலியாதான் இவர்களது கடைசிப் பயணக் கண்டமாக அமைந்தது. அங்கு கோலா கரடிகளையும் அவற்றின் குட்டிகளையும் பார்த்து ஜாய் மிகவும் மகிழ்ச்சியடைந்தார். ஆஸ்திரேலியா மிகவும் அழகான நாடு என்றும், அங்குள்ள கோலாக்கள் பார்ப்பதற்கு மிகவும் அழகாக இருந்ததாகவும் அவர் தனது மகிழ்ச்சியைப் பகிர்ந்துகொண்டார்.
தாய்லாந்துப் பயணத்தின்போது புத்த துறவிகளுடன் உரையாடியதுடன், அங்குள்ள கோயில்களுக்கும் சென்றுள்ளனர். இந்தப் பயணங்கள் புதிய இடங்களைப் பார்ப்பதோடு மட்டுமல்லாமல், வாழ்க்கையைப் பற்றிய புதிய புரிதல்களையும் தங்களுக்குக் கொடுத்ததாக பிராட் தெரிவித்துள்ளார். கடந்த காலத்தில் இருந்த மனவேதனைகளைத் தாண்டி, மகிழ்ச்சியான புதிய வாழ்க்கையைத் தொடங்க இந்தப் பயணங்கள் உதவியதாகவும் அவர் கூறியுள்ளார். பொதுவாக வயதாகிவிட்டால் பயணம் செய்ய முடியாது, புதிய விஷயங்களை முயற்சி செய்ய முடியாது என்று பலரும் நினைக்கிறார்கள். ஆனால், 91 வயதில் முதல் பாஸ்போர்ட் பெற்று, 96 வயதில் ஏழு கண்டங்களையும் சுற்றி முடித்த ஜாய் ரியானின் வாழ்க்கை அந்த எண்ணத்தையே மாற்றியுள்ளது. வயது அதிகமானாலும் புதிய அனுபவங்களைத் தேடுவதற்கும் கனவுகளை நிறைவேற்றுவதற்கும் மனதில் ஆர்வம் இருந்தால் போதும் என்பதை இந்தப் பாட்டி தனது பயணத்தின் மூலம் நிரூபித்துள்ளார்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.