இந்தியக் குடும்பங்களில் மதிய உணவு என்றாலே அது சாதம் தான். பெரும்பாலான வீடுகளில் நேரத்தைச் சேமிக்க பிரஷர் குக்கரைத் தான் பயன்படுத்துகிறோம். ஆனால், பல நேரங்களில் சாதம் பிசுபிசுப்பாக மாறிவிடும் அல்லது குழைந்து களி போல ஆகிவிடும். குறிப்பாகப் பிரியாணி அல்லது நெய் சாதம் செய்யும்போது, அரிசி ஒன்றுடன் ஒன்று ஒட்டாமல் உதிரியாக இருந்தால் தான் அதன் ருசியே தனி. சாதம் குழையாமல் மல்லிகைப் பூ போல உதிரியாக வருவதற்கு வெறும் தண்ணீர் அளவு மட்டும் காரணமல்ல, நாம் பின்பற்றும் ஒரு சில சின்ன சின்ன நுணுக்கங்களும் தான் காரணம். இல்லத்தரசிகளின் இந்த கவலையைத் தீர்க்கும் ரகசியக் குறிப்புகளை இங்கே விரிவாகப் பார்ப்போம்.
முதலில் அரிசியை ஊறவைக்கும் முறையில் தான் சாதத்தின் பதம் அடங்கியிருக்கிறது. அரிசியைச் சமைப்பதற்கு முன்னால் குறைந்தது 20 முதல் 30 நிமிடங்கள் ஊறவைப்பது அவசியம். ஆனால், அதற்கு முன்னால் அரிசியை மூன்று அல்லது நான்கு முறை நன்றாகக் கழுவ வேண்டும். அரிசியில் இருக்கும் அதிகப்படியான மாவுச்சத்து (Starch) தான் சாதத்தை ஒட்டச் செய்கிறது. தண்ணீர் தெளிவாக வரும் வரை அரிசியைக் கழுவினால், சாதம் பிசுபிசுப்பு இல்லாமல் வரும். அதேபோல், ஊறவைத்த தண்ணீரை முழுமையாக வடித்துவிட்டு, அதன் பிறகு சரியான அளவு தண்ணீரைச் சேர்க்க வேண்டும்.
சாதம் உதிரியாக வர வேண்டும் என்றால், குக்கரில் தண்ணீர் கொதிக்கத் தொடங்கும் போது ஒரு ஸ்பூன் சமையல் எண்ணெய் அல்லது நெய் சேர்க்க வேண்டும். எண்ணெய் சேர்ப்பதால் அரிசி ஒன்றுடன் ஒன்று ஒட்டாமல் தனித்தனியாக வரும். ஒருவேளை நீங்கள் பிரியாணி அல்லது புலாவ் செய்கிறீர்கள் என்றால், அரிசியைச் சேர்ப்பதற்கு முன்னால் ஒரு ஸ்பூன் எலுமிச்சை சாறு சேர்ப்பது மிகச்சிறந்த பலனைத் தரும். எலுமிச்சை சாறு சாதத்திற்கு நல்ல வெண்மை நிறத்தைக் கொடுப்பதோடு, சாதம் குழைந்து போகாமல் தடுக்கும். எலுமிச்சையின் புளிப்பு சுவை சாதத்தில் தெரியாது என்பது கூடுதல் தகவல்.
தண்ணீரின் அளவு மிக மிக முக்கியம். பொதுவாக ஒரு பங்கு அரிசிக்கு இரண்டு பங்கு தண்ணீர் என்பது கணக்கு. ஆனால், பழைய அரிசி என்றால் இரண்டரை பங்கு தண்ணீரும், புதிய அரிசி என்றால் ஒன்றரை பங்கு தண்ணீரும் வைக்க வேண்டும். குக்கரில் விசில் வந்தவுடன் உடனடியாக ஆவியைத் திறக்கக் கூடாது. விசில் அடங்கிய பிறகு, குக்கரைத் திறந்து ஒரு கரண்டியால் சாதத்தை மெதுவாகக் கிளறி விட வேண்டும். சூடாக இருக்கும்போதே பலமாக அழுத்திக் கிளறினால் சாதம் உடைந்துவிடும். எனவே, ஓரங்களில் இருந்து மெதுவாகக் கிளறினால் சாதம் உதிரியாக இருக்கும்.
குக்கரில் சாதம் வைக்கும் போது ஒரு சிறிய துண்டுப் பட்டை அல்லது ஒரு ஏலக்காயைப் போட்டு வைத்தால், சாதம் வாசனையாக இருப்பதோடு செரிமானத்திற்கும் உதவும். சாதம் ஒருவேளை குழைந்துவிட்டது என்று தெரிந்தால், உடனடியாகக் குக்கரில் இருந்து சாதத்தை ஒரு அகலமான தட்டில் கொட்டி ஆறவிடுங்கள். அதன் மேல் சிறிதளவு நல்லெண்ணெய் தெளித்தால் சாதம் ஓரளவுக்குத் தனித்தனியாகப் பிரிந்து வரும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.