பொதுவாக நாம் நீண்ட தூர பயணங்களை மேற்கொள்ளும்போது, அந்தப் பயணத்தின் முடிவு மற்றும் அங்கு நாம் அனுபவிக்கப்போகும் மகிழ்ச்சியைப் பற்றியே அதிகம் சிந்திப்போம். ஆனால், அந்த இடத்தைச் சென்றடைவதற்கு முன் நாம் கடக்க வேண்டிய நீண்ட பயண நேரத்தைப் பற்றிப் பெரிதாகக் கவலைப்படுவதில்லை. விமானத்திலோ, ரயிலிலோ அல்லது பேருந்திலோ மணிக்கணக்கில் ஒரே இடத்தில் அமர்ந்து பயணிப்பது உடலுக்குப் பெரும் சோர்வை ஏற்படுத்தும். கால்களுக்குப் போதிய இடவசதி இல்லாதது, நெருக்கமான இருக்கைகள் மற்றும் அசைவின்றி அமர்ந்திருப்பது போன்றவை முதுகுவலி, கழுத்து வலி மற்றும் உடல் விரைப்பு போன்ற பிரச்சனைகளை உருவாக்கும். கழுத்துத் தலையணைகள் (Neck Pillows) மற்றும் கண் மறைப்பான்கள் (Eye Masks) போன்றவற்றை நாம் வழக்கமாகப் பயன்படுத்துவோம். ஆனால், அனுபவம் வாய்ந்த பயணிகள் மற்றும் மருத்துவர்கள் பரிந்துரைக்கும் ஒரு எளிய மற்றும் ஆச்சரியமான தீர்வு ஒன்று உள்ளது. அதுதான் டென்னிஸ் பந்து. ஆம், உங்கள் பையில் ஒரு சிறிய டென்னிஸ் பந்தை வைத்திருப்பது உங்கள் பயணத்தையே மாற்றியமைக்கும் என்று சொன்னால் உங்களால் நம்ப முடிகிறதா?
நீண்ட நேரம் ஒரே இடத்தில் அசையாமல் அமர்ந்திருக்கும்போது, நமது தசைகள் ஒரே நிலையில் இறுகிப்போகின்றன. இதனால் இரத்த ஓட்டம் குறைந்து, மூட்டுகளில் விறைப்புத்தன்மை ஏற்படுகிறது. குறிப்பாக, கீழ் முதுகு மற்றும் இடுப்புப் பகுதிகளில் அதிக அழுத்தம் உண்டாகிறது. விமானம் அல்லது பேருந்துகளில் உள்ள இருக்கைகள் பெரும்பாலும் வசதியாக இருப்பதில்லை, இதனால் சரியாகக் கால்களை நீட்டவோ அல்லது உடலை வளைக்கவோ முடியாது. இதன் விளைவாக, கழுத்து, தோள்பட்டை மற்றும் கால்களில் வலி உண்டாகி, நீங்கள் போய்ச் சேருவதற்கு முன்பே மிகுந்த சோர்வை அடைந்துவிடுவீர்கள். இந்தப் பிரச்சனையைச் சமாளிக்க, விலையுயர்ந்த மசாஜ் கருவிகள் எதுவும் தேவையில்லை; ஒரு சாதாரண டென்னிஸ் பந்து போதுமானது என்று டெல்லியைச் சேர்ந்த இயன்முறை மருத்துவ நிபுணர் டாக்டர் ஆகாஷ் தீப் சர்மா கூறுகிறார். இந்தச் சிறிய பந்து, பயணத்தின்போது ஏற்படும் உடல் வலிகளைப் போக்க ஒரு சிறந்த கருவியாகச் செயல்படுகிறது.
நீண்ட பயணங்களின்போது பெரும்பாலானோர் சந்திக்கும் முக்கியப் பிரச்சனை கீழ் முதுகுவலி மற்றும் இடுப்பு வலி. இதற்குத் தீர்வு காண, நீங்கள் அமர்ந்திருக்கும்போதே ஒரு டென்னிஸ் பந்தை உங்கள் இடுப்புப் பகுதிக்கு அடியில் வைத்துக்கொள்ளலாம். பின்னர் மெதுவாக உங்கள் உடலை வட்ட வடிவில் அசைக்கும்போது, அந்தப் பந்து தசைகளுக்கு ஒரு மென்மையான அழுத்தத்தைக் கொடுத்து இறுக்கத்தைத் தளர்த்துகிறது. சுமார் ஒரு நிமிடம் வரை இப்படிச் செய்துவிட்டு, பின்னர் மறுபக்கத்திற்கு மாற்றிக்கொள்ளலாம். இது மற்ற பயணிகளுக்கு எந்தவித இடையூறும் இல்லாமல், உங்களுக்குத் தேவையான நிவாரணத்தை வழங்கும் ஒரு எளிய வழிமுறையாகும். இது தசைகளில் உள்ள முடிச்சுகளை விடுவித்து, இரத்த ஓட்டத்தைச் சீராக்க உதவுகிறது.
அடுத்ததாக, விமானம் அல்லது பேருந்து இருக்கைகளில் நீண்ட நேரம் சாய்ந்து உட்கார்ந்திருப்பதால் கழுத்து மற்றும் மேல் முதுகுப் பகுதியில் கடும் வலி ஏற்படும். இதற்கும் டென்னிஸ் பந்து ஒரு சிறந்த தீர்வாக அமைகிறது. உங்கள் இருக்கையைச் சற்றுப் பின்னால் சாய்த்துக்கொண்டு, உங்கள் மேல் முதுகுக்கும் இருக்கைக்கும் நடுவில் டென்னிஸ் பந்தை வைக்க வேண்டும். பின்னர் மெதுவாக உடலை மேலேயும் கீழேயும் அல்லது பக்கவாட்டிலும் அசைக்க வேண்டும். இப்படிச் செய்யும்போது, அந்தப் பந்து முதுகுத் தண்டின் இருபுறமும் உள்ள தசைகளை மசாஜ் செய்து, இறுக்கத்தைப் போக்குகிறது. நீண்ட தூர விமானங்களில் அடிக்கடி எழுந்து நடக்க முடியாத சூழலில், இந்த முறை மிகவும் பயனுள்ளதாக இருக்கும் என்று மருத்துவர்கள் பரிந்துரைக்கின்றனர்.
நீண்ட நேரம் கால்களைத் தொங்கவிட்டபடி அமர்ந்திருப்பதால், கால்கள் மரத்துப்போவது அல்லது கனமாக உணர்வது போன்ற பிரச்சனைகள் ஏற்படும். இது இரத்த ஓட்டம் தடைபடுவதால் நிகழ்கிறது. இதைத் தவிர்க்க, உங்கள் காலணிளைக் கழற்றிவிட்டு, ஒரு டென்னிஸ் பந்தைக் காலடியில் வைத்து முன்னும் பின்னும் உருட்டலாம். சிறிய வட்ட வடிவில் பந்தை உருட்டும்போது, அது பாதங்களில் உள்ள நரம்புகளைத் தூண்டிவிட்டு இரத்த ஓட்டத்தை மேம்படுத்துகிறது. இது கால் வீக்கத்தைக் குறைக்கவும், கால்கள் மரத்துப்போவதைத் தடுக்கவும் உதவுகிறது. மற்றவர்களுக்குத் தெரியாமலேயே இதைச் செய்ய முடியும் என்பது இதன் கூடுதல் சிறப்பு.
பயணச் சோர்வு என்பது உடல் அசைவுகள் இல்லாததாலேயே ஏற்படுகிறது. இந்தச் சிறிய அசைவுகள் மற்றும் அழுத்தங்கள், உடலின் சோர்வை நீக்கிப் புத்துணர்ச்சியை அளிக்கின்றன. டென்னிஸ் பந்தைப் பயன்படுத்தும்போது, அதிக அழுத்தம் கொடுக்காமல் மெதுவாகச் செய்வது அவசியம். வலி உள்ள இடங்களிலோ அல்லது வீக்கம் உள்ள இடங்களிலோ இதைப் பயன்படுத்தக் கூடாது. வலி அதிகமானால் உடனடியாக நிறுத்திவிட வேண்டும். இது ஒரு தற்காலிக நிவாரணி என்றாலும், ஒவ்வொரு 30 நிமிடங்களுக்கும் ஒருமுறை இருக்கையில் அமர்ந்தபடியே உடலை அசைப்பதும், வாய்ப்புக் கிடைக்கும்போது எழுந்து சிறிது தூரம் நடப்பதும் மிக அவசியம். எனவே, அடுத்த முறை நீங்கள் பயணத்திற்குத் தயாராகும்போது, உங்கள் கைப்பையில் மறக்காமல் ஒரு டென்னிஸ் பந்தை எடுத்து வைத்துக்கொள்ளுங்கள். அது உங்கள் பயணத்தை எவ்வளவு சுகமானதாக மாற்றுகிறது என்பதை நீங்களே உணர்வீர்கள்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.