மத்திய அரசு ஊழியர்கள் ஆவலுடன் எதிர்பார்த்து வரும் 8-வது ஊதியக்குழு, வெறும் சம்பள உயர்வு தொடர்பான விஷயமாக மட்டுமின்றி, தற்போது நாடு தழுவிய முக்கிய விவாதமாக மாறியுள்ளது. ஆரம்பத்தில் சம்பள உயர்வு மற்றும் ஓய்வூதியம் தொடர்பான ஆலோசனைகளாகத் தொடங்கிய இந்த விவகாரம், நாட்டின் நிதி நிலைமைக்கு ஏற்ப எவ்வளவு சம்பளத்தை உயர்த்த முடியும் என்ற மிகப்பெரிய கேள்விக்குறிக்கு உள்ளாகியுள்ளது. இந்த விவாதத்தின் மையப்பகுதியில் ஒரு முக்கியமான முன்மொழிவு தற்போது கவனம் பெற்றுள்ளது. அதாவது, சில மூத்த அதிகாரிகளின் சம்பளத்தை 400 சதவீதத்திற்கும் மேலாக உயர்த்தும் வகையில் புதிய ஊதிய திருத்த ஃபார்முலாவை சில சங்கங்கள் முன்வைத்துள்ளன.
இந்திய ரயில்வே தொழில்நுட்ப மேற்பார்வையாளர்கள் சங்கம் (IRTSA), இந்த ஊதிய திருத்த முன்மொழிவை வழங்கியுள்ளது. வழக்கமாக அனைவருக்கும் ஒரே மாதிரியான 'பிட்மென்ட் ஃபேக்டர்' (Fitment Factor) கேட்பதற்கு மாறாக, இந்த முறை ஊழியர்களின் ஊதிய நிலைகளுக்கு ஏற்ப ஐந்து விதமான ஃபேக்டர்களைச் செயல்படுத்த வேண்டும் என்று இந்த சங்கம் பரிந்துரைத்துள்ளது. இது முந்தைய ஊதியக்குழுக்களில் இருந்து முற்றிலும் மாறுபட்ட ஒரு அணுகுமுறையாகும். இந்த முன்மொழிவின்படி, லெவல் 1 முதல் 5 வரையிலான ஊழியர்களுக்கு 2.92 பிட்மென்ட் ஃபேக்டரும், லெவல் 17 முதல் 18 வரையிலான உயர் அதிகாரிகளுக்கு 4.38 பிட்மென்ட் ஃபேக்டரும் வழங்கக் கோரப்பட்டுள்ளது. இது நடைமுறைக்கு வந்தால், தற்போதைய அடிப்படைச் சம்பளம் ரூ. 2.5 லட்சம் வாங்கும் உயர் அதிகாரிக்கு, புதிய கணக்கீட்டின்படி ரூ. 10.95 லட்சம் வரை சம்பளம் உயரும் வாய்ப்பு உள்ளது.
ஊதிய இடைவெளியைச் சரி செய்யவே இந்த முறையைப் பரிந்துரைப்பதாகச் சங்கம் வாதிடுகிறது. தற்போதுள்ள முறையில், ஜூனியர் மற்றும் சீனியர் ஊழியர்களுக்கு இடையிலான சம்பள வேறுபாடு மிகக் குறைவாக இருப்பதாகவும், தொழில்நுட்பப் பணியாளர்கள் மற்றும் பாதுகாப்பு தொடர்பான பணிகளில் இருப்பவர்களுக்கு உரிய ஊதியம் கிடைக்கவில்லை என்றும் அவர்கள் சுட்டிக்காட்டுகின்றனர். மேலும், 50 சதவீத அகவிலைப்படியை அடிப்படைச் சம்பளத்துடன் இணைக்க வேண்டும், வருடாந்திர ஊதிய உயர்வை 5 சதவீதமாக அதிகரிக்க வேண்டும் என்றும் கோரிக்கைகள் எழுந்துள்ளன.
ஒரு ஊதியக்குழுவின் செயல்பாட்டில் 'பிட்மென்ட் ஃபேக்டர்' என்பது மிக முக்கியமான தொழில்நுட்ப வார்த்தையாகும். பழைய அடிப்படைச் சம்பளத்தை இந்த ஃபேக்டரால் பெருக்கினால் தான் புதிய அடிப்படைச் சம்பளம் கிடைக்கும். 7-வது ஊதியக்குழுவில் இது 2.57 ஆக இருந்தது. இப்போது தொழிற்சங்கங்கள் 3.83 முதல் 4.0 வரை உயர்த்தித் தர வேண்டும் என்று கோருகின்றன. தேசிய கவுன்சில் மற்றும் பிற அமைப்புகள் குறைந்தபட்ச அடிப்படைச் சம்பளத்தை ரூ. 69,000 முதல் ரூ. 72,000 வரை நிர்ணயிக்க வேண்டும் என்று அழுத்தம் கொடுத்து வருகின்றன. எனினும், இவ்வளவு பெரிய சம்பள உயர்வை வழங்கினால், அது நாட்டின் பணவீக்கம், ஓய்வூதிய பொறுப்புகள் மற்றும் நிதிச் சுமையை கடுமையாக அதிகரிக்கும் என்பதால், அரசு ஒரு நடுநிலையான பாதையைத் தேடும் என்றே எதிர்பார்க்கப்படுகிறது.
இதற்கிடையில், ஊழியர் சங்கங்கள் "குடும்ப அலகு" (Family Unit) கணக்கீட்டு முறையை மாற்றக் கோரியுள்ளன. பழைய காலத்தை விட இன்றைய வாழ்க்கைச் செலவுகள் மற்றும் கல்வி, மருத்துவச் செலவுகள் அதிகரித்துள்ளதால், குடும்பத்தை 3 நபர்களுக்கான அலகாகக் கருதாமல் 5 நபர்களுக்கான அலகாகக் கருதி சம்பளம் நிர்ணயிக்கப்பட வேண்டும் என்பது ஊழியர்களின் நீண்ட காலக் கோரிக்கை. அதேபோல், பழைய ஓய்வூதியத் திட்டத்தை (OPS) மீண்டும் கொண்டு வர வேண்டும் என்ற கோரிக்கையும் வலுவாக உள்ளது. முழுமையாக அதைச் செயல்படுத்த முடியாது என்றாலும், குறைந்தபட்ச உத்தரவாத ஓய்வூதியம் போன்ற சில பாதுகாப்பு அம்சங்களை வழங்குமாறு சங்கங்கள் வலியுறுத்தி வருகின்றன.
ஓய்வுபெற்ற நீதிபதி ரஞ்சனா பிரகாஷ் தேசாய் தலைமையிலான 8-வது ஊதியக்குழு, தற்போது தீவிர ஆலோசனைக் கட்டத்தில் உள்ளது. டெல்லி மட்டுமின்றி புவனேஸ்வர், லக்னோ, ஐதராபாத், காஷ்மீர் என நாடு முழுவதும் சுற்றுப்பயணம் செய்து ஊழியர்கள் மற்றும் ஓய்வூதியதாரர்களிடம் கருத்துகளைக் கேட்டு வருகிறது. சுமார் 1.1 கோடி பயனாளிகளைப் பாதிக்கும் இந்த பரிந்துரைகள் எப்போது வெளியாகும் என்ற எதிர்பார்ப்பு அரசு ஊழியர்கள் மத்தியில் பெரும் தாக்கத்தை ஏற்படுத்தியுள்ளது. 1946-ல் தொடங்கிய இந்த ஊதியக்குழு மரபு, இந்த முறை பொருளாதார நெருக்கடிக்கு மத்தியில் மிகவும் சிக்கலான சூழலில் விவாதிக்கப்பட்டு வருவது குறிப்பிடத்தக்கது. ஊழியர்களின் எதிர்பார்ப்புகள் ஒருபுறம் இருந்தாலும், நாட்டின் ஒட்டுமொத்த நிதிநிலைமையைக் கருத்தில் கொண்டே அரசு இறுதி முடிவை எடுக்கும் என்று தெரிகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.