ஊழியர்களின் வருங்கால வைப்பு நிதி நிறுவனம் (EPFO), தனது சேவைகளை நவீனப்படுத்தும் முயற்சியாக 'ஈபிஎஃப்ஓ 3.0' என்ற புதிய முறையை அறிமுகப்படுத்த உள்ளது. இதன் மூலம் இனி காகித வேலைகள் இன்றி, யுபிஐ மற்றும் ஏடிஎம் மூலமாகவே பிஎஃப் பணத்தை உடனடியாக எடுக்க முடியும். இந்த வசதி பிஎஃப் கணக்கு வைத்திருப்பவர்களுக்குப் பெரிய வரப்பிரசாதமாக இருந்தாலும், இதனால் தங்களது ஓய்வூதியத் தொகை (Pension) குறைந்துவிடுமோ என்ற அச்சம் பல ஊழியர்களிடையே எழுந்துள்ளது.
பிஎஃப் மற்றும் ஈபிஎஸ் (EPS) ஆகிய இரண்டும் ஈபிஎஃப்ஓ அமைப்பின் கீழ் இருந்தாலும், இவை இரண்டும் தனித்தனியான சேமிப்புத் திட்டங்கள் என்பதை ஊழியர்கள் புரிந்துகொள்ள வேண்டும். ஏடிஎம் மூலம் பணம் எடுக்கும் வசதி என்பது பிஎஃப் இருப்பில் இருக்கும் பணத்திற்கு மட்டுமே பொருந்தும். இதில் ஊழியர் மற்றும் நிறுவனம் பங்களித்த தொகையில், அதிகபட்சமாக 75% வரை மட்டுமே எடுக்க முடியும். ஈபிஎஸ் பென்ஷன் தொகையை இந்த ஏடிஎம் வசதி மூலம் எடுக்க முடியாது என்று தெளிவுபடுத்தப்பட்டுள்ளது.
மத்திய தொழிலாளர் அமைச்சகம் இது குறித்து அளித்துள்ள விளக்கத்தில், 58 வயதில் கிடைக்கும் பென்ஷன் உரிமையில் எந்த மாற்றமும் இல்லை என்று உறுதியளித்துள்ளது. ஒருவர் தனது சேவைக் காலத்தில் 10 ஆண்டுகள் பணிபுரிந்தால் மட்டுமே பென்ஷன் பெறத் தகுதியுடையவர் ஆவார். 50 வயதில் ஒருவர் தனது பிஎஃப் தொகையை எடுத்தாலும், அது அவரது பென்ஷன் சேவைப் பதிவை (EPS service record) பாதிக்காது. அந்த ஊழியர் தொடர்ந்து 10 ஆண்டுகள் பணிபுரிந்திருந்தால், ஓய்வுபெறும் போது பென்ஷன் பெறுவதற்கான தகுதியைத் தொடர்ந்து கொண்டிருப்பார்.
ஈபிஎஃப்ஓ 3.0 என்பது முழுக்க முழுக்க டிஜிட்டல் முறைக்கு மாறுவதற்கான ஒரு முயற்சியாகும். இதனால் பிஎஃப் பணத்தை எடுப்பதிலும், மாற்றுவதிலும் ஏற்படும் காலதாமதம் முற்றிலுமாகத் தவிர்க்கப்படும். இந்த வசதிக்கான சோதனைகள் அனைத்தும் வெற்றிகரமாக முடிந்துவிட்டதாக மத்திய தொழிலாளர் அமைச்சர் மன்சுக் மாண்டவியா சமீபத்தில் தெரிவித்துள்ளார். விரைவில் இந்தச் சேவை பொதுமக்கள் பயன்பாட்டிற்கு வரும் என்று எதிர்பார்க்கப்படுகிறது, ஆனால் இதற்கான சரியான தேதி இன்னும் அறிவிக்கப்படவில்லை.
யுபிஐ (UPI) கட்டண நுழைவாயில் மூலம் பிஎஃப் தொகையை நேரடியாகத் தங்களது வங்கி கணக்கிற்கு மாற்றும் வசதி, தொழில்நுட்ப ரீதியாக முழுமை பெற்றுள்ளது. தற்போது சுமார் 28 லட்சம் கோடி ரூபாய் முதலீடுகளைக் கையாளும் ஈபிஎஃப்ஓ, தனது பாதுகாப்பான மற்றும் அதிக வட்டி தரும் சேவைகள் மூலம் பல கோடி உறுப்பினர்களின் நம்பிக்கையைப் பெற்றுள்ளது. டிஜிட்டல் மாற்றங்கள் மூலம் ஊழியர்களுக்குப் பணத்தை எடுக்கும் வசதி எளிதாக இருந்தாலும், தங்களது எதிர்கால ஓய்வூதியத் திட்டத்திற்கு பாதிப்பு ஏற்படாத வகையில் பணத்தை எடுப்பது மிகவும் அவசியமான ஒன்றாகும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.