"விமானத்தை காப்பாற்றிய இந்திய கேப்டன் ஸ்மித் மச்சார்.." - சிகிச்சைக்குப் பிறகு வெளியான நெகிழ்ச்சி தகவல்!

வானில் ஏற்பட்ட ஆபத்தான சூழ்நிலையில் தன்னையும் பொருட்படுத்தாமல் பயணிகளின் உயிரைக் காப்பாற்ற போராடிய இந்திய விமானி கேப்டன் ஸ்மித் மச்சார் தற்போது மருத்துவ சிகிச்சையில் இருந்து குணமடைந்து வருகிறார். விமானத்தின் காக்பிட்டில் நடந்த தாக்குதலில் படுகாயமடைந்த நிலையிலும், நிலைமையை கட்டுப்பாட்டுக்குள் கொண்டு வர அவர் எடுத்த துணிச்சலான நடவடிக்கை உலகம் முழுவதும் கவனம் பெற்றுள்ளது.

ஆனால், அவரைச் சுற்றி பேசப்படும் வீரக் கதைக்கு பின்னால், அவரது குடும்பம் சந்தித்த பதற்றமும் காத்திருப்பும் இப்போது வெளிச்சத்துக்கு வந்துள்ளது. செப்டம்பர் 30 அன்று துபாயில் இருந்து இஸ்ரேலின் டெல் அவிவ் நகரை நோக்கி புறப்பட்ட ஃப்ளைதுபாய் விமானம் FZ1073-ல் இந்த சம்பவம் நடந்தது. விமானத்தில் சுமார் 174 பயணிகள் மற்றும் பணியாளர்கள் இருந்ததாக தகவல்கள் தெரிவிக்கின்றன.

விமானம் பறந்து கொண்டிருந்தபோது, இணை விமானி கேப்டன் ச்மித் மச்சாரை காக்பிட்டுக்குள் தாக்கியதாக கூறப்படுகிறது. தாக்குதலில் காயமடைந்த போதிலும், அவர் விமானத்தின் பாதுகாப்பை உறுதி செய்யும் முயற்சியை கைவிடவில்லை.

தாக்குதலுக்குப் பிறகு ஏற்பட்ட அவசரநிலையில் விமானம் சவுதி அரேபியாவின் தபூக் நகருக்கு திருப்பி விடப்பட்டு பாதுகாப்பாக தரையிறக்கப்பட்டது. ஸ்மித் மச்சாரின் நடவடிக்கை காரணமாக மிகப்பெரிய விமான விபத்து தவிர்க்கப்பட்டதாக பல்வேறு தரப்புகள் பாராட்டு தெரிவித்துள்ளன. இந்திய பிரதமர் நரேந்திர மோடி உள்ளிட்ட தலைவர்களும் அவரது துணிச்சலை பாராட்டியுள்ளனர். தற்போது ஸ்மித் மச்சார் மருத்துவ சிகிச்சையில் இருந்து வருகிறார்.

அவரது உடல்நிலை குறித்து வெளியான சமீபத்திய தகவல்படி, அவர் நன்றாக குணமடைந்து வருகிறார். இந்திய தூதரக அதிகாரிகளும் அவரது குடும்பத்தினருடன் தொடர்ந்து தொடர்பில் இருப்பதாகவும், அவருக்கு சிறந்த மருத்துவ சிகிச்சை வழங்கப்பட்டு வருவதாகவும் தெரிவிக்கப்பட்டுள்ளது. காயங்கள் குணமடைய இன்னும் சிறிது காலம் தேவைப்படும் என அவரது குடும்பத்தினரும் தெரிவித்துள்ளனர்.

ஸ்மித் மச்சாரின் வீரத்தைப் பற்றி உலகம் பேசிக்கொண்டிருக்கும் நிலையில், அவரது குடும்பம் அந்த நேரத்தை எவ்வாறு எதிர்கொண்டது என்பதும் தற்போது தெரியவந்துள்ளது. சம்பவம் குறித்த தகவல் கிடைத்தவுடன் அவரது மனைவியை தொடர்புகொண்டு அக்கம் பக்கத்தினர் நலம் விசாரித்துள்ளனர். குடும்பத்துக்கு ஏதேனும் உதவி தேவைப்பட்டால் தெரிவிக்குமாறும் கூறியுள்ளனர்.

ஆனால், கடுமையான பதற்றமான சூழ்நிலையிலும் அவரது மனைவி அமைதியாக பதிலளித்ததாக அவர்களது அண்டை வீட்டில் வசிக்கும் மருத்துவர் ஒருவர் சமூக வலைதளத்தில் பகிர்ந்துள்ளார். ஒருவரின் வாழ்க்கை ஆபத்தில் இருக்கும்போது குடும்பத்தினருக்கு ஏற்படும் அச்சத்தை வார்த்தைகளால் விவரிப்பது கடினம்.

அதிலும் வெளிநாட்டில் மருத்துவமனையில் சிகிச்சை பெற்று வரும் நிலையில், நேரடியாக அவரை சந்திக்க முடியாத சூழல் மேலும் கவலையை அதிகரிக்கும். இருந்தபோதிலும், ச்மித் மச்சாரின் குடும்பத்தினர் சூழ்நிலையை தைரியமாக எதிர்கொண்டதாக அவர்களது அண்டை வீட்டினர் தெரிவித்துள்ளனர். குடும்பத்தின் இந்த மன உறுதியும் தற்போது பலரின் கவனத்தை ஈர்த்துள்ளது.

ஸ்மித் மச்சார் மும்பையில் வளர்ந்தவர். சில ஆண்டுகளுக்கு முன்பு துபாய்க்கு குடிபெயர்ந்த அவர், விமானப் பணியில் தொடர்ந்து முன்னேறி வந்துள்ளார். அவரை நீண்ட காலமாக அறிந்த அண்டை வீட்டினர், சிறு வயதிலிருந்தே அவர் அமைதியானவர் என்றும், மற்றவர்களுக்கு உதவ முன்வருபவர் என்றும் நினைவுகூர்ந்துள்ளனர். சிறுவயதில் இருந்தே எந்த சூழ்நிலையிலும் பதற்றப்படாமல் செயல்படும் தன்மை அவரிடம் இருந்ததாக நண்பர்கள் தெரிவித்துள்ளனர்.

அவரது குடும்பத்தினர் தற்போது இந்தியாவிலும், அவர் சிகிச்சை பெறும் இடத்திலும் நிலைமையை தொடர்ந்து கவனித்து வருகின்றனர். அவரது பெற்றோர் அவரைச் சந்திக்க சவுதி அரேபியாவுக்குச் சென்றதாகவும் தகவல்கள் வெளியாகியுள்ளன. மகன் உயிருடன் இருப்பதும், சிகிச்சைக்கு நல்ல முறையில் பதிலளிப்பதும் குடும்பத்துக்கு மிகப்பெரிய நிம்மதியாக அமைந்துள்ளது

இந்த சம்பவத்தில் ஸ்மித் மச்சாரின் துணிச்சல் மட்டுமல்லாமல், ஆபத்தான நேரத்தில் அவரது குடும்பம் காட்டிய மன உறுதியும் கவனத்தை பெற்றுள்ளது. விமானத்தில் நடந்த சில நிமிடங்களின் போராட்டம் உலகம் முழுவதும் செய்தியாக மாறிய நிலையில், அதன் பின்னால் ஒரு குடும்பம் பதற்றத்துடன் காத்திருந்தது. தற்போது ஸ்மித் மச்சார் உடல்நலம் தேறி வருவது அவரது குடும்பத்தினருக்கும், அவரை ஆதரித்து வரும் ஏராளமான மக்களுக்கும் நம்பிக்கையை ஏற்படுத்தியுள்ளது.

விமானத்தில் நடந்த தாக்குதலின் முழுமையான பின்னணி குறித்து விசாரணை தொடர்ந்து நடைபெற்று வரும் நிலையில், ச்மித் மச்சாரின் உடல்நிலை முன்னேற்றம் தற்போது முக்கிய கவனமாக உள்ளது. காயங்களில் இருந்து முழுமையாக குணமடைந்து மீண்டும் தனது வழக்கமான வாழ்க்கைக்கு திரும்ப வேண்டும் என்பதே அவரது குடும்பத்தினரும் அவரை ஆதரிக்கும் மக்களும் எதிர்பார்க்கும் அடுத்த கட்டமாக உள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்