மனிதர்களைப் பிரிப்பது மதமா? அல்லது மனிதர்களை இணைப்பது அன்பா? சில சம்பவங்கள் இந்தக் கேள்விகளுக்கு வார்த்தைகளே இல்லாமல் பதில் சொல்லிவிடும். அப்படியொரு நெகிழ்ச்சியான சம்பவம் கேரளாவில் நிகழ்ந்துள்ளது. குழந்தைகள் இல்லை, நெருங்கிய உறவினர்களும் இல்லை என்ற நிலையில் வாழ்ந்து வந்த 85 வயது இந்து மூதாட்டி உயிரிழந்தபோது, அவருக்கு இறுதிச்சடங்கு செய்ய முன்வந்தவர்கள் அவரது மதத்தைச் சேர்ந்தவர்கள் அல்ல. கிட்டத்தட்ட 50 ஆண்டுகளாக அவருடன் அன்பாகப் பழகி, தங்களது குடும்பத்தில் ஒருவராகவே பார்த்து வந்த இரண்டு முஸ்லிம் சகோதரர்கள்தான் அந்தப் பொறுப்பை ஏற்றுள்ளனர். மத வேறுபாட்டைக் கடந்து அவர்கள் செய்த இந்தச் செயல் தற்போது பலரது பாராட்டுகளையும் பெற்றுள்ளது.
கேரள மாநிலம் வயநாடு மாவட்டத்தில் உள்ள சித்திரகிரி பகுதியில் இந்த நெகிழ்ச்சியான சம்பவம் நடந்துள்ளது. அங்கு வசித்து வந்தவர் கல்யாணி அம்மா (85). அவருக்குக் குழந்தைகள் இல்லை என்றும், இறுதிக்காலத்தில் கவனித்துக்கொள்ள நெருங்கிய உறவினர்கள் யாரும் இல்லை என்றும் கூறப்படுகிறது. தனிமையில் வாழ்ந்து வந்த அவருக்கு, அக்கம் பக்கத்தில் வசித்து வந்த ரஜாக் மற்றும் சுலைமான் என்ற இரண்டு சகோதரர்களின் குடும்பம் மிகப்பெரிய ஆதரவாக இருந்துள்ளது.
சுமார் ஐந்து தசாப்தங்களுக்கு முன்பு அண்டை வீட்டுக்காரர்களாகத் தொடங்கிய இவர்களது உறவு, காலப்போக்கில் குடும்ப உறவாகவே மாறிவிட்டது. கல்யாணி அம்மாவை வெறும் பக்கத்து வீட்டில் வசிக்கும் மூதாட்டியாக அந்தக் குடும்பம் பார்க்கவில்லை. தங்களது குடும்பத்தில் ஒருவராகவே ஏற்றுக்கொண்டனர். அவருக்குத் தேவையான அன்றாட உதவிகளைச் செய்வது, மருந்துகளை வாங்கிக் கொடுப்பது, உடல்நலக் குறைவு ஏற்பட்டால் மருத்துவமனைக்கு அழைத்துச் செல்வது எனத் தொடர்ந்து கவனித்து வந்துள்ளனர்.
வீட்டில் நடைபெறும் குடும்ப நிகழ்ச்சிகள், கொண்டாட்டங்கள் என அனைத்திலும் கல்யாணி அம்மாவுக்கும் இடம் இருந்துள்ளது. அந்தக் குடும்பத்தின் மகிழ்ச்சியிலும் துயரத்திலும் அவரும் பங்கேற்றுள்ளார். இதனால், அவர்களுக்கிடையேயான பாசம் ஆண்டுகள் செல்லச் செல்ல மேலும் வலுவடைந்தது. தனக்குச் சொந்தமாகக் குழந்தைகள் இல்லாத குறையை அந்தக் குடும்பத்தின் அன்பு ஓரளவுக்கு மறக்கச் செய்தது. ரஜாக் மற்றும் சுலைமானைத் தனது சொந்த மகன்களைப் போலவே அவர் கருதி வந்துள்ளார்.
இந்த நிலையில், வயது முதிர்வு காரணமாக கல்யாணி அம்மா உயிரிழந்தார். அவருக்கு இறுதிச்சடங்கு செய்வதற்கு முன்வந்தவர்களும் அந்த இரண்டு சகோதரர்கள்தான். அதிலும், தனது இறுதிக்காலத்தில் ஒரு விருப்பத்தை அவர் அவர்களிடம் தெரிவித்திருந்தார். தான் இறந்த பிறகு, தனது மகன்களாகக் கருதும் ரஜாக் மற்றும் சுலைமான்தான் இந்து முறைப்படி இறுதிச்சடங்குகளைச் செய்ய வேண்டும் என்பதே அந்த விருப்பம்.
கல்யாணி அம்மாவின் கடைசி ஆசையை நிறைவேற்றிய அந்தச் சகோதரர்கள், உள்ளூர் இந்து மயானத்திற்குச் சென்று இந்து மரபுப்படி இறுதிச்சடங்குகளைச் செய்தனர். இறுதியாக அவரது உடலுக்கு தீ மூட்டியும் மரியாதை செலுத்தினர். ஒரு குடும்ப உறுப்பினருக்கு செய்ய வேண்டிய கடமையைப் போலவே அனைத்தையும் அவர்கள் நிறைவேற்றினர். அவர்களது இந்தச் செயல் அப்பகுதி மக்களிடையே நெகிழ்ச்சியை ஏற்படுத்தியுள்ளது.
இந்தச் சம்பவம் கேரள முதல்வர் வி.டி. சதீசனின் கவனத்தையும் ஈர்த்துள்ளது. இதுகுறித்து சமூக வலைதளத்தில் பதிவிட்ட அவர், “நான் அறிந்த, நேசிக்கும், நம்பும் கேரளம் இதுதான்” என்று பாராட்டியுள்ளார். ஒரு தாயின் அன்பு மதத்தைப் பார்த்து வருவதில்லை என்றும், மகனின் கடமை சாதியைக் கேட்பதில்லை என்றும் அவர் குறிப்பிட்டுள்ளார். அன்புக்கு மதம் கிடையாது, கருணைக்கு சாதி கிடையாது என்பதை இந்தச் சம்பவம் அழகாக எடுத்துக்காட்டுவதாகவும் அவர் தெரிவித்துள்ளார்.
இன்றைய காலகட்டத்தில் மதம் மற்றும் சாதி தொடர்பான விவாதங்கள் பல இடங்களில் எழுந்துகொண்டிருக்கும் நிலையில், வயநாட்டில் நடந்த இந்தச் சம்பவம் வேறொரு உண்மையை நமக்கு நினைவூட்டுகிறது. ஐம்பது ஆண்டுகளாகத் தொடர்ந்த அன்பு, இறுதியில் ஒரு மனிதரின் கடைசி ஆசையை நிறைவேற்றும் அளவுக்கு வலிமையானதாக இருந்துள்ளது. உறவுகள் என்பது ரத்தத்தால் மட்டுமே உருவாவதில்லை; அன்பு, அக்கறை, நம்பிக்கை ஆகியவற்றாலும் உருவாகின்றன என்பதை ரஜாக் மற்றும் சுலைமான் சகோதரர்கள் தங்களது செயலால் நிரூபித்துள்ளனர். கல்யாணி அம்மாவுக்கு அவர்கள் செய்தது வெறும் இறுதிச்சடங்கு அல்ல; ஐம்பது ஆண்டுகளாகத் தங்களுடன் வாழ்ந்த ஒரு தாய்க்கு அளித்த கடைசி மரியாதை!
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.