"நடுவானில் திடீரென ஏற்பட்ட உடல்நலக் குறைவு..." - விமானத்திலேயே உயிரிழந்த இந்தியர்!

வெளிநாட்டுப் பயணம் என்பது பலருக்கும் நீண்ட நேரம் விமானத்தில் இருக்க வேண்டிய அனுபவமாக இருக்கும். குறிப்பாக 7 முதல் 10 மணி நேரம் வரை செல்லும் பயணங்களில் பயணிகளின் உடல்நிலையும் முக்கியமானதாகிறது. இப்படியான ஒரு நீண்ட பயணத்தின்போது இந்தியாவைச் சேர்ந்த 58 வயது நபர் ஒருவர் திடீரென உடல்நலக் குறைவால் உயிரிழந்த சம்பவம் சோகத்தை ஏற்படுத்தியுள்ளது. அவருக்கு விமானத்திலேயே முதலுதவி மற்றும் அவசர மருத்துவ உதவி வழங்கப்பட்டும் அவரை காப்பாற்ற முடியவில்லை. கிடைத்த தகவல்களின்படி, அந்த நபர் புதன்கிழமை, செப்டம்பர் 16 அன்று மலேசியா ஏர்லைன்ஸ் விமானத்தில் பயணம் செய்துள்ளார். விமானம் கோலாலம்பூரில் இருந்து ஆஸ்திரேலியாவின் சிட்னி நகரை நோக்கி புறப்பட்டிருந்தது. சுமார் எட்டு மணி நேரம் நீடிக்கும் இந்தப் பயணத்தின்போது நடுவானில் அவருக்கு திடீரென மருத்துவ அவசரநிலை ஏற்பட்டுள்ளது. முதற்கட்ட தகவல்களில், அவருக்கு ஆஸ்துமா பாதிப்பு ஏற்பட்டிருக்கலாம் என்று தெரிவிக்கப்பட்டுள்ளது. எனினும், அதிகாரப்பூர்வமாக மரணத்திற்கான முழுமையான மருத்துவ காரணம் குறித்து கூடுதல் தகவல்கள் வெளியாகவில்லை.

விமானத்தில் இருந்த மற்ற பயணிகளும், விமானப் பணியாளர்களும் நிலைமையை கவனித்ததும் உடனடியாக உதவ முயன்றுள்ளனர். பயணியின் உடல்நிலை மோசமடைந்ததைத் தொடர்ந்து அவருக்கு முதலுதவி அளிக்கப்பட்டது. பின்னர் விமானத்தில் இருந்த மருத்துவப் பயிற்சி பெற்றவர்கள் மற்றும் பணியாளர்கள் இணைந்து அவசர சிகிச்சை நடவடிக்கைகளை மேற்கொண்டனர். புதிய தகவலின்படி, விமானத்தில் இருந்த ஒரு மருத்துவர், மூன்று செவிலியர்கள் மற்றும் ஒரு கேபின் பணியாளர் அவருக்கு உதவியுள்ளனர். இதய நுரையீரல் மீட்பு சிகிச்சையான CPR-ம் மேற்கொள்ளப்பட்டது. இருந்தபோதிலும் அவரை உயிருடன் மீட்க முடியவில்லை. இந்த சம்பவம் நடந்த விமானம் MH141 என அடையாளம் காணப்பட்டுள்ளது. கோலாலம்பூரில் இருந்து புறப்பட்ட விமானம் தொடர்ந்து சிட்னியை நோக்கி சென்ற நிலையில், பயணியின் உடல்நிலை குறித்து விமானக் குழுவினர் தேவையான அவசர நடவடிக்கைகளை மேற்கொண்டுள்ளனர். அவர் ஒரு குடும்ப உறுப்பினருடன் பயணம் செய்ததாகவும் தகவல்கள் தெரிவிக்கின்றன. உயிரிழந்த நபரின் பெயர் மற்றும் பிற தனிப்பட்ட விவரங்கள் இதுவரை பொதுவெளியில் வெளியிடப்படவில்லை.

இந்த சம்பவம் தொடர்பான தகவல் கிடைத்ததும் அதிகாரிகள் விமானம் தரையிறங்கிய பின்னர் விமான நிலையத்திற்கு சென்றுள்ளனர். இங்கு முக்கியமாக கவனிக்க வேண்டிய விஷயம் என்னவென்றால், இந்த மரணம் சந்தேகத்திற்குரியதாக கருதப்படவில்லை என்று நியூ சவுத் வேல்ஸ் காவல்துறை தெரிவித்துள்ளது. எனவே, தற்போதைய நிலையில் இது குற்றச்செயல் தொடர்பான மரணம் என விசாரிக்கப்படவில்லை. மேலும், இந்த விவகாரத்தில் கூடுதல் காவல்துறை நடவடிக்கை எதிர்பார்க்கப்படவில்லை என்றும் அதிகாரிகள் தெரிவித்துள்ளனர். இந்த சம்பவம் நடந்த இடம் ஆஸ்திரேலியாவின் சிட்னி சர்வதேச விமான நிலையம். விமானம் அங்கு உள்ளூர் நேரப்படி மாலை சுமார் 7.43 மணியளவில் தரையிறங்கியதாக தகவல்கள் தெரிவிக்கின்றன. அதற்கு முன்னதாகவே மாலை 5.50 மணியளவில் விமானத்தில் இருந்த 58 வயது பயணி உடல்நலக்குறைவால் பாதிக்கப்பட்டுள்ளதாக அதிகாரிகளுக்கு தகவல் கிடைத்திருந்தது. விமானம் தரையிறங்கிய பின்னர் அவசர சேவைகள் மற்றும் காவல்துறை தேவையான நடவடிக்கைகளை மேற்கொண்டன.

விமானப் பயணத்தின்போது ஆஸ்துமா போன்ற சுவாசப் பிரச்சனைகள் தீவிரமடைவது சிலருக்கு ஆபத்தான சூழ்நிலையை உருவாக்கக்கூடும். ஆஸ்துமா உள்ளவர்களுக்கு மூச்சுக்குழாய்களில் ஏற்படும் அழற்சி மற்றும் சுருக்கம் காரணமாக மூச்சுத்திணறல், இருமல், மார்பு இறுக்கம் போன்ற அறிகுறிகள் ஏற்படலாம். ஆனால், விமானத்தில் ஏற்பட்ட எந்தவொரு திடீர் மூச்சுத்திணறலும் ஆஸ்துமா தாக்குதல்தான் என்று முடிவு செய்ய முடியாது. இதுபோன்ற மருத்துவ அவசரநிலைகளுக்கு பல்வேறு காரணங்கள் இருக்கக்கூடும். நீண்ட நேர விமானப் பயணத்திற்கு முன்பு ஏற்கனவே உடல்நலப் பிரச்சனை உள்ளவர்கள் தங்களுடைய வழக்கமான மருந்துகளை முறையாக எடுத்துச் செல்வது முக்கியம். குறிப்பாக ஆஸ்துமாவுக்கான இன்ஹேலர் அல்லது மருத்துவர் பரிந்துரைத்த அவசர மருந்துகள் இருந்தால், அவற்றை செக்-இன் செய்யும் பைகளில் வைக்காமல் கையில் வைத்திருப்பது பயனுள்ளதாக இருக்கும். பயணத்திற்கு முன்பாக மருத்துவரிடம் ஆலோசனை பெறுவதும் சிலருக்கு அவசியமாக இருக்கலாம்.

அதேபோல், விமானத்தில் பயணம் செய்யும்போது திடீரென மூச்சுத்திணறல், மார்பு இறுக்கம், கடுமையான இருமல், தலைச்சுற்றல் அல்லது சுயநினைவு குறைதல் போன்ற அறிகுறிகள் ஏற்பட்டால் அதை சாதாரணமாக எடுத்துக்கொள்ளக்கூடாது. உடனடியாக கேபின் பணியாளர்களிடம் தெரிவிக்க வேண்டும். விமானங்களில் அவசர மருத்துவ உபகரணங்கள் மற்றும் முதலுதவி வசதிகள் இருப்பதால், விரைவாக தகவல் தெரிவிப்பது உதவியாக இருக்கும். இந்த சம்பவத்தில் விமானக் குழுவினரும், பயணிகளும் உடனடியாக உதவ முயன்ற போதிலும், 58 வயது இந்தியப் பயணியின் உயிரை காப்பாற்ற முடியவில்லை. விமான நிறுவனம் அவரது குடும்பத்தினருக்கு இரங்கல் தெரிவித்ததுடன், இந்த சம்பவத்தால் பாதிக்கப்பட்ட பயணிகளிடம் வருத்தமும் தெரிவித்துள்ளது. சம்பவத்தின் முழுமையான மருத்துவ பின்னணி குறித்து மேலும் தகவல்கள் வெளியாக வேண்டியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்