காங்கிரஸ் நாடாளுமன்றக் குழுத் தலைவரும், மாநிலங்களவை உறுப்பினருமான சோனியா காந்தியின் நினைவுக் குறிப்புப் புத்தகமான ‘பிலாங்கிங்: எ ஜர்னி ஆஃப் லவ்’ (Belonging: A Journey of Love) வெளியாவதற்கு முன்னரே பல்வேறு தடைகளைச் சந்தித்து வருகிறது.
அமெரிக்கப் பதிப்பக நிறுவனமான ஆல்ஃபிரட் ஏ. நாஃப் (Alfred A. Knopf) இந்தப் புத்தகத்தை உலகளவில் வெளியிடுகிறது. இந்தியாவில் இந்தப் புத்தகத்தை வெளியிடும் பொறுப்பு முதலில் பென்குயின் ரேண்டம் ஹவுஸ் இந்தியாவிடம் இருந்ததாகக் கூறப்படுகிறது.
அந்த நிறுவனம், இந்தப் புத்தகத்தை இந்தியாவில் வெளியிடுவதற்கு சில தலையங்க மாற்றங்கள் மற்றும் நீக்கங்களைச் செய்யக் கோரியதாகக் கூறப்படுகிறது. இந்த விவகாரத்தில் ஏற்பட்ட சர்ச்சையைத் தொடர்ந்து, மற்றொரு பிரிட்டிஷ்-அமெரிக்கப் பதிப்பக நிறுவனமான ஹார்பர்காலின்ஸ் இந்தியா, இந்தப் புத்தகத்தை இந்தியாவில் வெளியிட உள்ளதாக இன்று (செப். 4) அறிவித்துள்ளது.
இரண்டாம் உலகப் போருக்குப் பிறகான இத்தாலியில் தனது குழந்தைப் பருவம் தொடங்கி, இந்தியாவில் தனது அரசியல் பயணம் வரை பல்வேறு நிகழ்வுகளை இந்தப் புத்தகத்தில் சோனியா காந்தி பதிவு செய்துள்ளார்.
544 பக்கங்கள் கொண்ட இந்த நூலில், கேம்பிரிட்ஜ் பல்கலைக்கழகத்தில் ராஜீவ் காந்தியைச் சந்தித்தது, 1968-ல் நடைபெற்ற திருமணம் என இளமைக்கால நினைவுகளும், சஞ்சய் காந்தியின் மறைவு, இந்திரா காந்தி மற்றும் ராஜீவ் காந்தியின் படுகொலைகள் போன்ற குடும்பத்தை உலுக்கிய துயரச் சம்பவங்கள் குறித்த அவரது பார்வையும் இடம்பெறும் என எதிர்பார்க்கப்படுகிறது.
அரசியல் ரீதியாக காங்கிரஸ் தலைவராகப் பொறுப்பு வகித்த காலம் மற்றும் 2004-ல் ஐக்கிய முற்போக்குக் கூட்டணி (UPA) ஆட்சி அமைந்தபோது பிரதமர் பதவியை ஏற்க அவர் மறுத்த முடிவு போன்றவற்றை குறித்தும் அறிந்துகொள்ளும் ஆர்வம் ஏற்பட்டுள்ளது.
இதுவரை வெளியான செய்திகளின்படி, பெங்குயின் ரேண்டம் ஹவுஸ் இந்தியா நிறுவனம் இந்தப் புத்தகத்துக்கான ‘ஃபேக்ட்-செக்கிங்’ (Fact-checking) மற்றும் ‘எடிட்டோரியல் ரிவ்யூ’ (Editorial review) பணிகளை மேற்கொண்டபோது, சில பகுதிகளில் மாற்றங்களையோ அல்லது நீக்கங்களையோ பரிந்துரைத்ததாகக் கூறப்படுகிறது.
இந்த மாற்றங்களை சோனியா காந்தி ஏற்க மறுத்ததால், பெங்குயின் இந்தியப் பதிப்பிலிருந்து விலகியதாகத் தகவல்கள் வெளியாகின. ஆனால், இந்தத் தகவலுக்கு பெங்குயின் நிறுவனம் மறுப்பு தெரிவித்துள்ளது.
இரு தரப்புக்கும் இடையே நடைபெற்ற குறிப்பிட்ட எடிட்டோரியல் விவாதங்கள் குறித்து, வாடிக்கையாளர் ரகசியத்தன்மை (Client confidentiality) காரணமாக விரிவாகக் கருத்து தெரிவிக்க முடியாது என்றும் பெங்குயின் விளக்கமளித்துள்ளது.
இதனால், அதிகாரப்பூர்வமாக எதற்காக பெங்குயின் வெளியேறியது என்பது தெளிவாகவில்லை. எனினும், பிரதமர் மோடி தொடர்பான பகுதிகளில் மாற்றங்களைச் செய்யுமாறு பெங்குயின் நிறுவனம் கேட்டதாக ஊடகங்களில் செய்திகள் வெளியாகியுள்ளன.
மத்திய அரசையும், ஆளும் பாஜகவையும் திருப்திப்படுத்தும் வகையில், பிரதமர் நரேந்திர மோடி, ஆர்.எஸ்.எஸ். (RSS) அமைப்பு மற்றும் இந்தியா–சீனா எல்லை விவகாரம் குறித்த சோனியா காந்தியின் கருத்துகளை நீக்குமாறு பெங்குயின் நிறுவனம் அழுத்தம் கொடுத்ததாக காங்கிரஸ் தலைவர்கள், அசோக் கெலாட், கமல் நாத் உள்ளிட்டோர் குற்றம்சாட்டியுள்ளனர்.
நரேந்திர மோடியின் ‘Exam Warriors’ புத்தகம் மற்றும் ஆர்.எஸ்.எஸ். தொடர்பான பல்வேறு நூல்களைப் பதிப்பித்து வெளியிட்டுள்ள பெங்குயின் நிறுவனம், எதிர்க்கட்சித் தலைவரின் நினைவுக் குறிப்புப் புத்தகத்தில் மட்டும் அரசியல் ரீதியான மாற்றங்களைக் கோருவது அதன் அரசியல் சார்பைக் காட்டுவதாகக் காங்கிரஸ் எம்.பி. கெளரவ் கோகோய் சாடியுள்ளார்.
முன்னதாக, முன்னாள் இந்திய ராணுவத் தளபதி ஜெனரல் எம்.எம். நரவணே எழுதிய ‘ஃபோர் ஸ்டார்ஸ் ஆஃப் டெஸ்டினி’ (Four Stars of Destiny) என்ற நினைவுக் குறிப்புப் புத்தகத்தை பெங்குயின் நிறுவனம் வெளியிடவிருந்தது.
இதில், 2020-ல் நடைபெற்ற இந்தியா–சீனா எல்லை மோதல் (கால்வான் மோதல்) மற்றும் ‘அக்னிபத்’ திட்டம் குறித்த விவரங்கள் இடம்பெற்றிருந்தன. பாதுகாப்பு அமைச்சகத்தின் அனுமதி (Clearance) கிடைக்காதது மற்றும் சட்டச் சிக்கல்கள் காரணமாக, இந்தப் புத்தகத்தின் வெளியீட்டை பெங்குயின் நிறுவனம் நிறுத்தி வைத்தது.
அமெரிக்கப் பேராசிரியை வெண்டி டோனிகர் எழுதிய ‘தி இந்துஸ்: அன் ஆல்டர்நேடிவ் ஹிஸ்டரி’ (The Hindus: An Alternative History - 2014) என்ற நூல் இந்து மத உணர்வுகளைப் புண்படுத்துவதாகக் கூறி, ‘சிக்ஷா பச்சாவோ அந்தோலன் சமிதி’ என்ற அமைப்பு நீதிமன்றத்தில் வழக்குத் தொடர்ந்தது.
இதையடுத்து, பெங்குயின் நிறுவனம் நீதிமன்றத்திற்கு வெளியே சமரசம் செய்து கொண்டு, இந்தியாவில் இருந்த அனைத்து புத்தகப் பிரதிகளையும் திரும்பப் பெற்று அழித்தது (Recall and Destroy).
பிரபல கிராஃபிக் நாவலாசிரியர் ஜோ சாக்கோ, 2013-ல் நடைபெற்ற முசாபர்நகர் கலவரம் குறித்து எழுதிய ‘தி ஒன்ஸ் அண்ட் ஃபியூச்சர் ரையட்’ (The Once and Future Riot - 2026) புத்தகத்தின் இந்தியப் பதிப்பை சட்டரீதியான பரிசீலனைக்குப் பிறகு வெளியிட முடியாது என பெங்குயின் நிறுவனம் மறுத்துவிட்டது.
இதுபோன்ற சில சம்பவங்களால், இந்தியாவின் மிகப் பெரிய புத்தகப் பதிப்பு நிறுவனமான பெங்குயின் ரேண்டம் ஹவுஸ் நிறுவனத்தை ‘காவி பெங்குயின்’ என விமர்சித்து வருகின்றனர்.
பொதுவாக, புத்தக வெளியீடுகள் சர்ச்சை ஏற்படும் வரை தலைப்புச் செய்திகளில் இடம்பெறுவது இல்லை. எனவே, வெளியீட்டுக்கு முன்னரே அரசியல் சலசலப்பை ஏற்படுத்தியுள்ள இந்தப் புத்தகம் விற்பனையில் சாதனை படைக்கும் என்ற எதிர்பார்ப்பு எழுந்துள்ளது.
இந்தப் புத்தகம் குறித்து ஹார்பர்காலின்ஸ் நிறுவனம், “நமது காலத்தின் மிகவும் எதிர்பார்க்கப்பட்ட அரசியல் நினைவுக் குறிப்புகளில் ஒன்று” எனக் கூறியிருப்பது கவனிக்கத்தக்கது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.