தமிழகத்தில் வீடு அல்லது மனை வாங்கத் திட்டமிடுபவர்களுக்கு பத்திரப்பதிவு என்பது மிக முக்கியமான நடைமுறையாகும். பல ஆண்டுகள் சேமித்த பணத்தில் சொத்து வாங்கும்போது, அதற்கான ஆவணங்களைத் தயாரிப்பது முதல் சார்பதிவாளர் அலுவலகத்தில் பதிவு செய்வது வரை பல்வேறு நடைமுறைகளை மேற்கொள்ள வேண்டியிருக்கும். குறிப்பாக, பத்திரப்பதிவு செய்வதற்கான நாளையும் நேரத்தையும் முன்கூட்டியே திட்டமிடுவதில் பொதுமக்களுக்கு சில சிரமங்கள் ஏற்படுகின்றன.
இந்நிலையில், தமிழக பதிவுத்துறை சார்பில் அறிமுகப்படுத்தப்பட்டுள்ள STAR 3.0 இணையவழி வசதி மூலம், பொதுமக்கள் தங்களது சொத்து தொடர்பான பத்திரத்தின் வரைவை (Draft Deed) ஆன்லைனிலேயே தயாரித்து, பத்திரப்பதிவுக்கான டோக்கனையும் முன்பதிவு செய்துகொள்ளும் வசதி உள்ளது. இதன் மூலம் பத்திரம் தயாரிப்பதற்காக இடைத்தரகர்களை மட்டுமே சார்ந்திருக்க வேண்டிய அவசியம் குறையக்கூடும்.
STAR 3.0 மூலம் Sale Deed தயாரிப்பது எப்படி?
இந்தப் புதிய வசதியைப் பயன்படுத்த பொதுமக்கள் தமிழக பதிவுத்துறையின் அதிகாரப்பூர்வ இணையதளமான TNREGINET இணையதளத்திற்குச் செல்ல வேண்டும். அங்கு கீழ்க்கண்ட நடைமுறைகளைப் பின்பற்ற வேண்டும்.
பயனர் கணக்கு உருவாக்குதல்
முதலில் TNREGINET இணையதளத்தில் பொதுமக்களுக்கான நுழைவு வசதியைத் தேர்வு செய்து, தங்களது அடிப்படை விவரங்களைப் பதிவு செய்ய வேண்டும். பின்னர் பெயர், மொபைல் எண் உள்ளிட்ட விவரங்களுடன் பயனர் கணக்கு மற்றும் கடவுச்சொல்லை உருவாக்கி உள்நுழைய வேண்டும். ஆவணத்தின் வகையைத் தேர்வு செய்ய வேண்டும்.
தேவையான விவரங்களைப் பதிவு செய்தல்
தேர்வு செய்த ஆவணத்தின் அடிப்படையில் வாங்குபவர், விற்பவர் மற்றும் சாட்சிகளின் விவரங்களைப் பதிவு செய்ய வேண்டும். அதேபோல், சொத்து அமைந்துள்ள இடம், சர்வே எண், சொத்தின் பரப்பளவு, நான்கு எல்லைகள், விற்பனைத் தொகை உள்ளிட்ட தேவையான சொத்து விவரங்களையும் உள்ளீடு செய்ய வேண்டும்.
வரைவு பத்திரம் மற்றும் கட்டணம் செலுத்துதல்
அனைத்து விவரங்களையும் பதிவு செய்த பிறகு, இணையதளமே ஒரு வரைவு பத்திரத்தை உருவாக்கும். அதனைச் சரிபார்த்து, தேவையான திருத்தங்களைச் செய்துகொள்ளலாம். பின்னர் அந்த ஆவணத்தை PDF வடிவில் பதிவிறக்கம் செய்துகொள்ள முடியும். தொடர்ந்து, பொருந்தக்கூடிய முத்திரைக் கட்டணம் மற்றும் பதிவுக் கட்டணத்தை ஆன்லைனில் செலுத்த வேண்டும்.
டோக்கன் பெறுவது எப்படி?
மேற்கண்ட நடைமுறைகளை முடித்ததும், விண்ணப்பதாரருக்கு TP Number எனப்படும் தற்காலிகச் செயலாக்க எண் வழங்கப்படும். இந்த எண்ணைப் பயன்படுத்தி பத்திரப்பதிவுக்கான டோக்கனைப் பெறலாம். அதில் சம்பந்தப்பட்ட சார் பதிவாளர் அலுவலகம், பதிவு செய்ய வேண்டிய தேதி மற்றும் நேரம் ஆகியவற்றைத் தேர்வு செய்து முன்பதிவு செய்துகொள்ள முடியும்.
மேலும், ஏற்கெனவே பதிவு செய்யப்பட்ட சொத்து ஆவணங்களின் விவரங்களைப் புதிய ஆவணத்துடன் இணைக்கும் வசதியும் STAR 3.0-ல் இடம்பெற்றுள்ளது. இதன் மூலம் பழைய ஆவணங்களிலுள்ள தகவல்களை மீண்டும் உள்ளீடு செய்ய வேண்டிய சிரமம் குறையும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்