உலக ஆடை சந்தையில் தனி முத்திரை... திருப்பூரின் வளர்ச்சிக்குப் பின்னால் இருக்கும் ரகசியம்

தமிழ்நாட்டின் தொழில் நகரங்களில் முக்கிய இடத்தைப் பிடித்திருக்கும் திருப்பூர், இன்று இந்தியாவின் பின்னலாடை உற்பத்தியில் தனக்கென ஒரு பெரிய இடத்தை உருவாக்கியுள்ளது. ஒரு நகரத்துக்குள் நூல் தயாரிப்பு முதல் ஆடை தைப்பது, சாயமிடுவது, அச்சிடுவது, இறுதிப்பணி செய்வது, பொதியிடுவது என பல்வேறு தொழில்கள் ஒன்றோடு ஒன்று இணைந்து செயல்படுவது திருப்பூரின் மிகப்பெரிய சிறப்பாக பார்க்கப்படுகிறது. இந்த ஒருங்கிணைந்த தொழில் அமைப்புதான் திருப்பூரை இந்தியாவைத் தாண்டி உலக சந்தையிலும் அறியப்பட்ட நகரமாக மாற்றியுள்ளது.

திருப்பூரின் பின்னலாடை ஏற்றுமதி கடந்த சில ஆண்டுகளில் குறிப்பிடத்தக்க அளவில் வளர்ந்துள்ளது. 2020-21ஆம் ஆண்டில் சுமார் 3.3 பில்லியன் டாலராக இருந்த பின்னலாடை ஏற்றுமதி, 2024-25ஆம் ஆண்டில் 5.3 பில்லியன் டாலராக உயர்ந்துள்ளது. இந்தியாவின் மொத்த பின்னலாடை ஏற்றுமதியில் திருப்பூரின் பங்கு மட்டும் சுமார் 68 சதவீதம் என தெரிவிக்கப்பட்டுள்ளது. இந்த தொழில் அமைப்பு 10 லட்சத்துக்கும் அதிகமான மக்களின் வாழ்வாதாரத்துக்கு ஆதரவாக இருப்பதாகவும், இவர்களில் சுமார் 70 சதவீதம் பெண்கள் என்றும் ஆய்வுகள் சுட்டிக்காட்டுகின்றன. திருப்பூரின் உண்மையான பலம் ஏற்றுமதி எண்ணிக்கையில் மட்டும் இல்லை. நகரத்தையும் அதைச் சுற்றியுள்ள பகுதிகளையும் இணைத்து பார்க்கும்போது, மிகப்பெரிய தொழில் வலையமைப்பு ஒன்று செயல்பட்டு வருகிறது. சுமார் 20 கிலோமீட்டர் சுற்றளவுக்குள் நூல், பின்னல், துணிக்கு சாயம் போடுதல், அச்சிடுதல், ஆடை தைத்தல், இறுதிப்பணி, பொதியிடுதல், பொருட்களை அனுப்புதல் என உற்பத்தியின் பல்வேறு கட்டங்கள் ஒன்றுக்கொன்று அருகிலேயே நடைபெறுகின்றன.

இதனால் ஒரு நிறுவனத்துக்கு தேவையான பல பணிகளை ஒரே இடத்தில் செய்து முடிக்கும் வசதி கிடைக்கிறது. அதே நேரத்தில் ஒவ்வொரு தொழிலிலும் தனித்திறன் பெற்ற நிறுவனங்களும் தொழிலாளர்களும் உருவாகியுள்ளனர். இதன் மூலம் ஒரு பெரிய தொழிற்சாலை மட்டும் வேலைவாய்ப்பை உருவாக்குவது என்ற நிலைக்கு பதிலாக, அதைச் சுற்றியுள்ள ஆயிரக்கணக்கான சிறு மற்றும் நடுத்தர நிறுவனங்களும் வேலைவாய்ப்பை உருவாக்கும் சூழல் ஏற்பட்டுள்ளது. திருப்பூரில் பல்வேறு உற்பத்தி மற்றும் துணைத் தொழில்களில் சுமார் 20,000 நிறுவனங்கள் செயல்படுவதாக கட்டுரை குறிப்பிடுகிறது. இந்த வளர்ச்சி ஒரே நாளில் உருவானது அல்ல. பல ஆண்டுகளாக உள்ளூர் தொழில் முனைவோர், தொழில் அமைப்புகள் மற்றும் அரசு சார்ந்த கட்டமைப்புகள் இணைந்து உருவாக்கிய சூழலே திருப்பூரின் வளர்ச்சிக்கு அடிப்படையாக அமைந்துள்ளது. திருப்பூர் ஏற்றுமதியாளர்கள் சங்கம் உள்ளிட்ட தொழில் அமைப்புகள், தொழில் நிறுவனங்களுக்கிடையிலான ஒத்துழைப்பை அதிகரிக்க உதவியுள்ளன. நெடாஜி அப்பேரல் பார்க் போன்ற தொழில் கட்டமைப்புகளும் நகரத்தின் உற்பத்தித் திறனை விரிவுபடுத்துவதில் பங்கு வகித்துள்ளன.

திருப்பூரின் வளர்ச்சியில் சுற்றுச்சூழல் பாதுகாப்பும் ஒரு முக்கிய கட்டமாக இருந்துள்ளது. கழிவுநீரை முறையாக சுத்திகரித்து வெளியேற்றும் நடைமுறைகளை பின்பற்ற வேண்டிய சூழல் ஏற்பட்டபோது, தொழில் நிறுவனங்கள் இணைந்து கழிவுநீர் சுத்திகரிப்பு வசதிகளில் ரூ.850 கோடிக்கும் அதிகமாக முதலீடு செய்ததாக தெரிவிக்கப்பட்டுள்ளது. இதன் மூலம் தொழில் வளர்ச்சியுடன் சுற்றுச்சூழல் பாதுகாப்பையும் இணைத்து முன்னெடுக்க வேண்டிய அவசியத்தை திருப்பூர் உணர்த்தியுள்ளது. திருப்பூரின் தொழில் வளர்ச்சிக்கு வெளிமாநில தொழிலாளர்களும் முக்கிய பங்காற்றுகின்றனர். ஒடிசா, ஜார்க்கண்ட், பீகார் உள்ளிட்ட பல மாநிலங்களில் இருந்து தொழிலாளர்கள் இங்கு வந்து பணியாற்றுகின்றனர். இதனால் தொழிலாளர்களுக்கு தேவையான தங்குமிடம், அடிப்படை வசதிகள் மற்றும் நீண்ட காலம் பணியில் தொடரும் சூழலை உருவாக்குவது அடுத்த கட்ட சவாலாக உள்ளது.

அதே நேரத்தில், உலக ஆடை சந்தையில் தொடர்ந்து முன்னேற திருப்பூர் புதிய துறைகளிலும் கவனம் செலுத்தி வருகிறது. செயற்கை இழைகள், தொழில்நுட்ப துணிகள் மற்றும் சுற்றுச்சூழலுக்கு ஏற்ற உயர்தர தயாரிப்புகள் போன்ற துறைகளில் விரிவடைவதற்கான முயற்சிகள் மேற்கொள்ளப்படுகின்றன. இதன் மூலம் எதிர்காலத்தில் ஏற்றுமதியையும் வேலைவாய்ப்பையும் மேலும் அதிகரிக்க முடியும் என்ற எதிர்பார்ப்பு உள்ளது. இந்தியாவின் ஆடை மற்றும் துணி ஏற்றுமதியை 2030ஆம் ஆண்டுக்குள் 100 பில்லியன் டாலர் அளவுக்கு கொண்டு செல்லும் இலக்கு முன்வைக்கப்பட்டுள்ளது. தற்போது சுமார் 36 பில்லியன் டாலர் அளவில் இருக்கும் இந்த ஏற்றுமதியை அந்த அளவுக்கு உயர்த்த வேண்டுமானால், திருப்பூர் போன்ற தொழில் மையங்கள் மேலும் பல உருவாக வேண்டும் என ஆய்வாளர்கள் கருதுகின்றனர். ஒரு நகரத்தின் வெற்றியை மட்டும் நாடு முழுவதும் மீண்டும் உருவாக்க முடியாது; அதேபோன்ற தொழில் சூழலை பல பகுதிகளில் உருவாக்குவதே முக்கியம்.

இன்றைய இந்தியாவுக்கு மிகப்பெரிய தேவைகளில் ஒன்று அதிக எண்ணிக்கையிலான தரமான வேலைவாய்ப்புகளை உருவாக்குவது. செயற்கை நுண்ணறிவு, குறைக்கடத்தி போன்ற நவீன துறைகள் எதிர்கால வளர்ச்சிக்கு முக்கியமானவை என்றாலும், அவற்றில் அதிக திறன் கொண்ட பணியாளர்களுக்கே அதிக வாய்ப்புகள் கிடைக்கும். அதற்கு மாறாக, ஆடை உற்பத்தி போன்ற தொழில்கள் குறுகிய கால பயிற்சிக்குப் பிறகும் பலருக்கு வேலைவாய்ப்பு வழங்கக்கூடியவை. அதனால் திருப்பூர் என்பது வெறும் பின்னலாடை நகரம் என்ற அடையாளத்தைத் தாண்டி, ஒரே இடத்தில் பல தொழில்கள் இணைந்து செயல்பட்டால் எப்படி பெரிய வேலைவாய்ப்பு மற்றும் ஏற்றுமதி மையத்தை உருவாக்க முடியும் என்பதற்கான ஒரு முக்கிய உதாரணமாக மாறியுள்ளது. சிறு நிறுவனங்கள், தொழிலாளர்கள், தொழில் அமைப்புகள், உற்பத்தி கட்டமைப்பு மற்றும் ஏற்றுமதி சந்தை ஆகியவை ஒன்றாக இணைந்தால் ஒரு நகரத்தின் பொருளாதார வளர்ச்சி எந்த அளவுக்கு உயர முடியும் என்பதை திருப்பூரின் பயணம் காட்டுகிறது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.