"என்னையவே கழட்டிவிடுறாங்களா.. நான் யாருன்னு காட்டுறேன்" - கூட்டி கழிச்சுப் பார்த்தால் அடுத்து நாம தான்! - சாட்டையை சுழற்றும் விஜய்!?

தமிழ்நாட்டு அரசியல் எப்போதுமே இரு பெரும் திராவிட கட்சிகளான திமுக மற்றும் அதிமுகவை சுற்றியே இருந்து வந்திருக்கிறது. இதற்கு மாற்றாக நான் வருகிறேன் என்று நடிகர் விஜய் என்ட்ரி கொடுத்த நிலையில், தற்போது கூட்டணி கணக்குகள் அவர்கள் எதிர்பார்த்த மாதிரி அமையாமல் போக, சில முக்கிய நகர்வுகளை அவர் மேற்கொண்டிருப்பதாக தகவல்கள் வெளியாகியுள்ளன.

அதிமுக-பாஜக கூட்டணி:

எதிர்வரும் சட்டமன்ற தேர்தலை முன்னிட்டு, 2023-ல் பாஜகவுடன் பிரிந்து சென்ற அதிமுக, 2025-ல் மீண்டும் பாஜகவுடன் கைகோர்த்திருக்கிறது. இந்த கூட்டணி, திமுகவுக்கு எதிரான வாக்குகளை ஒருங்கிணைக்கும் முயற்சியாக பார்க்கப்படுகிறது. மேலும், பாமக மற்றும் தேமுதிக ஆகிய கட்சிகளும் இந்த கூட்டணியில் இணைய வாய்ப்பிருப்பதாக பேசப்படுகிறது. இது அதிமுகவுக்கு பலம் சேர்க்கும் என்றாலும், பாஜகவுடனான கூட்டணி சில சமூக பிரிவுகளின் வாக்குகளை பாதிக்கலாம் என்ற அச்சமும் உள்ளது.

திமுகவின் வலுவான கூட்டணி:

திமுக, காங்கிரஸ், விடுதலை சிறுத்தைகள் கட்சி (விசிக), இந்திய யூனியன் முஸ்லிம் லீக், இடதுசாரி கட்சிகள் என வலுவான கூட்டணியுடன் களத்தில் உள்ளது. 2019 மற்றும் 2024 மக்களவை தேர்தல்களில் இந்த கூட்டணி மாபெரும் வெற்றி பெற்றதால், 2026-லும் இதே வலிமையை தக்கவைக்க திமுக தீவிரமாக உள்ளது.

ஆரம்பத்தில், தவெக அதிமுகவுடன் கூட்டணி அமைக்க முயற்சித்ததாக தகவல்கள் வெளியாகின. தவெகவின் பொதுச்செயலாளர் புஸ்ஸி ஆனந்த், அதிமுக தலைவர் எடப்பாடி பழனிசாமியுடன் (இபிஎஸ்) பேச்சுவார்த்தை நடத்தியதாகவும், ஆனால் விஜய்யின் முதலமைச்சர் வேட்பாளர் கோரிக்கை அதிமுகவால் நிராகரிக்கப்பட்டதாகவும் கூறப்படுகிறது. இதனைத் தொடர்ந்து, அதிமுக பாஜகவுடன் கூட்டணி அமைத்ததால், விஜய்யின் கூட்டணி வாய்ப்புகள் முற்றிலுமாக முடிவுக்கு வந்தன.

விஜய், தனது பொதுக்கூட்டங்களில், "திமுக எனது அரசியல் எதிரி, பாஜக எனது கொள்கை எதிரி" என்று தெளிவாக கூறியிருக்கிறார். இதனால், பாஜகவுடன் கூட்டணி வைத்திருக்கும் அதிமுகவுடன் இணைவது இப்போது சாத்தியமற்றதாகிவிட்டது. மேலும், நாம் தமிழர் கட்சியின் (நாம்தமிழர்) தலைவர் சீமான், "நான் யாருடனும் கூட்டணி வைக்க மாட்டேன், எனக்கு என் அறிவு இருக்கிறது" என்று திட்டவட்டமாக தெரிவித்துவிட்டார். இதனால், விஜய்யின் தவெக தற்போது தனித்து நிற்கிறது.

விடு பார்த்துக்கலாம்

கூட்டணி முயற்சிகள் தோல்வியடைந்த நிலையில், விஜய் தனது கட்சியின் மூத்த நிர்வாகிகளுடன் பேசுகையில் சில விஷயங்களை பகிர்ந்ததாக கூறப்படுகிறது. வெற்றி, தோல்வி முக்கியமல்ல. நாம் எத்தனை சதவீத வாக்குகளைப் பெறுகிறோம் என்பதே முக்கியம். நமது வலிமையை உலகுக்கு காட்ட வேண்டும், என்று விஜய் கூறியதாக தெரிகிறது.

விஜய்யின் இந்த உத்தி, அவரது அரசியல் பயணத்தின் நீண்டகால இலக்குகளை குறிக்கிறது. 2026 தேர்தல், தவெகவுக்கு ஒரு "அறிமுக தேர்தல்" ஆக இருக்கும். இதில், வாக்கு வங்கியை உருவாக்குவதும், தமிழ்நாட்டு அரசியலில் தங்களை ஒரு முக்கிய சக்தியாக நிலைநிறுத்துவதும் தான் விஜய்யின் முதன்மை இலக்காக இருப்பதாக சில நெருங்கிய வட்டாரங்கள் கூறுகின்றன.

விஜய்யின் பலம் மற்றும் சவால்கள்

பலங்கள்:

விஜய்யின் ரசிகர் பட்டாளம், குறிப்பாக இளைஞர்கள் மற்றும் முதல் முறை வாக்காளர்கள், தவெகவுக்கு பெரும் பலமாக இருக்கிறார்கள். இவர்கள், பாரம்பரிய திராவிட கட்சிகளுக்கு மாற்று தேடும் மனநிலையில் உள்ளனர்.

திமுகவின் வாரிசு அரசியல் மற்றும் அதிமுகவின் உட்கட்சி பிரச்சினைகளால் வெறுப்படைந்த வாக்காளர்களுக்கு, விஜய்யின் "புது முகம்" ஒரு கவர்ச்சியாக இருக்கிறது.

தவெக, திராவிட இயக்கத்தின் அடிப்படைகளை ஏற்றுக்கொண்டாலும், மதவெறுப்பு பேச்சுகளை தவிர்ப்பது, அனைத்து சமூகங்களையும் ஈர்க்கும் வகையில் உள்ளது.

சவால்கள்:

தமிழ்நாட்டு அரசியலில் கூட்டணி இல்லாமல் வெற்றி பெறுவது மிகவும் கடினம். 2019 மற்றும் 2021 தேர்தல்களில், திமுக மற்றும் அதிமுகவின் கூட்டணிகள் மட்டுமே பெரும்பான்மை வாக்குகளை பெற்றன.

தவெக ஒரு புதிய கட்சி என்பதால், மாவட்ட மற்றும் கிராம அளவில் வலுவான அமைப்பு இல்லை. இது, தேர்தல் பிரச்சாரத்தையும் வாக்கு சேகரிப்பையும் பாதிக்கலாம்.

வாக்கு வங்கி

இதில் குறிப்பிடத்தகுந்த விஷயம் என்னவெனில், 2026 தேர்தலை ஒரு "முன்னோட்டமாக" பயன்படுத்தி, 2031 தேர்தலுக்கு வாக்கு வங்கியை உருவாக்குவது விஜய்யின் நீண்டகால திட்டம் என்கின்றனர் விவரம் அறிந்தவர்கள். குறிப்பாக, தனக்கு இருக்கும் மாஸ், மக்கள் செல்வாக்கு என எல்லாவற்றையும் கூட்டி கழிச்சுப் பார்த்தால், 12 - 14% வாக்குகள் பெற்றுவிடுவோம் என்று உறுதியாக சொல்கிறாராம் விஜய். அருகில் இருக்கும் புஸ்ஸி ஆனந்த், அதை விட கூட வாங்குவோம் தலைவரே என்கிறாராம்.

ஆனால், அவர்களிடம் இருக்கும் ஒரு குறிப்பிட்ட தேர்தல் வியூக வகுப்பாளார் ஒருவர் மட்டும், 'கொஞ்சம் பிராக்டிக்கலாக பேசுவோம்' என்று அவ்வப்போது இவர்கள் பேச்சுக்கு தடுப்பணை போட்டு வருகிறாராம். எனினும், தான் யோசித்து வைத்திருக்கும் விழுக்காடு பெற்றால், தவெக தமிழ்நாட்டு அரசியலில் ஒரு முக்கிய மாற்று சக்தியாக உருவாகலாம் என்பதில் விஜய் உறுதியாக உள்ளார் என்று கூறப்படுகிறது.

என்ன இருந்தாலும், விஜய்யின் தவெக, 2026 தேர்தலில் தனித்து நிற்க முடிவெடுத்தால் அது ஒரு தைரியமான முடிவு தான். குறுகிய காலத்தில் வெற்றி பெறுவது கடினமாக இருந்தாலும், நீண்டகால அரசியல் இலக்குகளை அடைய ஒரு அடித்தளமாக அமையலாம். விஜய்யின் இளைஞர் ஆதரவு, அவரது திரைப்பட புகழ், மற்றும் திமுக-பாஜக எதிர்ப்பு நிலைப்பாடு ஆகியவை தவெகவுக்கு ஒரு தனித்துவமான இடத்தை தமிழ்நாட்டு அரசியலில் வழங்கலாம். 2026 தேர்தல், விஜய்யின் அரசியல் வலிமையை உலகுக்கு காட்ட ஒரு மேடையாக இருக்கும்.

"வெற்றி, தோல்வி முக்கியமல்ல, வாக்கு விழுக்காடு முக்கியம்" என்ற விஜய்யின் தற்போதைய நிலைப்பாடு, அவரது அரசியல் பயணத்தின் முதல் அத்தியாயத்தை தொடங்கியிருக்கிறது. இந்த பயணம் தமிழ்நாட்டு அரசியலை எவ்வாறு மாற்றும் என்பதை பொறுத்திருந்து பார்ப்போம்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்