30 வயதிலேயே வேலையை விட்டுவிட்டு, வீட்டு வாடகை மூலம் கிடைக்கும் வருமானத்தில் வாழ்க்கையை நடத்த முடியுமா? சீனாவைச் சேர்ந்த இளைஞர் ஒருவர் இதைச் சாத்தியமாக்கியுள்ளார். விலை குறைவான பழைய அடுக்குமாடிக் குடியிருப்புகளை வாங்கி வாடகைக்கு விட்டதன் மூலம் நிதி சுதந்திரத்தைப் பெற்றுள்ள அவர், தற்போது ரியல் எஸ்டேட் முதலீட்டிலிருந்து விலகி பங்குச்சந்தை முதலீடுகளுக்கு மாற முடிவு செய்துள்ளார். அவரது முதலீட்டுப் பயணம் சீனாவில் மட்டுமின்றி, மற்ற நாடுகளிலும் பேசுபொருளாகியுள்ளது.
சீனாவின் வடகிழக்குப் பகுதியில் உள்ள ஜிலின் மாகாணத்தைச் சேர்ந்தவர் ஃபேன் ஜுன்ஜியே. வேலைக்காக ஹுனான் மாகாணத்தில் உள்ள சாங்ஷா நகருக்குச் சென்ற இவர், இணையவழி மருத்துவச் சேவை விற்பனைத் துறையில் பணியாற்றி வந்தார். அப்போது தினமும் சுமார் 18 மணி நேரம் வேலை செய்ய வேண்டியிருந்தது. அதிக வேலைப்பளு, இலக்குகளை எட்ட வேண்டிய அழுத்தம், ஓய்வில்லாத வாழ்க்கை எனத் தொடர்ந்து சிரமங்களைச் சந்தித்தார். இதிலிருந்து வெளியேறி, வேலைக்குச் செல்லாமல் வருமானம் ஈட்டுவதற்கான வழியைத் தேடத் தொடங்கினார். சீனாவின் பெய்ஜிங், ஷாங்காய் போன்ற பெரிய நகரங்களில் வீடுகளின் விலை மிக அதிகமாக இருப்பதை அறிந்திருந்த அவர், சாங்ஷா நகரின் பழைய குடியிருப்புப் பகுதிகளில் வாய்ப்புகளைத் தேடினார். அங்கு பல ஆண்டுகளுக்கு முன்பு கட்டப்பட்ட சிறிய அடுக்குமாடி வீடுகள் குறைந்த விலைக்குக் கிடைத்தன. சில வீடுகளைப் புதுப்பிக்கும் செலவையும் சேர்த்தே சுமார் 3 லட்சம் யுவானுக்குள் வாங்க முடிந்தது. இதை நல்ல முதலீட்டு வாய்ப்பாகப் பார்த்தார்.
இதையடுத்து 2023ஆம் ஆண்டு முதல் அடுத்த இரண்டு ஆண்டுகளில் தொடர்ந்து வீடுகளை வாங்கத் தொடங்கினார். மொத்தம் 14 பழைய குடியிருப்புகளை வாங்குவதற்காக 20 லட்சம் யுவானுக்கும் அதிகமாகச் செலவிட்டார். இந்திய மதிப்பில் இது சுமார் ரூ.2.5 கோடிக்கும் அதிகமாகும். பெரும்பாலான வீடுகள் சியாங்யா மருத்துவமனைக்கு அருகில் அமைந்திருந்தன. மருத்துவமனைக்கு வருபவர்கள், அங்கு பணியாற்றுபவர்கள் ஆகியோரிடம் வாடகை வீடுகளுக்குத் தேவை இருக்கும் என்று அவர் கணக்கிட்டார். வீடுகளை வாங்கிய பிறகு அவற்றைப் புதுப்பித்து வாடகைக்கு விடும் பணியையும் திட்டமிட்டுச் செய்தார். எல்லா வீடுகளுக்கும் ஒரே மாதிரியான அடிப்படை வசதிகளை ஏற்படுத்தினார். பழுதுபார்க்க வேண்டிய சூழல் ஏற்பட்டால் உடனடியாகச் சரிசெய்ய தேவையான உதிரிப் பொருட்களையும் தயாராக வைத்திருந்தார். இதனால் பராமரிப்புப் பணிகளை எளிதாக்க முடிந்தது.
அவர் வாங்கிய 14 வீடுகளில் தற்போது 11 வீடுகள் வாடகைக்கு விடப்பட்டுள்ளன. இதன் மூலம் ஆண்டுக்கு சுமார் 2.1 லட்சம் யுவான் வருமானம் கிடைக்கிறது. இந்திய மதிப்பில் இது ஏறத்தாழ ரூ.29 லட்சமாகும். அவர் வாங்கிய குறைந்த விலையுள்ள வீடு 1.5 லட்சம் யுவானுக்கு வாங்கப்பட்டது. அதிலிருந்து மாதந்தோறும் 1,700 யுவான் வாடகையாகக் கிடைக்கிறது. அதிக விலைக்கு வாங்கிய வீடு வரிகள், தரகு மற்றும் புதுப்பிப்புச் செலவுகளுடன் சுமார் 3.1 லட்சம் யுவான் ஆனது. அதிலிருந்து மாதம் 2,200 யுவான் வாடகை கிடைக்கிறது. இவ்வாறு 30 வயதிலேயே தனது நிதி சுதந்திர இலக்கை எட்டிய ஃபேன், வேலையிலிருந்து விலகி முன்கூட்டியே ஓய்வு பெறும் முடிவை எடுத்தார். ஆனால், வீடுகளை வாங்கி வாடகைக்கு விடுவது நினைத்த அளவுக்கு எளிதானதல்ல என்பதை அனுபவத்தில் உணர்ந்தார். வீடுகளைப் பராமரிப்பது, வாடகைதாரர்களைக் கவனிப்பது, தரகு கட்டணம், வரி, பழுதுபார்ப்புச் செலவு எனப் பல செலவுகள் வருமானத்தின் ஒரு பகுதியைக் குறைத்தன. அதோடு சீனாவில் வீட்டு விலைகள் சரிவதும் தனது முதலீட்டின் மதிப்பு குறையக்கூடும் என்ற கவலையை ஏற்படுத்தியது.
இதனால் அக்டோபர் 26ஆம் தேதி முதல் இனி புதிய வீடுகளை வாங்கப்போவதில்லை என்று அறிவித்தார். அதற்குப் பதிலாக, தனது பணத்தை அதிக ஈவுத்தொகை வழங்கும் பங்குகள் மற்றும் முதலீட்டு நிதிகளில் செலுத்தத் திட்டமிட்டுள்ளார். வீடுகளை வாடகைக்கு விடுவதன் மூலம் கிடைக்கும் வருமானத்தைப் போலவே, பங்குகளிலிருந்து கிடைக்கும் ஈவுத்தொகையும் தொடர்ந்து வருமானத்தைத் தரும் என்பது அவரது கணக்கு. இரண்டுக்கும் இடையே முக்கியமான வேறுபாடு இருப்பதாகவும் அவர் சுட்டிக்காட்டியுள்ளார். ஒரு வீட்டை வாடகைக்கு விடுவதற்கு வாடகைதாரரைத் தேடி, ஒப்பந்தம் செய்து வருமானம் கிடைக்கப் பல வாரங்கள் ஆகலாம். ஆனால், முதலீட்டு நிதிகளை விற்பனை செய்து பணமாக மாற்ற சில நாட்களே போதுமானதாக இருக்கலாம். அதே நேரத்தில், பங்குச்சந்தை முதலீடுகளிலும் பணத்தை இழக்கும் அபாயம் இருப்பதை அவர் ஒப்புக்கொண்டுள்ளார்.
தனது பணம் முழுவதையும் ஒரே முதலீட்டில் வைக்காமல், அவசரத் தேவைக்கான சேமிப்பையும் தனியாக வைத்துள்ளார். அடுத்த ஓரிரு ஆண்டுகளுக்குத் தேவைப்படும் பணத்தை குறைந்த அபாயமுள்ள முதலீடுகளில் வைக்கவும் திட்டமிட்டுள்ளார். தற்போது லாவோஸில் வசித்து வரும் அவர், தனது முதலீட்டு முறையை அனைவரும் அப்படியே பின்பற்ற வேண்டும் என்று கூறவில்லை. ஒவ்வொருவரின் வருமானம், சேமிப்பு, தேவைகள் மற்றும் முதலீட்டு அபாயத்தைத் தாங்கும் திறனைப் பொறுத்தே முடிவுகள் அமைய வேண்டும் என்பதையும் வலியுறுத்தியுள்ளார். குறைந்த விலையில் சொத்துகளை வாங்கி வருமானம் ஈட்டுவது முதல், அந்தச் சொத்துகளை நிர்வகிப்பதில் ஏற்படும் சிரமங்களால் வேறு முதலீட்டுக்கு மாறுவது வரை, ஃபேனின் அனுபவம் ஒரு முக்கியமான விஷயத்தை உணர்த்துகிறது. வருமானம் தரும் சொத்தை வாங்குவது மட்டுமே நிதி சுதந்திரம் அல்ல; அதைப் பராமரிக்கும் செலவு, முதலீட்டின் பாதுகாப்பு, பணத்தைத் தேவைப்படும்போது பயன்படுத்தும் வசதி ஆகியவற்றையும் கணக்கில் எடுத்துக்கொள்ள வேண்டும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.