செயற்கை நுண்ணறிவு (AI) தொழில்நுட்பம் இன்று உலகம் முழுவதும் வேகமாக வளர்ந்து வருகிறது. படிப்பு, வேலை, மருத்துவம், தகவல் தேடல் எனப் பல துறைகளில் AI பயன்பாடு அதிகரித்துள்ளது. குறிப்பாக ChatGPT போன்ற சாட்பாட்கள் மனிதர்களுடன் பேசுவது போலவே பதிலளிப்பதால், சிறுவர்கள் மற்றும் இளைஞர்கள் மத்தியிலும் அவற்றின் பயன்பாடு அதிகரித்துள்ளது. ஆனால், இந்தத் தொழில்நுட்பத்தை உருவாக்கிய நிறுவனத்தின் தலைவரே தனது குழந்தைகள் அதைப் பயன்படுத்துவது குறித்து எச்சரிக்கையுடன் இருப்பதாகத் தெரிவித்துள்ளார். தனது மகனுக்கு AI சாட்பாட் நெருங்கிய நண்பனாக இருப்பதை விரும்பவில்லை என்றும், குழந்தைகள் தொழில்நுட்பத்தைப் பயன்படுத்தும்போது அவர்களுக்கு அதிக பாதுகாப்பு தேவை என்றும் OpenAI நிறுவனத்தின் தலைமைச் செயல் அதிகாரி சாம் ஆல்ட்மேன் கூறியிருப்பது தற்போது கவனம் பெற்றுள்ளது.
சாம் ஆல்ட்மேன் இந்தக் கருத்தை முதன்முதலில் கடந்த 2025ஆம் ஆண்டு மே மாதம் அமெரிக்க செனட் குழுவின் விசாரணையின்போது தெரிவித்திருந்தார். அப்போது செனட்டர் பெர்னி மொரேனோ, ஆல்ட்மேனிடம் அவரது குழந்தைக்கு AI சாட்பாட் சிறந்த நண்பனாக இருப்பதை விரும்புவாரா என்று கேள்வி எழுப்பினார். அதற்கு அவர் நேரடியாக, 'விரும்பவில்லை' என்று பதிலளித்தார். குழந்தைகள் AI தொழில்நுட்பத்துடன் பழகும்போது பெரியவர்களைவிட அதிகமான பாதுகாப்பு விதிமுறைகள் இருக்க வேண்டும் என்றும் வலியுறுத்தினார்.
இதன் தொடர்ச்சியாக, 2026ஆம் ஆண்டு அக்டோபர் 5ஆம் தேதி வெளியான 'வேனிட்டி ஃபேர்' இதழின் நேர்காணலிலும் குழந்தைகள் மற்றும் AI பயன்பாடு குறித்த தனது கருத்துகளை அவர் பகிர்ந்துள்ளார். தனது குழந்தைகள் எந்த வயதில் ChatGPT பயன்படுத்தத் தொடங்கலாம் என்பதை இன்னும் முடிவு செய்யவில்லை என்று கூறியுள்ளார். தற்போதைக்கு அவர்கள் இந்தத் தொழில்நுட்பத்தைப் பயன்படுத்துவதை விரும்பவில்லை என்றும் தெரிவித்துள்ளார். குழந்தைகள் சிறு வயதிலேயே தொழில்நுட்பத்தின் மீது அதிகமாகச் சார்ந்திருப்பது குறித்து தனக்குக் கவலை இருப்பதாகவும் அவர் குறிப்பிட்டுள்ளார்.
குழந்தைகள் வளரும்போது செல்போன் திரையையும் கணினியையும் மட்டும் பார்த்துக்கொண்டிருக்கக் கூடாது என்பது ஆல்ட்மேனின் கருத்தாக உள்ளது. அவர்கள் வெளியில் சென்று விளையாட வேண்டும், இயற்கையுடன் நேரம் செலவிட வேண்டும், மற்ற குழந்தைகளுடன் பழக வேண்டும், நேரடியாக உலகத்தை அனுபவிக்க வேண்டும் என்று அவர் விரும்புகிறார். சிறுவயதிலேயே தொடுதிரை சாதனங்கள் மற்றும் குறுகிய நேரக் காணொளிகளுக்கு அடிமையாகும் பழக்கம் உருவாகிவிடக் கூடாது என்றும் எச்சரித்துள்ளார். வளர்ந்து வரும் குழந்தைகளின் மூளையில் புதிய தொழில்நுட்பங்கள் ஏற்படுத்தக்கூடிய நீண்டகால விளைவுகள் குறித்து இன்னும் தெளிவான ஆய்வுகள் தேவைப்படுவதாகவும் தெரிவித்துள்ளார்.
AI சாட்பாட்கள் வெறும் தகவல்களை வழங்கும் கருவிகளாக மட்டும் இல்லாமல், பயனர்களுடன் தொடர்ந்து உரையாடி அவர்களின் உணர்வுகளைப் புரிந்துகொள்வது போன்ற தோற்றத்தையும் ஏற்படுத்துகின்றன. சில செயலிகள் பயனர்களின் விருப்பங்கள், தனிப்பட்ட அனுபவங்கள் மற்றும் மனநிலைக்கு ஏற்ப பதிலளிக்கின்றன. இதனால் குழந்தைகள் அவற்றை உண்மையான நண்பர்களாகவோ, தங்களுடைய பிரச்சினைகளைப் பகிர்ந்துகொள்ளும் நபர்களாகவோ நினைக்கத் தொடங்கலாம். ஆனால், மனிதர்களைப் போல உணர்ச்சிகளையும் அனுபவங்களையும் கொண்டவை அல்ல AI அமைப்புகள். அவை பயிற்றுவிக்கப்பட்ட தகவல்களின் அடிப்படையில் பதில்களை உருவாக்குகின்றன. இந்த வேறுபாட்டைச் சிறுவர்கள் புரிந்துகொள்வது எளிதானதல்ல என்பதே நிபுணர்களின் முக்கியக் கவலையாக உள்ளது.
அமெரிக்க உளவியல் சங்கம் (APA) கடந்த 2025ஆம் ஆண்டு ஜூன் மாதம் வெளியிட்ட ஆலோசனை அறிக்கையிலும் இதேபோன்ற எச்சரிக்கைகள் இடம்பெற்றுள்ளன. AI சாட்பாட்களுடன் குழந்தைகள் அளவுக்கு அதிகமாக உணர்வுப்பூர்வமான தொடர்பை வளர்த்துக்கொண்டால், உண்மையான மனித உறவுகள் மற்றும் சமூகத் திறன்களின் வளர்ச்சி பாதிக்கப்படலாம் என்று அந்த அமைப்பு குறிப்பிட்டுள்ளது. AI வழங்கும் அனுதாபம் போன்ற பதில்களையும் உண்மையான மனித உணர்வுகளையும் குழந்தைகள் வேறுபடுத்திப் புரிந்துகொள்வது அவசியம் என்றும் வலியுறுத்தியுள்ளது.
அமெரிக்காவைச் சேர்ந்த காமன் சென்ஸ் மீடியா நிறுவனம் நடத்திய ஆய்வும் இளைஞர்களிடையே AI பயன்பாடு எந்த அளவுக்கு அதிகரித்துள்ளது என்பதை வெளிப்படுத்தியுள்ளது. 13 முதல் 17 வயதுக்குட்பட்ட 1,060 சிறுவர்களிடம் நடத்தப்பட்ட ஆய்வில், 72 சதவீதம் பேர் ஏற்கெனவே AI நண்பர் செயலிகளைப் பயன்படுத்தியுள்ளதாகத் தெரியவந்தது. அவர்களில் 52 சதவீதம் பேர் மாதத்தில் குறைந்தது சில முறைகளாவது அவற்றைப் பயன்படுத்துகின்றனர். மேலும், AI நண்பர்களைப் பயன்படுத்தியவர்களில் 33 சதவீதம் பேர் முக்கியமான அல்லது தீவிரமான தனிப்பட்ட பிரச்சினைகளை உண்மையான நபர்களிடம் பேசுவதற்குப் பதிலாக AI உடன் பகிர்ந்துகொண்டதாகக் கூறியுள்ளனர். 24 சதவீதம் பேர் தங்களது பெயர், இருப்பிடம் மற்றும் தனிப்பட்ட ரகசியங்கள் போன்ற தகவல்களையும் பகிர்ந்துள்ளனர்.
இந்த ஆய்வில் ஒரு நேர்மறையான தகவலும் இடம்பெற்றுள்ளது. AI நண்பர்களைப் பயன்படுத்திய சிறுவர்களில் 80 சதவீதம் பேர் AI உடன் செலவிடும் நேரத்தைவிட நிஜ வாழ்க்கை நண்பர்களுடன் அதிக நேரம் செலவிடுவதாகக் கூறியுள்ளனர். மேலும், 67 சதவீதம் பேருக்கு AI உடனான உரையாடலைவிட உண்மையான நண்பர்களுடனான உரையாடலே அதிக திருப்தியை அளிப்பதாகத் தெரிவித்துள்ளனர்.
குழந்தைகளின் பாதுகாப்பு தொடர்பாக ஐக்கிய நாடுகள் சபையின் குழந்தைகள் நல அமைப்பான யுனிசெஃப் அமைப்பும் வழிகாட்டுதல்களை வெளியிட்டுள்ளது. AI செயலிகள் குழந்தைகளின் தனிப்பட்ட தகவல்களைப் பாதுகாக்க வேண்டும், அவை உருவாக்கும் பதில்கள் செயற்கையானவை என்பதைத் தெளிவுபடுத்த வேண்டும், வயதுக்கு ஏற்ற பாதுகாப்பு விதிமுறைகளைப் பின்பற்ற வேண்டும் என்று வலியுறுத்தியுள்ளது. அதே நேரத்தில் கல்வி, படைப்பாற்றல் மற்றும் தகவல் அறிதல் போன்றவற்றில் AI குழந்தைகளுக்கு உதவக்கூடும் என்பதையும் அந்த அமைப்பு ஏற்றுக்கொண்டுள்ளது.
இதன் மூலம் AI தொழில்நுட்பத்தை குழந்தைகள் பயன்படுத்தவே கூடாது என்பதல்ல முக்கியமான விவாதம். எந்த வயதில், எவ்வளவு நேரம், எதற்காகப் பயன்படுத்த வேண்டும் என்பதுதான் கவனிக்க வேண்டிய விஷயம். பெற்றோர்களின் கண்காணிப்பு, வயதுக்கு ஏற்ற கட்டுப்பாடுகள் மற்றும் தனிப்பட்ட தகவல்களைப் பகிரக்கூடாது என்ற விழிப்புணர்வு ஆகியவை அவசியம். AI வளர்ச்சி தவிர்க்க முடியாததாக இருந்தாலும், குழந்தைகளின் உண்மையான நட்பு, விளையாட்டு, குடும்ப உறவுகள் மற்றும் இயல்பான வளர்ச்சிக்கு அது மாற்றாக மாறிவிடக் கூடாது என்பதே இந்த விவாதத்தின் முக்கியமான செய்தியாக உள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.