உலகிலேயே மிக ஆபத்தான 'டெத் ஜோன்'! சிகரத்தைத் தொட்டும் ஏன் உயிருடன் திரும்ப முடிவதில்லை?

உலகிலேயே மிக உயரமான மவுண்ட் எவரெஸ்ட் சிகரத்தை (8,849 மீட்டர்) எப்படியாவது தொட்டுவிட வேண்டும் என்பது உலகெங்கிலும் உள்ள பல கிளைம்பர்களின் வாழ்நாள் கனவாக உள்ளது. இதற்காகப் பல லட்சம் ரூபாய் பணத்தைச் செலவு செய்து, தங்களின் உயிரையும் பணயம் வைத்து ஒவ்வொரு ஆண்டும் கோடை சீசனில் எவரெஸ்ட் நோக்கிப் புறப்படுகிறார்கள். ஆனால், எவரெஸ்ட் சிகரத்தின் இறுதிப் பகுதி என்பது வெறும் கடினமான பாதை மட்டுமல்ல, அது மனித உடல் வாழவே தகுதியற்ற ஒரு கொடூரமான இடமாகும். கடல் மட்டத்திலிருந்து 8,000 மீட்டருக்கும் அதிகமான உயரத்தில் உள்ள இந்தப் பகுதியை விஞ்ஞானிகள் 'மரண மண்டலம்' (Death Zone) என்று அழைக்கிறார்கள். ஏனெனில், இங்கு மனித உடல் தானாகவே மெல்ல மெல்லச் செயல் இழக்கத் தொடங்கிவிடும். ஆக்ஸிஜன் பற்றாக்குறை உள்ளிட்ட பல்வேறு காரணங்களால் இந்த மரண மண்டலத்தில் இதுவரை 340-க்கும் மேற்பட்ட கிளைம்பர்கள் உயிரிழந்துள்ளனர்.

தற்போது நடந்து வரும் 2026 எவரெஸ்ட் சீசனில், இந்த மரண மண்டலத்தின் கொடூரம் மீண்டும் ஒருமுறை உலகிற்கு நிரூபிக்கப்பட்டுள்ளது. இந்த ஆண்டு எவரெஸ்ட் சிகரத்தை அடைய முயன்றவர்களில் குறைந்தது 5 கிளைம்பர்கள் பரிதாபமாக உயிரிழந்துள்ளனர். இதில் சோகம் என்னவென்றால், சிகரத்தை வெற்றிகரமாகத் தொட்டுவிட்டுத் திரும்பிய இரண்டு இந்தியக் கிளைம்பர்களும் இதில் அடங்குவர். அவர்கள் சிகரத்திலிருந்து கீழே இறங்கி வரும்போது, இந்த மரண மண்டலத்தின் மிக ஆபத்தான 'ஹிலாரி ஸ்டெப்' (Hillary Step) என்ற குறுகிய பாதையில் மயங்கி விழுந்து உயிர் இழந்தனர். எவரெஸ்ட் சிகரத்தில் ஏற்படும் அளவுக்கு அதிகமான கூட்டம் (Overcrowding), கடுமையான சோர்வு, தவறான முடிவுகள் மற்றும் தீவிர ஆக்ஸிஜன் பற்றாக்குறை ஆகியவைதான் எவரெஸ்ட்டை பூமியின் மிக மோசமான மரணக் களமாக மாற்றுகின்றன என்று நிபுணர்கள் கூறுகிறார்கள்.

கடல் மட்டத்திலிருந்து 8,000 மீட்டர் (26,247 அடி) உயரத்தில் இந்த மரண மண்டலம் தொடங்குகிறது. இந்த உயரத்தில் நாம் சுவாசிக்கும் காற்றில், சாதாரணத் தரைப்பகுதியில் இருக்கும் ஆக்ஸிஜனில் வெறும் மூன்றில் ஒரு பங்கு (One-third) மட்டுமே இருக்கும். இவ்வளவு குறைவான ஆக்ஸிஜன் அளவிற்கு மனித உடலால் ஒருபோதும் பழகிக்கொள்ளவே முடியாது. எவ்வளவு அனுபவம் வாய்ந்த கிளைம்பராக இருந்தாலும், இங்கு அவர்களின் உடலும் மனமும் மிக வேகமாகப் பலவீனமடையத் தொடங்கும். இதயம் அசுர வேகத்தில் துடிக்கும், மூளைக்குச் செல்லும் ஆக்ஸிஜன் அளவு குறையும், செரிமானம் நின்றுவிடும், உடலின் பேலன்ஸ் குறையும் மற்றும் மிக முக்கியமாகச் சரியாகச் சிந்திக்கும் திறனை மூளை இழந்துவிடும். இந்த இடத்தில் நடப்பதை, "யாரோ கழுத்தை நெரிக்கும் போது ஸ்லோ மோஷனில் நடப்பது போன்ற ஒரு நரக அனுபவம்" என்று கிளைம்பர்கள் விவரிக்கிறார்கள்.

எவரெஸ்ட்டில் கிளைம்பர்களைக் கொல்லும் மிக முக்கியமான அச்சுறுத்தல் 'ஹைபோக்ஸியா' (Hypoxia) எனப்படும் தீவிர ஆக்ஸிஜன் பற்றாக்குறை ஆகும். உடலின் திசுக்களுக்கும் உறுப்புகளுக்கும் தேவையான ஆக்ஸிஜன் செல்லாமல் போகும்போது இந்த நிலை ஏற்படும். எவரெஸ்ட் சிகரத்தின் உச்சியில் காற்றின் அழுத்தம் (Atmospheric pressure) மிகக் குறைவாக இருப்பதால், ஒவ்வொரு முறை மூச்சை இழுக்கும் போதும் மிகக் குறைந்த அளவே ஆக்ஸிஜன் ரத்தத்தில் கலக்கும். மனிதன் உயிர் வாழ்வதற்கான இறுதி எல்லையில்தான் இங்குள்ள கிளைம்பர்கள் போராடிக் கொண்டிருக்கிறார்கள். ஆக்ஸிஜன் சிலிண்டர் உதவி இல்லாமல் எவரெஸ்ட் உச்சியில் ஒரு மனிதனைச் சாதாரணமாக இறக்கிவிட்டால், வெறும் 4 நிமிடங்களில் அவர் மயக்கமடைந்து, 6 நிமிடங்களில் மரணமடைந்து விடுவார் என்று விஞ்ஞானிகள் எச்சரிக்கிறார்கள்.

இந்தக் கடுமையான ஆக்ஸிஜன் பற்றாக்குறை முதலில் நமது மூளையைத்தான் தாக்கும். இதனால் கிளைம்பர்கள் குழப்பமடைந்து, தங்களின் திசையை மறந்து, பகுத்தறிவின்றி நடக்கத் தொடங்குவார்கள். சாதாரணமாக எடுக்க வேண்டிய எளிய முடிவுகள் கூட அவர்களுக்கு இமயமலைப் புதிராக மாறிவிடும். பலர் தங்களின் உடல் கட்டுப்பாட்டை இழந்து கீழே விழுவார்கள், அல்லது தங்களைப் பாதுகாக்கும் கயிறுகளை மாட்டிப் பூட்டக் கூட மறந்துவிடுவார்கள். இதனால்தான் எவரெஸ்ட் பயணத்தில் ஆக்ஸிஜன் சிலிண்டர் என்பது ஒரு சாய்ஸ் கிடையாது, அதுதான் அவர்களின் உயிர்நாடி. ஆக்ஸிஜன் சிலிண்டர் இல்லாமல் எவரெஸ்ட் ஏறிய உலகப் புகழ்பெற்ற லெஜண்டரி கிளைம்பர்கள் கூட, சிகரத்தின் அருகே செல்லும் போது தங்களின் மூளை மழுங்கி, கைகால்கள் வேலை செய்யாமல் மந்தமாகிவிட்டதாகப் பதிவு செய்துள்ளனர்.

சிகரத்தை நோக்கிய இறுதிப் பயணம் பொதுவாக 'கேம்ப் 4' (Camp IV) என்ற இடத்திலிருந்து நள்ளிரவில் தொடங்கும், இந்த இடமே மரண மண்டலத்திற்குள்தான் அமைந்துள்ளது. கிளைம்பர்கள் கும்மிருட்டில், அசுர வேகத்தில் வீசும் புயல் காற்றுக்கும், மைனஸ் 35 டிகிரிக்கும் கீழே இருக்கும் உறைபனி குளிருக்கும் நடுவே 10 முதல் 15 மணி நேரம் தொடர்ந்து நடக்க வேண்டும். இத்தகைய கொடூரமான சூழ்நிலையில் ஒரு சிறிய அசைவு கூட ஒட்டுமொத்த உடலையும் உறிஞ்சிவிடும். வெறும் 10 அடிகள் எடுத்து வைப்பதற்குள் பலமுறை நின்று மூச்சு வாங்க வேண்டியிருக்கும். தப்பித்தவறி கைகுறைகளையோ அல்லது மாஸ்க்கையோ கழற்றினால், சில நிமிடங்களிலேயே கைகால்கள் அழுகிப் போகும் 'ஃப்ராஸ்ட்பைட்' (Frostbite) பாதிப்பு ஏற்பட்டுவிடும். இவ்வளவு ஆபத்துகள் இருந்தும், இந்த 2026 சீசனில் சிகரத்தின் அருகே வரலாறு காணாத அளவில் கிளைம்பர்களின் டிராஃபிக் ஜாம் (Traffic jam) ஏற்பட்டுள்ளது. நேபாளப் பகுதியில் இருந்து மட்டுமே ஒரே நாளில் 274 கிளைம்பர்கள் சிகரத்தை அடைய முயன்றதால், மரண மண்டலத்திற்குள் பல மணி நேரம் அவர்கள் காத்துக் கிடக்க நேரிட்டது. இந்தத் தாமதமே பலரின் மரணத்திற்குக் காரணமாகிவிடுகிறது.

பலரும் எவரெஸ்ட்டின் உச்சியை அடைவதுதான் மிக ஆபத்தானது என்று நினைக்கிறார்கள், ஆனால் அது முற்றிலும் தவறு. சிகரத்தைத் தொட்டுவிட்டுக் கீழே இறங்கி வரும்போதுதான் (Descent) அதிகப்படியான கிளைம்பர்கள் உயிரிழக்கிறார்கள். சிகரத்தை அடைந்த மகிழ்ச்சியில் இருக்கும் போதுதான் உடலின் சோர்வு அதன் உச்சக்கட்டத்தை எட்டும், ஆக்ஸிஜன் சப்ளை தீர்ந்து போகத் தொடங்கும், தசைகள் பலவீனமடையும் மற்றும் மூளையின் விழிப்புணர்வு முழுமையாகக் கொலாப்ஸ் ஆகும். இந்தச் சமயத்தில்தான் கிளைம்பர்கள் ஆபத்தான தவறுகளைச் செய்கிறார்கள். கயிற்றை சரியாகப் பூட்டாமல் விடுவது, பனிப்பாறையின் ஓரத்தில் கால் தடுமாறுவது அல்லது பனிமூட்டத்தில் தவறான திசையில் நடப்பது போன்ற ஒரு சிறிய தவறு கூட அடுத்த நொடியே மரணத்தில் கொண்டு போய் முடித்துவிடும். இந்த 2026 சீசனிலும் சிகரத்தை அடைந்துவிட்டுத் திரும்பும் போதுதான் ஹிலாரி ஸ்டெப் அருகே கிளைம்பர்கள் தங்களின் உயிரை விட்டுள்ளனர்.

மரண மண்டலம் என்பது மனித உடலின் ஒவ்வொரு உறுப்பையும் கொடூரமாகத் தாக்கும் ஒரு நரகமாகும். ஆக்ஸிஜன் குறையும் போது மூளையில் ஆபத்தான வீக்கம் ஏற்படும், இதனை 'ஹேஸ்' (HACE) என்று மருத்துவ உலகில் கூறுவார்கள். இதனால் விசித்திரமான மாயத்தோற்றங்கள் (Hallucinations) ஏற்பட்டு, இறுதியில் கோமா நிலைக்குச் சென்றுவிடுவார்கள். இதேபோல், நுரையீரலில் நீர் கோர்த்துக் கொள்ளும் 'ஹேப்' (HAPE) என்ற பாதிப்பு ஏற்பட்டு, கடுமையான மூச்சுத்திணறலும், ரத்த வாந்தியும் உண்டாகும். உடலின் முக்கிய உறுப்புகளைப் பாதுகாக்க ரத்த ஓட்டம் இதயம் மற்றும் வயிற்றுப் பகுதிக்கு மட்டுமே செல்லும் என்பதால், கை, கால் விரல்கள் ரத்தமின்றி உறைந்து போய் அழுகிவிடும். சுருக்கமாகச் சொன்னால், 8,000 மீட்டருக்கு மேல் மனிதன் உயிர் வாழ்வது என்பது முற்றிலும் தற்காலிகமானதுதான். வேகமாக ஏறி, சிகரத்தைத் தொட்டுவிட்டு, அடுத்த சில நிமிடங்களிலேயே அங்கிருந்து கீழே இறங்குவது மட்டும்தான் இந்த மரண மண்டலத்திலிருந்து தப்பிப் பிழைப்பதற்கான ஒரே 'கோல்டன் ரூல்' ஆகும்.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்