மத்திய கிழக்கில் நீண்ட காலமாகப் புகைந்து கொண்டிருந்த நெருப்பு, தற்போது ஒரு மாபெரும் போராக வெடித்துள்ளது. கடந்த சில தினங்களுக்கு முன்பு ஈரான் தலைநகர் தெஹ்ரானில் அமெரிக்கா மற்றும் இஸ்ரேல் படைகள் இணைந்து நடத்திய வான்வழித் தாக்குதலில், ஈரானின் உச்சபட்ச அதிகாரமிக்க தலைவரான அயதுல்லா அலி கொமேனி கொல்லப்பட்ட செய்தி உலகையே உலுக்கியுள்ளது. சுமார் 36 ஆண்டுகளுக்கும் மேலாக ஈரானின் ஆன்மீக மற்றும் அரசியல் வழிகாட்டியாக இருந்த ஒரு துருவ நட்சத்திரம் மறைந்தது, அந்நாட்டு மக்களை மட்டுமன்றி உலகெங்கிலும் உள்ள ஷியா முஸ்லிம்களையும் பெரும் சோகத்தில் ஆழ்த்தியுள்ளது.
அயதுல்லா அலி கொமேனி வெறும் ஒரு நாட்டின் தலைவர் மட்டுமல்ல; அவர் ஷியா முஸ்லிம்களின் நம்பிக்கையின் அடையாளமாகத் திகழ்ந்தவர். 1989-ல் அயதுல்லா ருஹொல்லா கொமேனியின் மறைவுக்குப் பிறகு பதவியேற்ற இவர், ஈரானை ஒரு வல்லரசுக்கு இணையாக மாற்றிய பெருமைக்குரியவர். மேற்கத்திய நாடுகளின் கடும் பொருளாதாரத் தடைகளையும், அரசியல் நெருக்கடிகளையும் துணிச்சலுடன் எதிர்கொண்டவர். குறிப்பாக, பாலஸ்தீன விடுதலைக்காக அவர் தொடர்ந்து ஒலித்த குரல், அவரை ஷியா பிரிவினரைத் தாண்டி ஒட்டுமொத்த இஸ்லாமிய உலகத்தின் மரியாதைக்குரிய தலைவராக மாற்றியிருந்தது. அவரது மரணம் என்பது ஒரு சகாப்தத்தின் முடிவாகப் பார்க்கப்படுகிறது.
இந்தத் தாக்குதலைத் தொடர்ந்து ஈரானின் பல்வேறு பகுதிகளில் மக்கள் வீதிகளில் இறங்கிப் போராடி வருகின்றனர். 'அமெரிக்காவிற்கு மரணம்', 'இஸ்ரேலுக்கு மரணம்' என்ற முழக்கங்கள் தெஹ்ரான் முதல் மஷாத் வரை எதிரொலிக்கின்றன. ஈரானிய அரசாங்கம் 40 நாட்கள் துக்கம் அனுசரிப்பதாக அறிவித்துள்ளது. அலி கொமேனியின் மறைவு ஈரானின் ஆட்சி அதிகாரத்தில் ஒரு மிகப்பெரிய வெற்றிடத்தை உருவாக்கியுள்ள போதிலும், அந்நாட்டின் புரட்சிகர பாதுகாப்புப் படை பழிவாங்கும் நடவடிக்கைகளில் தீவிரம் காட்டி வருகிறது. இஸ்ரேலின் முக்கிய நகரங்களைக் குறிவைத்து ஈரானிய ஏவுகணைகள் பாய்ந்து வருவதால், போர் இன்னும் தீவிரமடையும் அபாயம் ஏற்பட்டுள்ளது.
இந்தியாவிலும் அலி கொமேனியின் மறைவு எதிரொலித்துள்ளது. காஷ்மீர் முதல் ஐதராபாத் வரை பல இடங்களில் ஷியா முஸ்லிம்கள் கருப்புக்கொடி ஏந்தி ஊர்வலங்களை நடத்தி வருகின்றனர். பல இடங்களில் கடைகள் அடைக்கப்பட்டுள்ளன. அலி கொமேனிக்கும் இந்தியாவிற்கும் ஒரு நீண்டகாலத் தொடர்பு உண்டு. குறிப்பாக, இந்திய முஸ்லிம்களின் விவகாரங்களில் அவர் காட்டிய அக்கறை மற்றும் காஷ்மீர் விவகாரத்தில் அவர் எடுத்த நிலைப்பாடுகள் அவரை இங்குள்ள மக்களிடையே ஒரு செல்வாக்கு மிக்க தலைவராக மாற்றியிருந்தது. லக்னோ மற்றும் மும்பை போன்ற நகரங்களில் அவருக்காகப் பிரார்த்தனைக் கூட்டங்கள் நடத்தப்பட்டு வருகின்றன.
தற்போது ஈரானில் ஒரு தற்காலிகத் தலைமைக் குழு அமைக்கப்பட்டுள்ள போதிலும், அலி கொமேனியின் இடத்தைப் பூர்த்தி செய்வது மிகக் கடினமான காரியம் என்று அரசியல் ஆய்வாளர்கள் கருதுகின்றனர். அமெரிக்கா மற்றும் இஸ்ரேலின் இந்த அதிரடி நடவடிக்கை ஈரானின் ஆட்சியை வீழ்த்துவதை நோக்கமாகக் கொண்டிருந்தாலும், அது மாறாக மக்களை இன்னும் ஒன்றுதிரட்டி, மேற்கத்திய நாடுகளுக்கு எதிரான மனநிலையைத் தீவிரப்படுத்தியுள்ளது. மத்திய கிழக்கில் ஏற்பட்டுள்ள இந்தப் போர்ச் சூழல், உலகப் பொருளாதாரத்திலும், குறிப்பாகக் கச்சா எண்ணெய் விலையிலும் மிகப்பெரிய தாக்கத்தை ஏற்படுத்தும் என்று அஞ்சப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.