மத்திய கிழக்கு நாடுகளில் அமெரிக்காவிற்கும் ஈரானுக்கும் இடையே வெடித்துள்ள நேரடிப் போர்ச் சூழல், சர்வதேச அரசியலில் ஒரு மிகப்பெரிய மாற்றத்தைக் கொண்டு வந்துள்ளது. உலகையே தனது கட்டுப்பாட்டில் வைத்திருந்த அமெரிக்கா என்னும் வல்லரசு (Superpower), இன்று ஈரானின் தந்திரமான ராணுவ உத்திகளுக்கு முன்னால் திணறி வருவதாகச் சர்வதேச அரசியல் விமர்சகர்கள் கருத்து தெரிவித்துள்ளனர். ஈரானின் புதிய தலைமை மற்றும் ராணுவ அமைப்பான ஐ.ஆர்.ஜி.சி (IRGC) எடுத்த அதிரடி முடிவுகள் அமெரிக்காவை சர்வதேச அரங்கில் ஒரு பலவீனமான நாடாகக் காட்டத் தொடங்கியுள்ளன.
சமீபத்தில் முஸ் நீரிணை (Strait of Hormuz) அருகே அமெரிக்காவின் அதிநவீன 'அப்பாச்சி ஹெலிகாப்டர்' ஒன்றை ஈரான் ராணுவம் சுட்டு வீழ்த்தியது. இந்தச் சம்பவம் அமெரிக்க அதிபர் டொனால்ட் ட்ரம்பிற்குப் பெரும் பின்னடைவாகக் கருதப்படுகிறது. இந்தத் தாக்குதலுக்குப் பிறகு ட்ரம்ப் தனது சமூக வலைத்தளமான 'ட்ரூத் சோசியல்' (Truth Social) பக்கத்தில் வெளியிட்ட அறிக்கை, அமெரிக்காவின் வழக்கமான மிரட்டல் தொனியில் இல்லாமல், மிகவும் எச்சரிக்கையுடனும் நிதானத்துடனும் இருந்தது பலரையும் ஆச்சரியப்படுத்தியுள்ளது. மேலும், இஸ்ரேல் மீது ஈரான் ஏவுகணைத் தாக்குதல் நடத்திய போது, ஈரானைத் திருப்பித் தாக்க வேண்டாம் என்று இஸ்ரேல் பிரதமர் பெஞ்சமின் நெதன்யாகுவிடம் ட்ரம்ப் கோரிக்கை வைத்தார்; ஆனால் நெதன்யாகு அதை முழுமையாக நிராகரித்தார். இது மத்திய கிழக்கில் அமெரிக்காவின் செல்வாக்கு எந்தளவுக்குக் குறைந்துள்ளது என்பதைக் காட்டுகிறது.
இதற்கெல்லாம் மேலாக, ஈரானின் முந்தைய அதியுயர் தலைவர் ஆயதுல்லா கமேனியின் மறைவுக்குப் பிறகு, அவரது மகன் மொஜ்தபா (Mojtaba) புதிய தலைவராகப் பொறுப்பேற்றுள்ளார். கமேனியின் காலத்தில் கடைப்பிடிக்கப்பட்ட "மூலோபாய பொறுமை" (Strategic Patience) என்ற கொள்கையை விடுத்து, அமெரிக்காவிற்கு உடனடியாகத் தகுந்த பதிலடி கொடுக்க வேண்டும் என்ற ஆக்ரோஷமான கொள்கையை ஈரானின் புதிய தலைமை எடுத்துள்ளது. இதன் காரணமாகவே அமெரிக்க ராணுவத் தளங்கள் மற்றும் போர்க் கப்பல்களைக் குறிவைத்து ஈரான் தொடர்ந்து தாக்குதல்களை நடத்தி வருகிறது.
அமெரிக்கா தனது பொருளாதாரத் தடைகள் மற்றும் ராணுவ வலிமையைப் பயன்படுத்தி ஈரானை ஒடுக்க நினைத்தது. ஆனால், இன்று ஈரானின் பதிலடிகளால் அமெரிக்கா தனது எல்லையைத் தாண்ட முடியாமல் தவிக்கும் ஒரு "ஏமாற்றமடைந்த வல்லரசாக" (Frustrated Superpower) மாறியுள்ளது என்று சர்வதேச அரசியல் நிபுணர் நரேஷ் கௌஷிக் தனது கட்டுரையில் விரிவாகக் குறிப்பிட்டுள்ளார். இந்தப் போர்ச் சூழல் உலகளவில் கச்சா எண்ணெய் விலை உயர்வு மற்றும் பொருளாதார மந்தநிலையை ஏற்படுத்தியுள்ளதுடன், அமெரிக்காவின் உலகளாவிய ஆதிக்கத்திற்கு ஒரு முற்றுப்புள்ளி வைக்கும் வகையில் அமைந்துள்ளதாகக் கருதப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.