தென்கிழக்கு வங்கக் கடலில் உருவாகியுள்ள குறைந்த காற்றழுத்தத் தாழ்வுப் பகுதி, புயலாக வலுப்பெற்ற நிலையில்,இந்த புயல் நாளை மாலை அல்லது இரவு ஆந்திராவின் மச்சிலிப்பட்டினம் - கலிங்கப்பட்டினம் இடையே கரையை கடக்க வாய்ப்புள்ளதாக இந்திய வானிலை ஆய்வு மையம் எச்சரித்துள்ளது. இந்த வரவிருக்கும் புயலுக்கு 'மோன்தா' என்று பெயரிடப்பட்டுள்ளது. தாய்லாந்து நாடு பரிந்துரைத்த இந்தப் பெயரைக் கேட்டபோது, பொதுவாகப் புயல் என்றால் பேரழிவின் அடையாளமாகக் கருதப்படும் நிலையில், அதற்கு ஏன் மென்மையான பொருள்கொண்ட பெயர் வைக்கப்பட்டுள்ளது என்ற கேள்வி பலருக்கு எழலாம்.
இந்த மோன்தா (Montha) என்ற பெயரானது, தாய்லாந்து மொழியில் 'மணமிக்க மலர்' அல்லது 'அழகான பூ' என்று அர்த்தம் கொள்கிறது. இந்தப் பெயர் எவ்வளவு மென்மையாகவும் அழகாகவும் இருக்கிறதோ, அதே அளவுக்கு இந்தப் புயல் அதன் பெயருக்கு மாறாக, பயங்கரமான தாக்கத்தை ஏற்படுத்தக்கூடும் என்பதால் மக்கள் உஷாராக இருக்குமாறு அறிவுறுத்தப்பட்டுள்ளனர். இந்தப் புயல், அக்டோபர் இருபத்தெட்டாம் தேதி மாலை அல்லது இரவு நேரத்தில் ஆந்திரப் பிரதேசத்தின் மசூலிப்பட்டினம் மற்றும் கலிங்கப்பட்டினம் ஆகியவற்றுக்கு இடையே கரையை கடக்கும் என்று எதிர்பார்க்கப்படுகிறது. அப்போது மணிக்கு தொண்ணூறு முதல் நூறு கிலோமீட்டர் வேகத்தில் காற்று வீசக்கூடும் என்றும், சில சமயங்களில் இதன் வேகம் நூற்றுப் பத்து கிலோமீட்டர் வரை அதிகரிக்கலாம் என்றும் கணிக்கப்பட்டுள்ளது.
இப்படியாக, புயல்களுக்குப் பெயரிடப்படுவது ஏன், யார் பெயரிடுகிறார்கள் என்று பார்த்தால், உலகம் முழுவதும் குறிப்பிட்ட கடல் பகுதிகளில் உருவாகும் புயல்களுக்குப் பெயரிட உலக வானிலை அமைப்பு (WMO) ஒரு விதிமுறையைக் கொண்டுள்ளது. வடக்கு இந்தியப் பெருங்கடல் பகுதியில் (அதாவது அரபிக்கடல் மற்றும் வங்காள விரிகுடா) உருவாகும் புயல்களுக்குப் பெயரிடுவதற்காக, உலக வானிலை அமைப்பு ஒரு குழுவை அமைத்துள்ளது. இதில் இந்தியா, வங்கதேசம், இலங்கை, பாகிஸ்தான், ஓமன், தாய்லாந்து, மியான்மர், மாலத்தீவுகள், கத்தார், ஈரான், சவுதி அரேபியா, ஐக்கிய அரபு அமீரகம் மற்றும் ஏமன் ஆகிய பதின்மூன்று நாடுகள் உறுப்பினர்களாக உள்ளன.
இந்த பதின்மூன்று நாடுகளும் சேர்ந்து, சுழற்சி முறையில் புயல்களுக்குப் பெயர்களைப் பரிந்துரைக்கின்றன. ஒவ்வொரு நாடும் சில பெயர்களைப் பரிந்துரைத்து, அவை அனைத்தும் ஒரு பட்டியலில் வைக்கப்படுகின்றன. இந்த வரிசைப்படி, வங்கக் கடல் அல்லது அரபிக்கடலில் ஒரு புயல் உருவாகி, அது குறிப்பிட்ட வேகத்தை (மணிக்கு அறுபத்திரண்டு கிலோமீட்டர்) அடைந்து, வானிலை ஆய்வு மையத்தால் ‘புயல்’ என அறிவிக்கப்பட்டவுடன், பட்டியலில் உள்ள அடுத்தப் பெயர் சூட்டப்படும். இந்த முறைக்கு ஏற்ப, இதற்கு முந்தைய புயலுக்குப் பெயர் சூட்டப்பட்டதால், இந்தப் புயலுக்கு, தாய்லாந்து வழங்கிய 'மோன்தா' என்ற பெயர் சூட்டப்பட்டுள்ளது. இதற்கு அடுத்து வரக்கூடிய புயலுக்கு ஐக்கிய அரபு அமீரகம் வழங்கிய ‘சென்யார்’ என்ற பெயர் வைக்கப்படும்.
புயல்களுக்குப் பெயரிடுவது ஏன் என்று கேட்டால், அதன் முக்கிய நோக்கம் மக்கள், ஊடகங்கள், மீட்புப் படையினர் மற்றும் விஞ்ஞானிகள் ஆகியோருக்குப் புயலைப் பற்றித் தெளிவாகப் புரிய வைப்பதுதான். ஒரே நேரத்தில் அல்லது தொடர்ந்து பல புயல்கள் உருவாகும்போது, பெயர்கள் இருந்தால் அவற்றைத் தனித்தனியாக அடையாளம் காணவும், பதிவுகளைப் பராமரிக்கவும், பேரிடர் மேலாண்மைக்குப் பயனுள்ள எச்சரிக்கைகளை விரைவாக அனுப்பவும் எளிதாக இருக்கும். இதனால் பொதுமக்கள் உடனடியாக விழிப்படைந்து, புயலை எதிர்கொள்ளத் தயாராக முடியும்.
பெயர்கள் அரசியல், மத நம்பிக்கைகள் அல்லது கலாசார ரீதியான உணர்வுகளைத் தூண்டும் வகையில் இருக்கக் கூடாது என்றும், உச்சரிக்க எளிதாகவும், சுருக்கமாகவும் இருக்க வேண்டும் என்றும் உலக வானிலை அமைப்பு கடுமையான விதிகளை வைத்துள்ளது. மேலும், ஒருமுறை பயன்படுத்தப்பட்ட புயல் பெயரை மீண்டும் பயன்படுத்த மாட்டார்கள். மோன்தா புயல் தற்போது வலுப்பெற்று ஆழ்ந்த காற்றழுத்த தாழ்வு மண்டலமாக மாறியுள்ள நிலையில், இது மேலும் வலுப்பெற்று கடும் புயலாக மாறி, அண்டை மாநிலமான ஆந்திரப் பிரதேசக் கடற்கரையில் தாக்கத்தை ஏற்படுத்தும் என்று கணிக்கப்பட்டுள்ளது. இதன் காரணமாக ஆந்திரப் பிரதேசம், ஒடிசா மற்றும் தமிழகத்தின் சில பகுதிகளில் கனமழை எச்சரிக்கை விடுக்கப்பட்டுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.