மத்திய அமெரிக்காவின் அடர்ந்த காடுகளுக்கு நடுவே, சுமார் இரண்டாயிரம் ஆண்டுகளுக்கு முன்பே வானியல், கணிதம் மற்றும் கட்டிடக்கலையில் உச்சம் தொட்ட ஒரு நாகரிகம் தான் மாயன் நாகரிகம். இன்றைய மெக்சிகோ, குவாத்தமாலா போன்ற நாடுகளில் வாழ்ந்த இந்த மக்கள், தொலைநோக்கிகள் இல்லாத காலத்திலேயே கோள்களின் இயக்கத்தை மிகத் துல்லியமாகக் கணித்தார்கள். அவர்கள் உருவாக்கிய 'மாயன் காலண்டர்' (Mayan Calendar) நவீன காலத்து கணினிகளை விடத் துல்லியமானது என்று சொல்லப்படுகிறது. 2012-ம் ஆண்டு உலகம் அழியும் என்று ஒரு வதந்தி கிளம்பியதே, அது இவர்களுடைய காலண்டர் அந்த ஆண்டில் முடிவடைந்ததை வைத்துத்தான். ஆனால், இவ்வளவு வலிமையான, புத்திசாலித்தனமான ஒரு பேரரசு, அதன் உச்சக்கட்டத்தில் இருந்தபோதே திடீரெனத் தடயமே இல்லாமல் மறைந்து போனதுதான் வரலாற்றின் மிகப்பெரிய மர்மம். அந்த ரகசிய இனத்தின் வீழ்ச்சிக்கான காரணங்களைப் பற்றி இப்போ விரிவா பார்ப்போம்.
மாயன் மக்கள் வெறும் விவசாயிகள் மட்டுமல்ல, அவர்கள் பிரம்மாண்டமான நகரங்களையும், வானத்தைத் தொடும் பிரமிடுகளையும் கட்டிய சிறந்த பொறியாளர்கள். எகிப்திய பிரமிடுகளைப் போலவே இவர்களது பிரமிடுகளும் வானியல் ரகசியங்களை உள்ளடக்கியவை. உதாரணமாக, 'சிச்சென் இட்சா' (Chichen Itza) என்ற இடத்தில் உள்ள பிரமிடு, சூரியன் மறையும்போது ஒரு பாம்பு கீழே இறங்குவது போன்ற நிழல் பிம்பத்தை உருவாக்கும் வகையில் கட்டப்பட்டுள்ளது. இவ்வளவு நுட்பமான அறிவைப் பெற்றிருந்த அந்த மக்கள், கி.பி. 800 முதல் 1000-ம் ஆண்டுகளுக்கு இடைப்பட்ட காலத்தில் தங்கள் நகரங்களை அப்படியே கைவிட்டுவிட்டு எங்கே போனார்கள் என்பது இன்றும் புரியாத புதிராக இருக்கிறது. அவர்கள் வேற்று கிரகவாசிகளுடன் தொடர்பு வைத்திருந்தார்கள் என்றும், அவர்களுடனேயே சென்றுவிட்டார்கள் என்றும் ஒரு தரப்பினர் நம்புகிறார்கள்.
அறிவியல் ரீதியாகப் பார்த்தால், மாயன் நாகரிகத்தின் அழிவுக்கு ஒரு நீண்ட கால 'வறட்சி' (Drought) காரணமாக இருக்கலாம் என்று பல ஆய்வாளர்கள் கருதுகிறார்கள். மாயன் மக்கள் தங்கள் நகரங்களைக் கட்டுவதற்கும், விவசாயம் செய்வதற்கும் காடுகளைப் பெருமளவில் அழித்தார்கள். இது அந்தப் பகுதியின் தட்பவெப்ப நிலையை மாற்றியிருக்கலாம். சுமார் நூறு ஆண்டுகள் நீடித்த கடும் வறட்சியால் உணவுப் பற்றாக்குறை ஏற்பட்டு, மக்கள் ஒருவரை ஒருவர் அடித்துக் கொண்டு மாண்டு போயிருக்கலாம் அல்லது வாழ்வாதாரம் தேடிச் சிதறிப் போயிருக்கலாம் என்று சொல்லப்படுகிறது. ஏரிகளில் எடுக்கப்பட்ட மண் மாதிரிகள் அந்த காலத்தில் நிலவிய கடும் வறட்சியை உறுதிப்படுத்துகின்றன.
மற்றொரு காரணம், அவர்களுக்குள்ளேயே நடந்த இடைவிடாத போர்கள். மாயன் பேரரசு என்பது ஒரே மன்னரின் கீழ் இருக்கவில்லை; அது பல சிறிய நகர அரசுகளாகப் பிரிந்திருந்தது. வளமான இடங்களைக் கைப்பற்ற இந்த அரசுகள் தங்களுக்குள் அடிக்கடி போரிட்டுக் கொண்டன. இந்த உள்நாட்டுக் கலவரங்கள் அந்த நாகரிகத்தின் வலிமையைக் குலைத்திருக்கலாம். மேலும், அவர்கள் செய்த 'மனித நரபலி' பழக்கமும் ஒரு காரணமாகச் சொல்லப்படுகிறது. கடவுளைத் திருப்திப்படுத்த தங்களின் சிறந்த வீரர்களையும், மக்களையும் அவர்கள் பலிகொடுத்தது, ஒரு கட்டத்தில் மக்களிடையே அதிருப்தியை உண்டாக்கி, பெரும் புரட்சிக்கு வழிவகுத்திருக்கலாம் என்றும் நம்பப்படுகிறது.
மாயன் காலண்டர் பற்றிய மர்மம் இன்றும் பலரை ஆச்சரியப்பட வைக்கிறது. அவர்கள் பூமி சூரியனைச் சுற்றி வர 365.2420 நாட்கள் ஆகும் என்று கணித்தார்கள்; நவீன அறிவியலின்படி அது 365.2422 நாட்கள். இவ்வளவு துல்லியமான கணித அறிவு அவர்களுக்கு எப்படி வந்தது? அவர்கள் பூமிக்கு வெளியே இருக்கும் கோள்களுடன் ஏதோ ஒரு வகையில் தொடர்பு வைத்திருந்தார்களா? மாயன் சுவரோவியங்களில் விண்வெளி வீரர் போன்ற ஒரு உருவம் விண்கலத்தைச் செலுத்துவது போன்ற சித்திரம் கண்டெடுக்கப்பட்டுள்ளது. இது 'பாகல் மன்னனின் கல்லறை' (Sarcophagus of Pakal) மூடியில் செதுக்கப்பட்டுள்ளது. இது இன்றும் வேற்று கிரகவாசிக் கோட்பாட்டாளர்களுக்கு ஒரு மிகப்பெரிய ஆதாரமாக இருக்கிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.