சுப்மன் கில் தலைமையிலான குஜராத் டைட்டன்ஸ் அணி, செவ்வாய்க்கிழமை நடந்த விறுவிறுப்பான ஆட்டத்தில் சன்ரைசர்ஸ் ஹைதராபாத் அணியை 82 ரன்கள் வித்தியாசத்தில் வீழ்த்தி, ஐபிஎல் 2026 பிளே-ஆப் சுற்றை நோக்கி ஒரு பெரிய அடியை எடுத்து வைத்துள்ளது. இந்த வெற்றியின் மூலம் குஜராத் அணி 12 போட்டிகளில் 16 புள்ளிகளைப் பெற்றுள்ளது. பொதுவாக ஐபிஎல் தொடரில் 16 புள்ளிகள் என்பது பிளே-ஆப் வாய்ப்பை உறுதி செய்யும் 'மேஜிக் நம்பராக' கருதப்படுகிறது. இந்த வெற்றிக்குப் பிறகு குஜராத் அணி அடுத்த சுற்றுக்குத் தகுதி பெறுவதற்கான வாய்ப்பு 94.9 சதவீதமாக உயர்ந்துள்ளதாக அதிகாரப்பூர்வ ஒளிபரப்பாளர்கள் தெரிவித்துள்ளனர். அதே சமயம், இந்த தோல்வியால் சன்ரைசர்ஸ் ஹைதராபாத் அணியின் தகுதி வாய்ப்பு 80 சதவீதத்திலிருந்து 65.7 சதவீதமாகக் குறைந்துள்ளது.
இந்த ஆட்டத்தைப் பொறுத்தவரை, குஜராத் டைட்டன்ஸ் அணி பேட்டிங் மற்றும் பந்துவீச்சு என இரண்டிலும் சிறந்து விளங்கியது. முதலில் பேட்டிங் செய்த குஜராத் அணி, ஒரு கடினமான பிட்ச்சில் 20 ஓவர் முடிவில் 7 விக்கெட் இழப்பிற்கு 168 ரன்கள் எடுத்தது. அணியின் தொடக்க வீரர் சாய் சுதர்சன் பொறுப்புடன் விளையாடி 44 பந்துகளில் 61 ரன்கள் எடுத்தார். அவருக்குத் துணையாக வாஷிங்டன் சுந்தர் அதிரடியாக விளையாடி 33 பந்துகளில் 50 ரன்கள் குவித்து அசத்தினார். இவர்களின் அரைசதங்கள் தான் குஜராத் அணி ஒரு கௌரவமான ஸ்கோரை எட்ட உதவியது. ஹைதராபாத் தரப்பில் பிரபுல் ஹிங்கே 2 விக்கெட்டுகளையும், கேப்டன் கம்மின்ஸ் ஒரு விக்கெட்டையும் வீழ்த்தினர்.
169 ரன்கள் எடுத்தால் வெற்றி என்ற இலக்குடன் களம் இறங்கிய சன்ரைசர்ஸ் ஹைதராபாத் அணிக்கு ஆரம்பமே அதிர்ச்சியாக அமைந்தது. குஜராத் அணியின் வேகப்பந்து வீச்சாளர் காகிசோ ரபாடா மற்றும் முகமது சிராஜ் ஆகியோர் ஹைதராபாத் அணியின் டாப் ஆர்டரை நிலைகுலையச் செய்தனர். சிராஜ் தனது முதல் ஓவரையே விக்கெட் மெய்டனாக வீசி அசத்தினார். டிராவிஸ் ஹெட் மற்றும் அபிஷேக் சர்மா போன்ற அதிரடி வீரர்கள் ரபாடா மற்றும் சிராஜின் பந்துவீச்சில் சொற்ப ரன்களுக்கு வெளியேறினர். இதனால் பவர் பிளே முடிவதற்குள் ஹைதராபாத் அணி 32 ரன்களுக்கு 4 விக்கெட்டுகளை இழந்து தத்தளித்தது.
பவர் பிளே முடிந்த பிறகும் ஹைதராபாத் அணியின் சரிவு நிறுத்தப்படவில்லை. அனுபவ வீரர் ஜேசன் ஹோல்டர் தனது துல்லியமான பந்துவீச்சால் ஹைதராபாத் அணியின் நடுவரிசையை காலி செய்தார். அதிரடி வீரர் ஹென்ரிச் கிளாசன் 14 ரன்களில் ஹோல்டர் பந்துவீச்சில் ஆட்டமிழந்தார். அவரைத் தொடர்ந்து நிதிஷ் குமார் ரெட்டியும் ஹோல்டர் பந்துவீச்சிலேயே அவுட் ஆனார். ஹைதராபாத் அணி ஒரு கட்டத்தில் 60 ரன்களுக்கே 7 விக்கெட்டுகளை இழந்து பரிதாப நிலையில் இருந்தது. இறுதியில் 14.5 ஓவர்களிலேயே அந்த அணி வெறும் 86 ரன்களுக்கு ஆல்-அவுட் ஆனது. இதன் மூலம் குஜராத் டைட்டன்ஸ் அணி 82 ரன்கள் வித்தியாசத்தில் மெகா வெற்றியைப் பதிவு செய்தது.
பந்துவீச்சில் குஜராத் தரப்பில் ரபாடா 3 விக்கெட்டுகளையும், ஜேசன் ஹோல்டர் 3 விக்கெட்டுகளையும் வீழ்த்தினர். பிரசித் கிருஷ்ணா தனது பங்கிற்கு 2 விக்கெட்டுகளைக் கைப்பற்றினார். ஹைதராபாத் அணியில் கேப்டன் கம்மின்ஸ் எடுத்த 19 ரன்களே அந்த அணியின் அதிகபட்ச ஸ்கோராக அமைந்தது. இந்த வெற்றியின் மூலம் குஜராத் அணி புள்ளிப் பட்டியலில் முதலிடத்திற்கு முன்னேறியுள்ளது. இது அந்த அணிக்குத் தொடர்ந்து கிடைத்துள்ள ஐந்தாவது வெற்றியாகும். கடந்த 2022-ஆம் ஆண்டு சாம்பியன் பட்டம் வென்ற குஜராத் அணி, இந்த ஆண்டும் அதே வேகத்துடன் பிளே-ஆப் சுற்றை நோக்கி நகர்ந்து வருகிறது.
குஜராத் அணியின் இந்த வெற்றியால் மற்ற அணிகளின் பிளே-ஆப் வாய்ப்புகளிலும் சிறு மாற்றங்கள் ஏற்பட்டுள்ளன. ராயல் சேலஞ்சர்ஸ் பெங்களூரு (ஆர்சிபி) அணியின் வாய்ப்பு 80.1 சதவீதத்திலிருந்து 79.7 சதவீதமாகச் சற்று குறைந்துள்ளது. நான்காவது இடத்தில் உள்ள பஞ்சாப் கிங்ஸ் அணியின் வாய்ப்பு 62.5 லிருந்து 62.7 சதவீதமாக உயர்ந்துள்ளது. அதேபோல் சென்னை சூப்பர் கிங்ஸ் (சிஎஸ்கே) அணியின் வாய்ப்பு 42.7 சதவீதத்திலிருந்து 42.8 சதவீதமாக மிகச் சிறிய அளவில் அதிகரித்துள்ளது. லீக் சுற்றின் இறுதிக்கட்டத்தை ஐபிஎல் நெருங்கி வருவதால், ஒவ்வொரு போட்டியும் இனி அணிகளின் தலையெழுத்தைத் தீர்மானிக்கும் காரணியாக அமையும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.