சூர்யவன்ஷி இல்ல.. மாத்ரே இல்ல.. இந்திய அணியின் அடுத்த புயல் இவர் தான் - அஷ்வின் சொன்ன ஆரூடம்! பலிக்குமா?

ஐபிஎல் 2026 தொடரில் பல இளம் வீரர்கள் தங்கள் அதிரடி ஆட்டத்தால் ரசிகர்களைக் கவர்ந்து வரும் நிலையில், இந்திய அணியின் அனுபவ சுழற்பந்து வீச்சாளர் ரவிச்சந்திரன் அஸ்வின் ஒரு இளம் வீரரை வெகுவாகப் பாராட்டியுள்ளார். லக்னோ சூப்பர் ஜெயண்ட்ஸ் அணிக்கு எதிரான போட்டியில் வெறும் 37 பந்துகளில் 93 ரன்கள் குவித்து மிரட்டிய பஞ்சாப் கிங்ஸ் அணியின் பிரியான்ஷ் ஆர்யா தான் அந்த வீரர். கடந்த சீசனிலேயே 475 ரன்கள் குவித்து அனைவரது கவனத்தையும் ஈர்த்த ஆர்யா, இந்த ஆண்டும் தனது அதிரடியைத் தொடர்ந்து வருகிறார். இவரைப் பற்றிப் பேசிய அஸ்வின், வளர்ந்து வரும் மற்ற இளம் வீரர்களை விட ஆர்யா ஒரு படி மேலே இருப்பதாகக் குறிப்பிட்டுள்ளார்.

தனது யூடியூப் சேனலில் இது குறித்துப் பேசிய அஸ்வின், யாரையும் யாரோடும் ஒப்பிட்டுத் தாழ்த்திப் பேச விரும்பவில்லை என்றும், ஆனால் பிரியான்ஷ் ஆர்யாவிடம் ஒரு தனித்துவமான திறமை இருப்பதாகவும் கூறினார். தற்போது கிரிக்கெட் உலகில் பேசப்பட்டு வரும் இளம் வீரர்களான ஆயுஷ் மத்ரே மற்றும் வைபவ் சூர்யவன்ஷி ஆகியோரை விட ஆர்யா ஒரு படி முன்னால் இருப்பதாகத் தனக்குத் தோன்றுவதாக அஸ்வின் தெரிவித்தார். ஆர்யாவிடம் இருக்கும் ஷாட்களின் வரிசை (Range of shots) மற்றும் பெரிய ரன்களைக் குவிக்கக்கூடியத் திறன் அவரை மற்றவர்களிடமிருந்து வேறுபடுத்திக் காட்டுவதாக அஸ்வின் புகழ்ந்து தள்ளியுள்ளார்.

இந்த சீசனில் பிரியான்ஷ் ஆர்யா ஆடிய விதம் அவர் ஒரு குறுகிய கால அதிசயமல்ல என்பதை நிரூபித்துள்ளது. 11 பந்துகளில் 39 ரன்கள், 20 பந்துகளில் 57 ரன்கள் மற்றும் கடைசியாக 37 பந்துகளில் 93 ரன்கள் என அவர் தொடர்ச்சியாக ரன் குவித்து வருகிறார். ஒரு சீசனில் நன்றாக ஆடிவிட்டுப் பிறகு காணாமல் போகும் வீரர்களைப் போல இல்லாமல், ஆர்யா தனது ஆட்டத்தில் ஒரு முதிர்ச்சியைக் காட்டி வருகிறார். இதுவரை 5 போட்டிகளில் விளையாடியுள்ள அவர், 248 என்ற அசாத்தியமான ஸ்டிரைக் ரேட்டில் 211 ரன்களைக் குவித்துள்ளார்.

அதே சமயம், அஸ்வின் குறிப்பிட்ட மற்ற வீரர்களில் ஒருவரான சிஎஸ்கே அணியின் ஆயுஷ் மத்ரே, துரதிர்ஷ்டவசமாகக் காயம் காரணமாக இந்தத் தொடரிலிருந்து விலகியுள்ளார். இந்த ஆண்டு சிஎஸ்கே அணிக்காக 6 இன்னிங்ஸ்களில் 201 ரன்கள் எடுத்து அந்த அணியின் டாப் ஸ்கோரராக மத்ரே இருந்தார். காயம் அவரை முடக்கினாலும், அவரது திறமை அஸ்வின் போன்ற மூத்த வீரர்களால் அங்கீகரிக்கப்பட்டுள்ளது. மற்றொரு இளம் வீரரான வைபவ் சூர்யவன்ஷியும் 6 போட்டிகளில் 246 ரன்கள் எடுத்துத் தொடரில் சிறப்பான ஆட்டத்தை வெளிப்படுத்தி வருகிறார்.

இந்தியக் கிரிக்கெட்டின் வருங்கால நட்சத்திரங்களாகப் பார்க்கப்படும் இந்த இளம் வீரர்களுக்கு இடையே ஆரோக்கியமான போட்டி நிலவி வருவது ரசிகர்களுக்கு மகிழ்ச்சியை அளித்துள்ளது. குறிப்பாகப் பஞ்சாப் கிங்ஸ் அணியின் பிரியான்ஷ் ஆர்யா இதே வேகத்தில் ஆடினால், விரைவில் இந்தியத் தேசிய அணியில் அவருக்கு இடம் கிடைக்கும் என்று எதிர்பார்க்கப்படுகிறது. அஸ்வின் போன்ற ஒரு ஜாம்பவான் வீரர் ஒருவரைப் பாராட்டுவது அவருக்கு ஒரு மிகப்பெரிய உத்வேகத்தைக் கொடுக்கும் என்பதில் சந்தேகமே இல்லை.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.