ஜிம்பாப்வே நாட்டின் ஹராரே நகரில் நடைபெற்ற 19 வயதுக்குட்பட்டோருக்கான உலகக்கோப்பை கிரிக்கெட் தொடரின் இறுதிப்போட்டியில், இங்கிலாந்து அணியை வீழ்த்தி U-19 இந்திய அணி ஆறாவது முறையாக சாம்பியன் பட்டத்தை வென்று வரலாற்று சாதனை படைத்துள்ளது. ஒட்டுமொத்த தொடரிலும் தோல்வியையே சந்திக்காமல் அஜையமாக முன்னேறிய இந்திய அணி, இறுதிப்போட்டியில் இங்கிலாந்து அணியை 100 ரன்கள் வித்தியாசத்தில் வீழ்த்தி உலக கிரிக்கெட் அரங்கில் தனது ஆதிக்கத்தை மீண்டும் நிலைநாட்டியுள்ளது. இந்த மகத்தான வெற்றியைத் தொடர்ந்து, இந்திய கிரிக்கெட் கட்டுப்பாட்டு வாரியம் இந்திய அணி வீரர்களுக்கும் பயிற்சியாளர்களுக்கும் மிகப்பெரிய அளவில் பரிசுத்தொகையை அறிவித்து கௌரவித்துள்ளது.
இந்திய இளையோர் அணியின் இந்த அபார வெற்றியைப் பாராட்டும் விதமாக, ஒட்டுமொத்த அணிக்கும் சேர்த்து 7.5 கோடி ரூபாய் பரிசுத்தொகையை பிசிசிஐ செயலாளர் தேவஜித் சாய்கியா அதிகாரப்பூர்வமாக அறிவித்துள்ளார். இது குறித்துப் பேசிய அவர், இந்திய இளையோர் அணியின் செயல்பாடு ஒட்டுமொத்த நாட்டிற்கும் பெருமை சேர்த்துள்ளதாகவும், குறிப்பாக இறுதிப்போட்டியில் அவர்கள் விளையாடிய விதம் வியக்க வைப்பதாகவும் குறிப்பிட்டார். இந்த வெற்றி என்பது வெறும் ஒரு கோப்பை மட்டுமல்ல, இந்திய கிரிக்கெட்டின் எதிர்காலம் மிகவும் பாதுகாப்பான கைகளில் உள்ளது என்பதற்கான சான்று என்றும் அவர் புகழாரம் சூட்டியுள்ளார்.
இறுதிப்போட்டியில் இந்திய அணியின் வெற்றிக்கு மிக முக்கிய காரணமாக அமைந்தது 14 வயது இளம் வீரர் வைபவ் சூர்யவன்ஷியின் அதிரடி ஆட்டமாகும். தொடக்க வீரராக களம் இறங்கிய அவர், வெறும் 80 பந்துகளில் 15 சிக்ஸர்கள் மற்றும் 15 பவுண்டரிகளுடன் 175 ரன்கள் குவித்து உலக சாதனை படைத்தார். 19 வயதுக்குட்பட்டோருக்கான உலகக்கோப்பை இறுதிப்போட்டி வரலாற்றில் ஒரு வீரர் எடுத்த அதிகபட்ச ரன் இதுவாகும். இவரது ஆட்டத்தின் உதவியுடன் இந்திய அணி 50 ஓவர்கள் முடிவில் 9 விக்கெட் இழப்பிற்கு 411 ரன்கள் என்ற இமாலய இலக்கை நிர்ணயித்தது.
கடினமான இலக்கை நோக்கி விளையாடிய இங்கிலாந்து அணி, இந்திய வீரர்களின் நேர்த்தியான பந்துவீச்சை எதிர்கொள்ள முடியாமல் திணறியது. அந்த அணியின் காலேப் பால்கனர் தனி ஆளாகப் போராடி 115 ரன்கள் குவித்த போதிலும், மற்ற வீரர்கள் சொற்ப ரன்களில் ஆட்டமிழந்தனர். இறுதியில் இங்கிலாந்து அணி 40.2 ஓவர்களில் 311 ரன்களுக்கு அனைத்து விக்கெட்டுகளையும் இழந்தது. இந்திய அணியின் சார்பில் ஆர்.எஸ்.அம்ரிஷ் மற்றும் தீபேஷ் தேவேந்திரன் ஆகியோர் முக்கியமான விக்கெட்டுகளைக் கைப்பற்றி வெற்றியை உறுதி செய்தனர். கேப்டன் ஆயுஷ் மகேந்திர அணியை மிகச் சிறப்பாக வழிநடத்தியதுடன் பேட்டிங்கிலும் தன் பங்கிற்கு 53 ரன்கள் சேர்த்து முக்கிய பங்காற்றினார்.
இந்த வரலாற்றுச் சிறப்புமிக்க வெற்றியைப் பாராட்டி பிரதமர் நரேந்திர மோடி தனது எக்ஸ் வலைத்தளத்தில் வாழ்த்துக்களைத் தெரிவித்துள்ளார். இந்திய இளையோர் அணியின் திறமை மற்றும் அர்ப்பணிப்பு ஒட்டுமொத்த தேசத்தையும் பெருமைப்பட வைத்துள்ளதாகவும், இந்த வெற்றி வரவிருக்கும் இளம் விளையாட்டு வீரர்களுக்கு மிகப்பெரிய உத்வேகமாக அமையும் என்றும் அவர் குறிப்பிட்டுள்ளார். மேலும், அணியின் பயிற்சியாளர் ஹிருஷிகேஷ் தலைமையிலான தொழில்நுட்பக் குழுவினரின் பங்களிப்பையும் முன்னாள் வீரர்கள் வி.வி.எஸ். லக்ஷ்மன் மற்றும் ரவி சாஸ்திரி ஆகியோர் வெகுவாகப் பாராட்டியுள்ளனர்.
பிசிசிஐ அறிவித்துள்ள இந்த 7.5 கோடி ரூபாய் பரிசுத்தொகையானது வீரர்கள், பயிற்சியாளர்கள் மற்றும் தேர்வுக் குழுவினருக்குப் பிரித்து வழங்கப்படும் எனத் தெரிவிக்கப்பட்டுள்ளது. கடந்த 2000, 2008, 2012, 2018 மற்றும் 2022 ஆகிய ஆண்டுகளில் உலகக்கோப்பையை வென்றிருந்த இந்திய அணி, தற்போது 2026-லும் கோப்பையைக் கைப்பற்றி தனது ஆறாவது மகுடத்தைச் சூடிக்கொண்டுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.