இந்திய கிரிக்கெட் அணியின் முன்னாள் கேப்டனும் பிசிசிஐ முன்னாள் தலைவருமான சவுரவ் கங்குலி, நட்சத்திர வேகப்பந்து வீச்சாளர் முகமது ஷமி குறித்து பிசிசிஐ தேர்வாளர்களுக்கு ஒரு அதிரடி கோரிக்கையை வைத்துள்ளார். நீண்ட நாட்களாக இந்திய அணியில் இடம் கிடைக்காமல் தவித்து வரும் ஷமியை மீண்டும் அணிக்குள் கொண்டு வர வேண்டியதன் அவசியத்தை கங்குலி வலியுறுத்தியுள்ளார். இது தொடர்பாக அவர் வெளியிட்டுள்ள கருத்துக்கள் தற்போது கிரிக்கெட் வட்டாரத்தில் பெரும் விவாதத்தைக் கிளப்பியுள்ளன.
சமீபகாலமாக முகமது ஷமி இந்திய அணியின் தேர்வுக் குழுவால் தொடர்ந்து புறக்கணிக்கப்பட்டு வருகிறார். காயத்திலிருந்து குணமடைந்து அவர் உள்ளூர் போட்டிகளில் விளையாடி தனது திறமையை நிரூபித்த போதிலும், சர்வதேச போட்டிகளுக்கான இந்திய அணியில் அவருக்கு வாய்ப்பு வழங்கப்படவில்லை. இது குறித்துப் பேசிய கங்குலி, ஷமி போன்ற அனுபவம் வாய்ந்த வீரர்களை அணியில் வைத்திருப்பது பந்துவீச்சு வரிசைக்கு மிகப்பெரிய பலத்தைத் தரும் என்று கூறியுள்ளார். குறிப்பாக வெளிநாட்டு மண்ணில் நடக்கும் போட்டிகளில் ஷமியின் ஸ்விங் பந்துவீச்சு எதிரணிகளுக்கு சிம்ம சொப்பனமாக இருக்கும் என்பதை அவர் சுட்டிக்காட்டியுள்ளார்.
இந்த விவகாரத்தில் ஜஸ்பிரித் பும்ராவின் பெயரைக் குறிப்பிட்ட கங்குலி ஒரு முக்கியமான ஒப்பீட்டைச் செய்துள்ளார். பும்ரா உலகின் நம்பர் ஒன் பந்துவீச்சாளர் என்பதில் மாற்றுக் கருத்து இல்லை, ஆனால் அவருக்குப் பக்கபலமாக மற்றொரு அனுபவ வீரர் இருப்பது மிகவும் அவசியம் என்று அவர் கூறியுள்ளார். பும்ரா மற்றும் ஷமி ஆகிய இருவருமே உலகத்தரம் வாய்ந்த பந்துவீச்சாளர்கள் என்றும், இவர்கள் இருவரும் இணைந்து பந்துவீசினால் அது எந்தவொரு பேட்டிங் வரிசையையும் நிலைகுலையச் செய்யும் என்றும் கங்குலி தனது பேட்டியில் தெரிவித்துள்ளார்.
இந்திய அணியின் வருங்காலத் திட்டங்களில் இளம் வீரர்களுக்கு முன்னுரிமை அளிக்கப்படுவது வரவேற்கத்தக்கது என்றாலும், ஷமி போன்ற மேட்ச் வின்னர்களை ஒதுக்கி வைப்பது அணிக்குத் பின்னடைவை ஏற்படுத்தும் என்று கங்குலி எச்சரித்துள்ளார். அனுபவமும் வேகமும் ஒருங்கே கொண்ட ஷமி, இன்னும் சில ஆண்டுகள் இந்திய அணிக்காக சிறப்பாக விளையாடும் தகுதியைக் கொண்டுள்ளார். எனவே, தேர்வாளர்கள் அவரை வெறும் ஒரு மாற்று வீரராகப் பார்க்காமல், அணியின் முதன்மை வீரராகக் கருதி வாய்ப்பு வழங்க வேண்டும் என்று அவர் கேட்டுக்கொண்டுள்ளார்.
பிசிசிஐ தேர்வாளர்களுக்கு கங்குலி விடுத்துள்ள இந்தத் தூது, ஷமியின் ரசிகர்களுக்குப் பெரும் உற்சாகத்தைத் தந்துளது. ஒரு முன்னாள் கேப்டனாக ஷமியின் அருமையை உணர்ந்து கங்குலி பேசியிருப்பது, தேர்வுக் குழுவின் முடிவுகளில் ஏதேனும் மாற்றத்தை ஏற்படுத்துமா என்பதைப் பொறுத்திருந்துதான் பார்க்க வேண்டும். ஐபிஎல் போட்டிகள் நெருங்கி வரும் வேளையில், கங்குலியின் இந்தக் கருத்து ஷமிக்கு மீண்டும் இந்திய நீல நிறச் சீருடையை அணிவதற்கான கதவைத் திறந்துவிடும் என்று எதிர்பார்க்கப்படுகிறது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.