.png)
மேற்கு வங்கத்தின் பஸ்சிம் மேதினிபூர் மாவட்டத்தில், பன்ஸ்குரா என்ற சிறிய நகரத்தில், 12 வயது சிறுவன் கிரிஷ்ணேந்து தாஸ், ஒரு கடையில் சிப்ஸ் பாக்கெட் திருடியதாக குற்றம் சாட்டப்பட்டதைத் தொடர்ந்து, தனது உயிரை மாய்த்துக்கொண்ட சம்பவம், அனைவரையும் உலுக்கியுள்ளது.
சம்பவத்தின் பின்னணி
கிரிஷ்ணேந்து தாஸ், பன்ஸ்குராவில் உள்ள ஒரு சிறிய கிராமத்தில் வசித்து வந்த 7-ஆம் வகுப்பு மாணவர். இவர் அங்கு உள்ளூரில் உள்ள இனிப்பு கடை ஒன்றில் இருந்து மூன்று சிப்ஸ் பாக்கெட்டுகளை திருடியதாக குற்றம் சாட்டப்பட்டார். கடை உரிமையாளர், கிரிஷ்ணேந்துவை கடுமையாகத் திட்டி, பொதுவெளியில் அவமானப்படுத்தி, கிரிஷ்ணேந்துவை மன்னிப்பு கேட்க வைத்ததாக கூறப்படுகிறது. இதனைத் தொடர்ந்து, கிரிஷ்ணேந்துவின் தாயார், அவரை கடைக்கு மீண்டும் அழைத்துச் சென்று, அவரை மீண்டும் திட்டியதாக தகவல்கள் தெரிவிக்கின்றன.
இந்த அவமானத்தால் மனம் உடைந்த கிரிஷ்ணேந்து, தனது தாயுடன் வீட்டிற்குத் திரும்பிய பிறகு, தனது அறையை உள்பக்கமாகப் பூட்டிக்கொண்டார். பிறகு, அவர் கதவைத் திறக்க மறுத்ததால், தாயார் மற்றும் மற்றவர்கள் கதவை உடைத்து உள்ளே நுழைந்தபோது, கிரிஷ்ணேந்து வாயில் நுரை தள்ளிய நிலையில், அரைவாசி காலியான பூச்சிக்கொல்லி மருந்து பாட்டிலுடன் கிடந்தார். அருகில், அவரது கையால் எழுதப்பட்டதாகக் கருதப்படும் ஒரு குறிப்பு, பெங்காலி மொழியில் கிடைத்தது. அந்தக் குறிப்பில், “அம்மா, நான் திருடன் இல்லை. நான் திருடவில்லை. மாமா (கடை உரிமையாளர்) அங்கு இல்லை, நான் காத்திருந்தேன். திரும்பி வரும்போது, வழியில் ஒரு குர்குரே பாக்கெட் கிடந்தது, அதை எடுத்தேன். எனக்கு குர்குரே ரொம்ப பிடிக்கும். இவை என் இறுதி வார்த்தைகள், இந்தச் செயலுக்கு (பூச்சிக்கொல்லி குடித்தது) என்னை மன்னிச்சிடுங்க” என்று எழுதியிருந்தார்.
கிரிஷ்ணேந்து உடனடியாக தம்லுக் மருத்துவமனைக்கு கொண்டு செல்லப்பட்டு, தீவிர சிகிச்சைப் பிரிவில் (ICU) அனுமதிக்கப்பட்டார். ஆனால், சில மணி நேரங்களில் அவர் உயிரிழந்தார்.
கடை உரிமையாளரின் பதில்
கடை உரிமையாளர், ஆரம்பத்தில் கிரிஷ்ணேந்துவை உடல் ரீதியாக தாக்கவில்லை என்று கூறினார். ஆனால், இந்த சம்பவம் பரவலாக அறியப்பட்ட பிறகு, அவர் தலைமறைவாகிவிட்டார். இந்த சம்பவம், சமூகத்தில் நிலவும் பொது அவமானத்தின் (public shaming) ஆபத்தான தாக்கத்தை வெளிப்படுத்துகிறது. குறிப்பாக, குழந்தைகளைப் பொறுத்தவரை, இத்தகைய அவமானங்கள் மனதளவில் ஆழமான காயங்களை ஏற்படுத்தலாம். 12 வயதே ஆன கிரிஷ்ணேந்து, தன்மீது சுமத்தப்பட்ட திருட்டு குற்றச்சாட்டையும், பொதுவெளியில் அவமானப்படுத்தப்பட்டதையும், தனது தாயாரால் மீண்டும் திட்டப்பட்டதையும் தாங்க முடியவில்லை.
இந்தியாவில், தற்கொலை எண்ணங்களை எதிர்கொள்பவர்களுக்கு உதவ, பல உதவி மையங்கள் உள்ளன. உதாரணமாக:
சுமைத்ரி (டெல்லி): 011-23389090
ஸ்னேஹா பவுண்டேஷன் (சென்னை): 044-24640050
ஆரோக்ய சஹாயவாணி: 104
இந்த உதவி மையங்கள், மனநல ஆலோசனை மற்றும் ஆதரவை வழங்குகின்றன.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
