.png)
தூத்துக்குடி மாவட்டம், கயத்தாறு காப்புலிங்கம்பட்டி மேலத்தெருவை சேர்ந்த கிருஷ்ணசாமி என்பவரின் மகன் 58 வயதுடைய கோமு. இவருக்கும் அதே பகுதியை சேர்ந்த தங்கத்தாய் என்பவருக்கும் கடந்த சில வருடங்களுக்கு முன்பு திருமணமான நிலையில் குழந்தைகள் இல்லை என சொல்லப்படுகிறது. குடிப்பழக்கத்திற்கு அடிமையான கோமு தினந்தோறும் குடித்துவிட்டு வந்து மனைவியிடம் தகராறு செய்து வந்த நிலையில் கணவன் மனைவி இருவருக்கும் இடையே அடிக்கடி வாக்குவாதம் ஏற்பட்டு வந்திருக்கிறது. இதன் காரணமாக கடந்த ஆறு மாதங்களுக்கு முன்பு தங்கத்தாய் தனது கணவரை பிரிந்து வீட்டை விட்டு வெளியேறியதாக சொல்லப்படுகிறது.
எனேவ கோமு தங்கத்தாய் எங்கு சென்றார் என தெரியாமல் தேடி வந்த நிலையில் தங்கத்தாயை அவரது சகோதர முறை உறவினர்களான காப்புலிங்கம்பட்டி கீழத்தெருவை சேர்ந்த அந்தோணி என்பவரின் மகன் மந்திரம் மற்றும் அதே தெருவை சேர்ந்த சண்முகையா என்பவரின் மகன் முருகன் ஆகியோர் எங்கோ தங்க வைத்துள்ளதாக கோமுவிற்கு சந்தேகம் ஏற்பட்டுள்ளது. இதுகுறித்து கோமு மந்திரம் மற்றும் முருகனிடம் கேட்டு வந்த நிலையில் மூவருக்கும் இடையே அடிக்கடி தகராறு ஏற்பட்டு வந்திருக்கிறது.
இந்நிலையில் நேற்று முன்தினம் இரவு கயத்தாறு அருகே உள்ள தளவாய்புரத்தில் அமைந்துள்ள மதுபான கடை பாரில் மந்திரமும், முருகனும் மது அருந்தி கொண்டிருந்தனர். அங்கு சென்ற கோமு இருவரிடமும் “என் பொண்டாட்டி எங்க அவளை நீங்க தான் மறைச்சி வஞ்சிருக்கீங்களா” என்று கேட்டு தகராறு செய்துள்ளார். மூவருக்கும் இடையே வாக்குவாதம் முற்றவே கோமு தான் மறைத்து வைத்திருந்த அரிவாளை எடுத்து இருவரையும் சரமாரியாக வெட்டினார். இதில் பலத்த காயமடைந்த இருவரும் சம்பவ இடத்திலேயே சரிந்து விழுந்து ரத்த வெள்ளத்தில் மிதந்தனர்.
இதனை பார்த்த அருகில் இருந்தவர்கள் உடனே மந்திரம் மற்றும் முருகனை மீட்டு ஆம்புலன்ஸ் மூலம் கோவில்பட்டி அரசு மருத்துவமனைக்கு சிகிச்சைக்காக அனுப்பி வைத்தனர். அங்கு சிகிச்சை பலனின்றி முருகன் பரிதாபமாக உயிரிழந்தார். மேலும் மந்திரம் உயிருக்கு ஆபத்தான நிலையில் அங்கு முதலுதவி சிகிச்சை பெற்று மேல் சிகிச்சைக்காக திருநெல்வேலி அரசு மருத்துவமனைக்கு கொண்டு செல்லப்பட்ட நிலையில் பாதி வழிலேயே உயிரிழந்தார் . இந்த சம்பவம் பற்றி தகவல் அறிந்த கோவில்பட்டி காவல் துணை கண்காணிப்பாளர் ஜெகநாதன், கயத்தாறு காவல் நிலைய ஆய்வாளர் சுகாதேவி மற்றும் போலீசார் சம்பவ இடத்திற்கு விரைந்து விசாரணை மேற்கொண்டனர்.
இதனை தொடர்ந்து வழக்கு பதிவு செய்து கோமுவை தனிப்படை அமைத்து தேடி வந்த நிலையில் நேற்று போலீசார் திருநெல்வேலி மதுரை தேசிய நெடுஞ்சாலை நாலாட்டின் புதூர் அருகே உள்ள சரவணபவன் ஹோட்ட அருகே கோமுவை சுற்றி வளைத்து மடக்கிப் பிடித்தனர். மேலும் அவரை நீதிமன்றத்தில் ஆஜர்படுத்தி சிறையில் அடைத்தனர். மனைவி பிரிந்து சென்ற தகராறில் கணவன் அவரது சகோதரர்களை வெட்டி கொலை செய்த சம்பவம் அப்பகுதி மக்களிடையே பெரும் பரபரப்பை ஏற்பட்டுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
