வந்தே பாரத் ரயில் மோதி.. கேரளச் செவிலியர் மாணவர்கள் பலி - விபத்தா? தற்கொலையா? நடந்தது என்ன?

கர்நாடக மாநிலத்தின் பெங்களூரு நகரில் நடந்த ஒரு அதிர்ச்சி சம்பவம், செவிலியர் மாணவர்களிடையே பெரும் சோகத்தை ஏற்படுத்தியுள்ளது. கேரள மாநிலத்தைச் சேர்ந்த இரண்டு இளம் செவிலியர் கல்லூரி மாணவர்கள், வேகமாக வந்த வந்தே பாரத் ரயில் மோதியதில் உயிரிழந்துள்ளனர். இரயில்வே காவல்துறை இதை ஒரு விபத்தாகப் பார்க்காமல், தற்கொலையாக இருக்கலாம் என்று சந்தேகிப்பது பெரும் திருப்பமாக உள்ளது.

இந்தத் துயரச் சம்பவம் திங்கட்கிழமை மதியம் சுமார் 2:30 மணியளவில், பெங்களூரு சிக்பனவாரா இரயில் நிலையம் அருகே நடந்துள்ளது. இறந்த இருவரும் கேரளாவைச் சேர்ந்த ஸ்டெர்லின் எலிசா (19 வயது) மற்றும் ஜோசப் (20 வயது) என்று அடையாளம் காணப்பட்டுள்ளனர். இவர்கள் இருவரும் சப்தகிரி கல்லூரியில் முதல் ஆண்டு பி.எஸ்சி செவிலியர் படிப்புப் படித்து வந்துள்ளனர். இருவரும் நெருங்கிய நண்பர்களாக இருந்துள்ளனர் என்று காவல் அதிகாரிகள் கூறியுள்ளனர்.

இந்தச் சம்பவம் குறித்து தகவல் கிடைத்தவுடன், பெங்களூரு கிராமப்புற இரயில்வே காவல் நிலைய அதிகாரிகள் விரைந்து வந்து விசாரித்தனர். இரயில்வே கண்காணிப்பாளர் யதீஷ் என். அவர்கள் கூறுகையில், இது ஒரு தற்கொலை வழக்காக இருக்கலாம் என்று ஆரம்பக்கட்ட விசாரணையில் தெரிவதாகவும், இதற்கு முக்கியக் காரணம், வந்தே பாரத் இரயிலின் பாதுகாப்பு கேமராப் பதிவுகள் (CCTV Footage) தான் என்றும் அவர் தெரிவித்துள்ளார்.

அந்தக் கேமராப் பதிவுகளில், இரயில் நெருங்கிக் கொண்டிருந்த நேரத்தில், இருவரும் ஒருவரையொருவர் இறுக்கமாக அணைத்தவாறு இரயில் பாதையில் நின்றிருந்ததாகத் தெரிகிறது. இதனால், அவர்கள் இரயிலில் அடிபட்டு இறந்ததைவிட, தங்கள் உயிரை மாய்த்துக்கொள்ள முடிவு செய்திருக்கலாம் என்று காவல்துறை சந்தேகிக்கிறது. இருப்பினும், இந்த விபரீத முடிவை எடுக்க அவர்களைத் தூண்டியது எது என்ற காரணம் இன்னும் தெளிவாகத் தெரியவில்லை. சம்பவ இடத்தில் இருந்து எந்த ஒரு தற்கொலைக் குறிப்பும் கிடைக்கவில்லை என்று காவல்துறை அதிகாரி உறுதிப்படுத்தியுள்ளார்.

சம்பவம் நடந்த இடத்தில் இருந்து அவர்களின் அலைபேசிகள் கிடைத்துள்ளன. ஆனால், இரயில் மோதியதில் அவை முழுவதும் சேதமடைந்து விட்டதால், அதில் உள்ள தகவல்களைப் பெறுவதில் சிக்கல் ஏற்பட்டுள்ளது. தற்போது, பெங்களூரு கிராமப்புற இரயில்வே காவல் நிலையத்தில், இயற்கைக்கு மாறான மரணம் என்று வழக்குப் பதிவு செய்யப்பட்டுள்ளது. இவர்களின் மரணத்திற்கான உண்மையான காரணத்தைத் தெரிந்துகொள்ளும் விதமாக, காவல்துறை இப்போது இந்தக் கல்லூரி மாணவர்களின் நண்பர்கள் மற்றும் கல்லூரி நிர்வாகத்திடம் தீவிரமாக விசாரித்து வருகின்றனர். மாணவர்கள் தற்கொலை செய்து கொண்டார்களா அல்லது வேறு ஏதேனும் விபரீத முடிவை எடுத்தார்களா என்று விசாரணை தொடர்கிறது. இரண்டு இளம் உயிர்கள் இப்படி இரயிலில் அடிபட்டு இறந்தது சோகத்தை ஏற்படுத்தியுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.