.png)
அமெரிக்காவின் நியூயார்க் நகரில், 8 வயது சிறுமி ஒருவர் உறங்கிக்கொண்டிருந்தபோது அவரது படுக்கையறைக்குள் அத்துமீறி நுழைந்து பாலியல் ரீதியாகத் துன்புறுத்தியதாகக் கூறப்படும் நபரை காவல்துறையினர் தீவிரமாகத் தேடி வருகின்றனர். இந்த சம்பவம் அப்பகுதியில் பெரும் அதிர்ச்சியையும் அச்சத்தையும் ஏற்படுத்தியுள்ளது.
நியூயார்க் நகர காவல்துறை (NYPD) வெளியிட்ட தகவலின்படி, மே 25ஆம் தேதி அதிகாலை 5 மணியளவில் டி ரீமர் அவென்யூ மற்றும் பஸ்ஸிங் அவென்யூ சந்திப்பு அருகே உள்ள ஒரு வீட்டில் இந்த சம்பவம் நடைபெற்றுள்ளது. அங்கு 8 வயது சிறுமி தனது அறையில் உறங்கிக் கொண்டிருந்ததாக கூறப்படுகிறது. இந்த வழக்கில் 35 வயதான திஷான் மெய்ல் என்பவரை காவல்துறையினர் தேடி வருகின்றனர். அவர் வீட்டின் படுக்கையறை ஜன்னல் வழியாக வலுக்கட்டாயமாக உள்ளே நுழைந்ததாக விசாரணையில் தெரியவந்துள்ளது.
உறக்கத்தில் இருந்த சிறுமி திடீரென கண்விழித்தபோது, தனது அறைக்குள் நுழைந்திருந்த அந்த நபர் ஆடைகளை அகற்றி ஆபாசமான செயல்களில் ஈடுபட்டுக் கொண்டிருந்ததை பார்த்ததாக காவல்துறையினர் தெரிவித்துள்ளனர். இதனால் அதிர்ச்சியடைந்த சிறுமி சத்தமிட்டதாகவும், அதன் பின்னர் குற்றவாளி அங்கிருந்து தப்பிச் சென்றதாகவும் கூறப்படுகிறது.
சம்பவத்திற்குப் பிறகு, அந்த நபர் பஸ்ஸிங் அவென்யூ வழியாக கிழக்கு திசை நோக்கி நடந்து சென்றதாக காவல்துறையின் கண்காணிப்பு தகவல்கள் தெரிவிக்கின்றன. அவரைக் கண்டுபிடிப்பதற்காக அப்பகுதியில் உள்ள கண்காணிப்பு கேமரா காட்சிகள் மற்றும் பிற ஆதாரங்களை அதிகாரிகள் ஆய்வு செய்து வருகின்றனர். தேடப்பட்டு வரும் திஷான் மெய்ல் நடுத்தர நிறத் தோற்றம் கொண்டவர் என காவல்துறையினர் விவரித்துள்ளனர். கடைசியாக அவர் வெள்ளை நிற லோகோ கொண்ட கருப்பு ஸ்வெட்டர், கருப்பு பேண்ட், சாம்பல் நிற குல்லா மற்றும் கருப்பு நிற ஸ்னீக்கர் காலணிகள் அணிந்திருந்ததாக தெரிவிக்கப்பட்டுள்ளது.
சிறுமியின் குடும்பத்தினருக்கு தேவையான ஆதரவு வழங்கப்பட்டுள்ளதாகவும், குற்றவாளியை விரைவில் கைது செய்ய தீவிர நடவடிக்கைகள் மேற்கொள்ளப்பட்டு வருவதாகவும் நியூயார்க் காவல்துறை தெரிவித்துள்ளது. குழந்தைகளின் பாதுகாப்பு தொடர்பான இந்த சம்பவம் அமெரிக்காவில் மீண்டும் கவலையை ஏற்படுத்தியுள்ளது.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
