பியூட்டி பார்லர் போறீங்களா? இந்த ஊசி சிகிச்சையை உடனே நிறுத்துங்க! அரசு கொடுத்த அதிரடி எச்சரிக்கை!

அழகு சாதனப் பொருட்கள் என்ற பெயரில் ஊசி மூலம் செலுத்தப்படும் போடோக்ஸ் (Botox) மற்றும் குளுதாதயோன் (Glutathione) போன்ற சிகிச்சைகள் அதிகரித்து வரும் சூழலில், மத்திய மருந்து தரக்கட்டுப்பாட்டு அமைப்பு (CDSCO) மிக முக்கியமான எச்சரிக்கையை விடுத்துள்ளது. எந்தவொரு அழகு சாதனப் பொருளையும் ஊசி மூலம் உடலில் செலுத்த அனுமதி இல்லை என்று அந்த அமைப்பு திட்டவட்டமாகக் கூறியுள்ளது. அழகு சாதனப் பொருட்கள் என்பது உடல் மீது தேய்க்க, ஊற்ற, தூவ அல்லது தெளிக்க மட்டுமே பயன்படுத்தப்பட வேண்டுமே தவிர, உடலில் ஊசி மூலம் செலுத்துவதற்கு அல்ல என்று அந்த அறிக்கையில் தெரிவிக்கப்பட்டுள்ளது.

கடந்த சில ஆண்டுகளாக இத்தகைய ஊசி சிகிச்சைகள் பிரபலமாகி வந்தாலும், அவற்றால் ஏற்படும் பக்கவிளைவுகள் குறித்த புகார்கள் அதிகரித்ததாலேயே இந்த எச்சரிக்கை விடுக்கப்பட்டுள்ளது. 1940-ஆம் ஆண்டின் மருந்து மற்றும் அழகு சாதனச் சட்டத்தின்படி, அழகு சாதனப் பொருட்கள் என்பது உடலைத் தூய்மைப்படுத்தவும், அழகை மேம்படுத்தவும் வெளிப்புறமாகப் பயன்படுத்தப்படுபவை மட்டுமே. எனவே, ஊசி மூலம் செலுத்தப்படும் சிகிச்சைகளுக்கு அனுமதி அளிக்கப்படவில்லை என்றும், இத்தகைய நடைமுறைகள் சட்ட விதிகளுக்கு முரணானவை என்றும் அதிகாரிகள் எச்சரித்துள்ளனர்.

இந்த உத்தரவு, இந்தியாவில் மிக வேகமாக வளர்ந்து வரும் அழகு நிலையங்கள் மற்றும் ஸ்கின்கேர் கிளினிக்குகளின் செயல்பாடுகளைக் கடுமையான கண்காணிப்புக்கு உள்ளாக்கும் என்று எதிர்பார்க்கப்படுகிறது. பல கிளினிக்குகள் முறையான அனுமதி இன்றி 'மெடிக்கல் கிரேடு' என்ற பெயரில் சருமத்தை வெண்மையாக்கும் ஊசிகள் மற்றும் ஸ்டீராய்டு கலந்த பொருட்களைப் பயன்படுத்தி வருகின்றன. போதிய பயிற்சியற்ற பணியாளர்களைக் கொண்டு செய்யப்படும் இத்தகைய சிகிச்சைகளால் உயிருக்கு ஆபத்தான பக்கவிளைவுகள் ஏற்பட வாய்ப்புள்ளதாக வல்லுநர்கள் நீண்டகாலமாக எச்சரித்து வருகின்றனர். இனி வரும் காலங்களில், இத்தகைய அனுமதியற்ற ஊசி சிகிச்சைகளை வழங்கும் கிளினிக்குகள் மற்றும் உற்பத்தி செய்யும் நிறுவனங்கள் மீது கடுமையான நடவடிக்கை எடுக்க இந்த உத்தரவு வழிவகுக்கும்.

அழகு சாதனப் பொருட்களின் லேபிள்களில் தவறான தகவல்களைக் குறிப்பிடுவது அல்லது சிகிச்சை என்ற பெயரில் பொருட்களை ஊசி மூலம் செலுத்துவது சட்டப்படி குற்றம் என்று தெரிவிக்கப்பட்டுள்ளது. மேலும், சந்தையில் விற்கப்படும் அழகு சாதனப் பொருட்களில் அனுமதிக்கப்படாத வேதிப்பொருட்கள் சேர்க்கப்படுவதும் கண்காணிக்கப்பட்டு வருகிறது. சமீபத்தில் தெலங்கானாவைச் சேர்ந்த நிறுவனம் ஒன்று, அனுமதிக்கப்பட்ட அளவை விட அதிக செறிவூட்டப்பட்ட அமிலங்களுடன் கூடிய கிரீம்களை இறக்குமதி செய்ததற்காக அதன் பதிவு ரத்து செய்யப்பட்டது. இத்தகைய தவறான நடைமுறைகளைக் கண்டால் பொதுமக்கள் cosmetics@cdsco.nic.in என்ற மின்னஞ்சல் முகவரிக்கு புகார் அளிக்கலாம் என்று அறிவுறுத்தப்பட்டுள்ளது.

உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.