.png)
பிரியாணி அப்படின்னாலே எல்லாருக்கும் ஒரு தனி இஷ்டம் தான். அதுலயும் அசைவம் சாப்பிடாதவங்க இல்லனா அசைவம் பிடிக்காதவங்களுக்கு காளான் பிரியாணி ஒரு வரப்பிரசாதம்னே சொல்லலாம். ஏன்னா காளான்ல இருக்கிற அந்த ஒரு தனி சுவையும், அது வேகும்போது வர்ற மணமும் அப்படியே கறி பிரியாணி சாப்பிடுற மாதிரியே இருக்கும். ஆனா நிறைய பேருக்கு இருக்குற ஒரே கவலை என்னன்னா, வீட்ல குக்கர்ல செய்யும்போது பிரியாணி ஒன்னோட ஒன்னு ஒட்டி குழஞ்சு போயிடுது, இல்லனா அடி பிடிச்சுடுது அப்படிங்கறதுதான். இன்னைக்கு நாம பார்க்கப்போற இந்த முறையில செஞ்சீங்கன்னா, ஹோட்டல்ல வாங்குற மாதிரியே ஒவ்வொரு அரிசியும் தனித்தனியா மல்லிகைப் பூ மாதிரி உதிரி உதிரியா இருக்கும். இதுக்கு முதல்ல ஒரு ரெண்டு கப் பாசுமதி அரிசி இல்லனா சீரக சம்பா அரிசியை எடுத்து நல்லா கழுவிட்டு ஒரு இருபது நிமிஷம் ஊற வச்சுக்கோங்க. அரிசி ஊறுற அந்த நேரத்துல நாம மத்த பொருட்களை ரெடி பண்ணிடலாம்.
முதல்ல ஒரு இருநூறு கிராம் பிரெஷ்ஷான காளானை வாங்கி, அதை நாலா வெட்டி வச்சுக்கோங்க. ரொம்ப பொடியா நறுக்குனா காளான் வெந்ததுக்கு அப்புறம் காணாம போயிடும், அதனால கொஞ்சம் பெருசாவே வெட்டிக்கோங்க. இப்போ அடுப்புல குக்கரை வச்சு, அதுல ஒரு மூணு ஸ்பூன் நெய், ரெண்டு ஸ்பூன் எண்ணெய் ஊத்திக்கோங்க. நெய் சேர்த்தா தான் பிரியாணி நல்லா மணமா இருக்கும். எண்ணெய் காஞ்சதும் பட்டை, கிராம்பு, ஏலக்காய், அன்னாசிப்பூ, அப்புறம் ரெண்டு பிரிஞ்சி இலையைப் போட்டு தாளிச்சுக்கோங்க. இதெல்லாம் பொரிஞ்சதும் நீளவாக்குல நறுக்கின ரெண்டு பெரிய வெங்காயத்தைப் போட்டு நல்லா வதக்கணும். வெங்காயம் கண்ணாடி மாதிரி வதங்குனா போதாது, நல்லா பொன்னிறமா வர்ற வரைக்கும் வதக்குனா தான் பிரியாணிக்கு அந்த ஒரிஜினல் கலர் கிடைக்கும்.
வெங்காயம் வதங்குனதுக்கு அப்புறம், ரெண்டு ஸ்பூன் இஞ்சி பூண்டு விழுதைச் சேர்த்து அதோட பச்சை வாசனை போற வரைக்கும் கிளறி விடுங்க. அப்புறம் ரெண்டு பச்சை மிளகாய், ஒரு கைப்பிடி புதினா, ஒரு கைப்பிடி கொத்தமல்லி தழையைப் போட்டு வதக்குங்க. இந்த புதினா வாசனை தான் பிரியாணிக்கு ரொம்ப முக்கியம். அடுத்து ரெண்டு தக்காளி பழத்தைப் போட்டு அது நல்லா குழைஞ்சு வர்ற வரைக்கும் வதக்கிட்டு, இப்போ மசாலா பொருட்களைச் சேர்க்கணும். ஒரு ஸ்பூன் தனி மிளகாய்த்தூள், ஒரு ஸ்பூன் கரம் மசாலா, அப்புறம் அரை ஸ்பூன் மல்லித்தூள் போட்டு லேசா வதக்கிட்டு, நாம நறுக்கி வச்சிருக்கிற காளானை அதுல கொட்டுங்க. காளான்ல இருந்தே கொஞ்சம் தண்ணி வரும், அதனால ஒரு ரெண்டு நிமிஷம் மசாலாவோட சேர்த்து நல்லா வதக்குனா போதும்.
இப்போ ரொம்ப முக்கியமான விஷயம் தண்ணி அளவு தான். ஒரு கப் அரிசிக்கு ஒன்றரை கப் தண்ணி அப்படிங்கற கணக்குல ஊத்துங்க. தண்ணி நல்லா கொதிச்சு வரும்போது, தேவையான அளவு உப்பு போட்டுட்டு, ஊற வச்சிருக்கிற அரிசியைத் தண்ணி இல்லாம வடிச்சு அதுல போடுங்க. அரிசியைப் போட்டதுக்கு அப்புறம் ரொம்ப கிண்டக்கூடாது, அப்படி செஞ்சா அரிசி உடைஞ்சு போயிடும். கடைசியா ஒரு அரை எலுமிச்சம்பழத்தைச் பிழிஞ்சு விட்டு, ஒரு ஸ்பூன் நெய்யை மேல ஊத்தி குக்கரை மூடிடுங்க. மிதமான தீயுல ஒரே ஒரு விசில் மட்டும் வச்சுட்டு அடுப்பை அணைச்சிடுங்க. விசில் அடங்குனதுக்கு அப்புறம் மெதுவா குக்கரைத் திறந்து ஒரு கரண்டியால ஓரமா இருந்து கிளறி விடுங்க. இப்போ பாருங்க, வீடே மணக்குற மாதிரி சூப்பரான காளான் பிரியாணி ரெடி! இதை தயிர் பச்சடியோட சேர்த்துச் சாப்பிட்டா அம்புட்டு ருசியா இருக்கும்.
உள்ளூர் முதல் உலகம் வரை பரபரப்பான ஹாட் செய்திகளை உடனுக்குடன் அறிய மாலைமுரசு யூடியூப் சேனலை காண இங்கே கிளிக் செய்யவும்.
